បញ្ហាសង្គមនៅជុំវិញផ្សារតាខ្មៅចាស់ ភាពអាណាធិបតេយ្យ ការរំលោភចិញ្ចើមផ្លូវសាធារណៈ ការលក់ដូរដោយគ្មានរបៀបរបបអាជ្ញាធរសង្កាត់-ក្រុងតាខ្មៅគួរចាត់វិធានការឲ្យបានតឹងរ៉ឹង

(កណ្ដាល)៖ នៅក្នុងតំបន់ជុំវិញផ្សារតាខ្មៅចាស់ ស្ថិតនៅភូមិតាខ្មៅ២ សង្កាត់តាខ្មៅ ក្រុងតាខ្មៅ ឃើញមានបញ្ហាសង្គមជាច្រើនកើតឡើងជាបន្តបន្ទាប់ ដែលត្រូវបានប្រជាពលរដ្ឋក្នុងតំបន់និងអ្នកធ្វើដំណើរជាច្រើនបង្ហាញការព្រួយបារម្ភយ៉ាងខ្លាំង។ បញ្ហាទាំងនោះរួមមានភាពអាណាធិបតេយ្យ ការរំលោភចិញ្ចើមផ្លូវសាធារណៈ ការលក់ដូរដោយគ្មានរបៀបរបប និងការប្រើប្រាស់ផ្លូវជាសម្បត្តិឯកជន ដែលទាមទារឲ្យអាជ្ញាធរមូលដ្ឋានជាពិសេសអាជ្ញាធរសង្កាត់តាខ្មៅ និងក្រុងតាខ្មៅគួរតែមានវិធានការឲ្យបានតឹងរ៉ឹងបំផុតចំពោះបញ្ហាខាងលើនេះ។ នេះបើតាមប្រភពដែលអង្គភាព The Mirror News ទទួលបាននៅថ្ងៃទី១៩ ខែមេសា ឆ្នាំ២០២៥នេះ។

ប្រភពបានបន្តថា ភាពអាណាធិបតេយ្យ និងការគ្មានសណ្ដាប់ធ្នាប់នៅក្នុងតំបន់ខាងលើនេះ មានការប្រើអំណាចរបស់មនុស្សមួយចំនួនដែលមិនគោរពច្បាប់ ហើយប្រើអំណាចបែបផ្ទាល់ខ្លួន ដើម្បីសាងសង់ ឬរឹបអូសផ្លូវសាធារណៈជារបស់ខ្លួន។

ប្រភពនៅតាមតុកាហ្វេបានខ្សឹបខ្សៀវថា បើការរំលោភនិងលក់ដូរលើចិញ្ចើមផ្លូវ ជាពិសេសការលក់ដូរដោយគ្មានការរៀបចំឲ្យបានល្អ បណ្តាលឲ្យផ្លូវជាតិ និងចិញ្ចើមផ្លូវត្រូវបានរារាំង។ អ្នកលក់គ្របដណ្តប់ផ្លូវដោយគ្មានការអនុញ្ញាត គឺប៉ះពាល់យ៉ាងខ្លាំងដល់ចរាចរណ៍ និងសុវត្ថិភាពរបស់អ្នកដើរជើង និងអ្នកបើកបរទូទៅ។

ប្រភពផ្សេងទៀតបានបន្តថា ចំពោះបញ្ហាបរិស្ថាន សំណល់ និងសំរាមត្រូវបានបោះចោលដោយគ្មានការគ្រប់គ្រង និងមានការរំខាននឹងក្លិនស្អុយ ការរាលដាលមេរោគ និងប៉ះពាល់ដល់សុខភាពសាធារណៈ។ វាជាបញ្ហាធំមួយដែលត្រូវការការកែសម្រួលយ៉ាងតឹងរ៉ឹងពីអាជ្ញាធរ និងភាពរួមចំណែករបស់ប្រជាពលរដ្ឋផងដែរ៕