ហ៊ានមែន! វ៉ៃផ្ទះមួយទាំងមូល ម្ចាស់ផ្ទះអត់សុំច្បាប់ពីរដ្ឋបាលសង្កាត់តាខ្មៅ និងរដ្ឋបាលក្រុងតាខ្មៅ!

(កណ្ដាល)៖ សំណង់អាគារកំពស់៣ជាន់មួយកន្លែងស្ថិតនៅក្បែរកែងផ្លូវលេខ២០៨ ក្នុងសង្កាត់តាខ្មៅ ក្រុងតាខ្មៅ កំពុងទាក់ទាញការចាប់អារម្មណ៍ពីប្រជាពលរដ្ឋនិងចម្ងល់ជាទូទៅថា តើអគារនេះបានសុំច្បាប់ពីស្ថាប័នជំនាញនិងអាជ្ញាធរពាក់ព័ន្ធដែរឬទេ? បើតាមប្រភពបានបង្ហើបថា អាគារដែលកំពុងសាងសង់និងការវាយបញ្ចូលគ្នា ផ្ទះល្វែងពីរជាប់គ្នានោះបានសង់លើសទំហំនៃច្បាប់ដែលម្ចាស់សំណង់បានសុំហើយ ហើយការវាយផ្ទះល្វែងដែលបានទិញពីប្រធានក្រុមប្រឹក្សាខេត្តកណ្ដាលដើម្បីរំលាយចូលគ្នាជាមួយសឱណង់ថ្មីក៏មិនបានសុំច្បាប់ពីដ្ឋបាលសង្កាត់តាខ្មៅ និងរដ្ឋបាលក្រុងតាខ្មៅដែរ។ បែរជាម្ចាស់សំណង់បានសួរអ្នកកាសែតវិញថា «បានព័ត៌មានមកពីណា?»។

បើតាមប្រភពពីប្រជាពលរដ្ឋនៅក្រុងតាខ្មៅបានខ្សឹបថា អាគារកម្ពស់៣ជាន់ដែលកំពុងសាងសង់នោះ គេស្គាល់ថា ជារបស់ហ៊ាឆាយ ដែលបានសាងសង់លើសទំហំដែលម្ចាស់សំណង់បានសុំពីដ្ឋបាលសង្កាត់តាខ្មៅ និងរដ្ឋបាលក្រុងតាខ្មៅហើយ។ ហើយចំពោញផ្ទះចាស់មួយទៀតដែលកំពុងតែវ៉ៃបញ្ចូលគ្នាក៏មិនមានការសុំច្បាប់ពីរដ្ឋបាលសង្កាត់តាខ្មៅនិងក្រុងតាខ្មៅនោះដែរ។ ប្រភពបន្តខ្សឹបថា មន្ត្រីអាជ្ញាធររដ្ឋបាលសង្កាត់តាខ្មៅ និងក្រុងតាខ្មៅមិនហ៊ានទៅក្បែរសំណង់ខាងលើទេ ព្រោះម្ចាស់សំណង់ខាងលើអាងមានខ្នងបង្អែកជាអ្នកធំនៅខាងក្រោយចាំជួយអន្តរាគមន៍។

ប្រភពផ្សេងទៀតបានឲ្យដឹងថា តើច្បាប់មិនមែនសម្រាប់គ្រប់គ្នាទេ ឬមួយច្បាប់មានតែសម្រាប់អ្នកខ្សត់ខ្សោយ? ឬមួយច្បាប់មានតែនៅលើក្រដាស? ច្បាប់គួរត្រូវបានបង្កើតឡើងដើម្បីការពារ​សិទ្ធិ សមធម៌ និងអភិវឌ្ឍន៍ប្រទេស។ តែបើមានការលំអៀង ច្បាប់នោះក្លាយជាឧបករណ៍បំពាន មិនមែនការពារទេ។ច្បាប់គួរតែជាយានចម្លងនៃភាពស្មើភាព និងសេចក្តីសុខសង្គម។ច្បាប់ពិតប្រាកដ ត្រូវធ្វើឲ្យមនុស្សគ្រប់រូបខ្លាច ឬក៏យកចិត្តទុកដាក់ ដោយស្មើៗគ្នា មិនអាចជ្រើសរើសមនុស្សពិសេសឡើយ។

ប្រភពសុំមិនបញ្ចេញឈ្មោះបានខ្សឹបថា ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តកណ្តាលលោក សុក កាន់ណារិទ្ធិ ក៏ធ្លាប់បានទៅមើលនិងសាកសួរពីសំណង់ខាងលើដែរ ប៉ុន្តែក្រោយទទួលបានព័ត៌មានថា ជារបស់ហ៊ាឆាយដែលមានខ្នងបង្អែកធំក៏ស្ងាត់រហូតដល់សព្វថ្ងៃ ទោះបីដឹងថា សំណង់ខាងលើបានសាងសង់មិនតាមនីតិវិធីច្បាប់ក៏ដោយ។

ជុំវិញសំណង់ខាងលើ ម្ចាស់សំណង់គេស្គាល់ថា ហ៊ាឆាយ បានប្រាប់អ្នកកាសែតឲ្យពិនិត្យមើលមួយជួរហ្នឹងទៅ តើលើសឬមិនលើស ដូច្នេះសូមអញ្ជើញតាមសម្រួល។

ទាក់ទិនករណីខាងលើនេះអង្គភាព The Mirror News មិនអាចសុំការបភ្លឺពីលោក សុក កាន់ណារិទ្ធិ ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តកណ្តាលបានទេ ព្រោះខលតាមប្រព័ន្ធតេលេក្រាមចូលប៉ុន្តែមិនលើក។

ទាក់ទិនករណីសំណង់ខាងលើនេះ  អង្គភាព The Mirror News មិនអាចសុំការបំភ្លឺពីហ៊ាឆាយបានទេព្រោះខលតាមប្រព័ន្ធតេលេក្រាមចូលប៉ុន្តែគ្មានមនុស្សលើក។

ដើម្បីបញ្ជាក់ឲ្យកាន់តែលម្អិត និងច្បាស់លាស់ពីករណីខាងលើ អង្គភាព The Mirror News នឹងរង់ចាំការឆ្លើយបំភ្លឺពីគ្រប់ភាគីរៀងរាល់ម៉ោងធ្វើការ៕