ឯកឧត្តម ប៉េង ពោធិ៍នា ផ្ញើសារលិខិតចូលរួមរំលែកទុក្ខ ជូនលោក ប៉ែត សារ៉ាត់ អនុប្រធានមន្ទីរសាធារណការ និងដឹកជញ្ជូនខេត្តកណ្តាល ចំពោះមរណភាពលោកឪពុក

(កណ្តាល)៖ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន ព្រមទាំងភរិយា ថ្នាក់ដឹកនាំ និងមន្ត្រីរាជការនៃក្រសួង បានផ្ញើសារលិខិតចូលរួមរំលែកទុក្ខយ៉ាងក្រៀមក្រំ ជូនលោក ប៉ែត សារ៉ាត់ អនុប្រធានមន្ទីរសាធារណការ និងដឹកជញ្ជូនខេត្តកណ្តាល និងលោកស្រី ព្រមទាំងក្រុមគ្រួសារ ចំពោះមរណភាពរបស់ឧបាសក ប៉ែត ស្លៀក ដែលត្រូវជាឪពុកបង្កើត ឪពុកក្មេក និងជីតា។

ឧបាសក ប៉ែត គ្រៀក បានទទួលមរណភាពនៅថ្ងៃសុក្រ ទី១៤ ខែសីហា ឆ្នាំ២០២៦ វេលាម៉ោង ៦:៥៥នាទីព្រឹក ក្នុងជន្មាយុ ៨៩ឆ្នាំ ដោយជរាពាធ។

ក្នុងសារលិខិត ឯកឧត្តមរដ្ឋមន្ត្រី ប៉េង ពោធិ៍នា បានសម្តែងនូវសេចក្តីរន្ធត់ ក្តុកក្តួល និងសោកស្តាយយ៉ាងក្រៃលែង ចំពោះការបាត់បង់បុគ្គលជាទីគោរពស្រឡាញ់របស់ក្រុមគ្រួសារ។ ឯកឧត្តមបានចូលរួមរំលែកមរណទុក្ខជាមួយលោក ប៉ែត សារ៉ាត់ និងលោកស្រី ព្រមទាំងក្រុមគ្រួសារ ចំពោះការបាត់បង់ឪពុកបង្កើត ឪពុកក្មេក និងជីតា ដែលជាអ្នកមានគុណ និងមានតួនាទីដ៏សំខាន់ក្នុងការចិញ្ចឹមបីបាច់ ថែរក្សា អប់រំ និងទូន្មានបុត្រធីតា រហូតក្លាយជាធនធានដ៏មានតម្លៃសម្រាប់សង្គមជាតិ។

ជាមួយគ្នានេះ ឯកឧត្តម ប៉េង ពោធិ៍នា បានឧទ្ទិសបួងសួងសូមដួងវិញ្ញាណក្ខន្ធឧបាសក ប៉ែត ស្លៀក បានទៅកាន់សុគតិភព កុំបីឃ្លៀងឃ្លាតឡើយ និងសូមឱ្យក្រុមគ្រួសារទទួលបានកម្លាំងចិត្ត ដើម្បីឆ្លងកាត់វេលាដ៏សោកសៅនេះ។

ជាការឆ្លើយតប លោក ប៉ែត សារ៉ាត់ អនុប្រធានមន្ទីរសាធារណការ និងដឹកជញ្ជូនខេត្តកណ្តាល និងភរិយា ព្រមទាំងក្រុមគ្រួសារ បានសម្តែងនូវក្តីរំភើប និងអំណរគុណយ៉ាងជ្រាលជ្រៅ ចំពោះឯកឧត្តមរដ្ឋមន្ត្រី ព្រមទាំងថ្នាក់ដឹកនាំ និងមន្ត្រីរាជការនៃក្រសួង ដែលបានបង្ហាញនូវទឹកចិត្តអាណិតអាសូរ ស្រឡាញ់រាប់អាន និងផ្តល់កម្លាំងចិត្តដ៏មានតម្លៃដល់គ្រួសារ ក្នុងគ្រាដ៏ក្រៀមក្រំនេះ។

លោក ប៉ែត សារ៉ាត់ បានចាត់ទុកសារលិខិតរំលែកទុក្ខ និងការយកចិត្តទុកដាក់របស់ថ្នាក់ដឹកនាំ និងមន្ត្រីរាជការក្រសួង ជាកាយវិការដ៏ថ្លៃថ្លា ដែលនឹងស្ថិតនៅក្នុងការចងចាំ និងការដឹងគុណរបស់ក្រុមគ្រួសារជារៀងរហូត។

តាងនាមក្រុមគ្រួសារ លោក ប៉ែត សារ៉ាត់ ក៏បានបួងសួងសូមវត្ថុស័ក្តិសិទ្ធិ និងព្រះរតនត្រ័យ តាមជួយបីបាច់ថែរក្សា និងប្រសិទ្ធពរជ័យ សិរីសួស្តី ជ័យមង្គល វិបុលសុខ ជូនចំពោះឯកឧត្តមរដ្ឋមន្ត្រី ថ្នាក់ដឹកនាំ មន្ត្រីរាជការ និងក្រុមគ្រួសារ ឱ្យប្រកបដោយពុទ្ធពរទាំងបួនប្រការ គឺ អាយុ វណ្ណៈ សុខៈ និងពលៈ កុំបីឃ្លៀងឃ្លាតឡើយ។

នេះជាកាយវិការដ៏ប្រពៃ និងជាសក្ខីភាពនៃសាមគ្គីភាព ការយកចិត្តទុកដាក់ និងស្មារតីមនុស្សធម៌របស់ថ្នាក់ដឹកនាំ និងមន្ត្រីរាជការ ក្នុងការចែករំលែកទុក្ខលំបាកជាមួយក្រុមគ្រួសារមន្ត្រីក្រោមឱវាទ ក្នុងគ្រាដែលជួបប្រទះការបាត់បង់មនុស្សជាទីស្រឡាញ់៕