ឯកឧត្តម នាយឧត្តមសេនីយ៍ ឈន សារ៉ាណេ ពាំនាំអំណោយសម្តេចក្រឡាហោម ស ខេង ប្រគេនវត្តសិរីវិជ្ជា និងបន្តគាំទ្រការអភិរក្សព្រះវិហារបុរាណជាង១០០ឆ្នាំ

(ព្រៃវែង)៖ ឯកឧត្តម នាយឧត្តមសេនីយ៍ ឈន សារ៉ាណេ សមាជិកគណៈកម្មាធិការកណ្តាល និងជាអនុប្រធានក្រុមការងារចល័ត នៃក្រុមការងារគណបក្សប្រជាជនកម្ពុជា ចុះមូលដ្ឋានខេត្តព្រៃវែងនាព្រឹកថ្ងៃសៅរ៍ ទី១ ខែសីហា ឆ្នាំ២០២៦នេះ បានពាំនាំយកអំណោយដ៏ថ្លៃថ្លារបស់ សម្តេចក្រឡាហោម ស ខេង ឧត្តមប្រឹក្សាផ្ទាល់ព្រះមហាក្សត្រ និងជាអនុប្រធានគណបក្សប្រជាជនកម្ពុជា ប្រគេនដល់វត្តសិរីវិជ្ជា ហៅវត្តព្រែកផ្គាំ ស្ថិតក្នុងឃុំច្រាំងទទឹង ស្រុកពោធិ៍រៀង ខេត្តព្រៃវែង។

អំណោយដែលបានប្រគេនរួមមាន ទៀនវស្សា ស្លាដក អង្ករ មី ទឹកសុទ្ធ ទឹកក្រូចកំប៉ុង ទឹកត្រី ទឹកស៊ីអ៊ីវ ស្ករស ប៊ីចេង ទឹកដោះគោខាប់ តែ ខ្ទឹមស ឆៃប៉ូវ ទៀន ធូប ប្រេងឆា ប្រេងម៉ាស៊ូត ព្រមទាំងក្រណាត់ស និងថវិកាជូនគណៈកម្មាធិការអាចារ្យវត្ត និងថវិកាប្រគេនព្រះចៅអធិការវត្ត ដើម្បីប្រើប្រាស់ក្នុងការងារព្រះពុទ្ធសាសនា និងអភិវឌ្ឍន៍វត្តអារាម។

ក្នុងឱកាសនោះដែរ ឯកឧត្តម នាយឧត្តមសេនីយ៍ និងលោកជំទាវ ព្រមទាំងក្រុមគ្រួសារ ត្រូវបានលើកឡើងថា ឯកឧត្តមបានចូលរួមកសាងសមិទ្ធិផលជាច្រើននៅវត្តសិរីវិជ្ជា រួមមាន ការចាក់ដីបំពេញទីធ្លាវត្ត កសាងខ្លោងទ្វារវត្ត ផ្តល់ការ៉ូសម្រាប់ក្រាលព្រះវិហារ រៀបចំខឿនជុំវិញព្រះវិហារថ្មី កសាងរូបដំរីមួយគូមុខខ្លោងទ្វារ និងសមិទ្ធិផលសំខាន់ៗជាច្រើនទៀត ដែលបានរួមចំណែកលើកកម្ពស់សោភ័ណភាព និងការអភិវឌ្ឍវត្តអារាម។

ជាពិសេស ឯកឧត្តម នាយឧត្តមសេនីយ៍ បានដើរតួនាទីយ៉ាងសំខាន់ក្នុងការអភិរក្សព្រះវិហារបុរាណដែលមានអាយុកាលជាង១០០ឆ្នាំ។ ខណៈដែលគណៈកម្មាធិការវត្តធ្លាប់មានគម្រោងរុះរើព្រះវិហារចាស់ ដើម្បីសាងសង់ព្រះវិហារថ្មី ឯកឧត្តមបានស្នើសុំឱ្យរក្សាទុកព្រះវិហារបុរាណនេះ ដោយចាត់ទុកថាជាសម្បត្តិបេតិកភណ្ឌដ៏មានតម្លៃ សម្រាប់កូនចៅជំនាន់ក្រោយបានឃើញ និងសិក្សាពីកេរ្តិ៍ដំណែលដែលបុព្វបុរសបានបន្សល់ទុក។

ជាមួយគ្នានេះ ឯកឧត្តមក៏បានគាំទ្រការចាក់ដីពង្រីកទីធ្លាវត្ត ដើម្បីអាចសាងសង់ព្រះវិហារថ្មី ដោយមិនប៉ះពាល់ដល់ព្រះវិហារបុរាណនោះឡើយ។

សកម្មភាពខាងលើបានឆ្លុះបញ្ចាំងពីការយកចិត្តទុកដាក់ចំពោះការលើកស្ទួយព្រះពុទ្ធសាសនា ការអភិវឌ្ឍវត្តអារាម និងការអភិរក្សសម្បត្តិបេតិកភណ្ឌវប្បធម៌ជាតិ ឱ្យបន្តស្ថិតស្ថេរជាមរតកដ៏មានតម្លៃសម្រាប់មនុស្សជំនាន់ក្រោយ៕