លោក ចាប វន្នី កោតសរសើរមន្ត្រីព័ត៌មានខេត្តកណ្ដាល និងជំរុញការប្រើប្រាស់ AI ប្រកបដោយវិជ្ជាជីវៈ ដើម្បីបង្កើនប្រសិទ្ធភាពការផ្សព្វផ្សាយព័ត៌មាន

(កណ្ដាល)៖ លោក ចាប វន្នី ប្រធានមន្ទីរព័ត៌មានខេត្តកណ្ដាល បានកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់មន្ត្រីក្រោមឱវាទ ដែលបានបំពេញភារកិច្ចប្រកបដោយការទទួលខុសត្រូវខ្ពស់ និងរួមចំណែកធ្វើឱ្យការផ្សព្វផ្សាយព័ត៌មានមានភាពទាន់ពេលវេលា ត្រឹមត្រូវ និងមានប្រសិទ្ធភាព។

ការលើកឡើងនេះ ធ្វើឡើងក្នុងឱកាសបើកកិច្ចប្រជុំបូកសរុបលទ្ធផលការងារឆមាសទី១ ឆ្នាំ២០២៦ និងលើកទិសដៅអនុវត្តការងារបន្តសម្រាប់ឆមាសទី២ ឆ្នាំ២០២៦ របស់មន្ទីរព័ត៌មានខេត្តកណ្ដាល នាថ្ងៃទី៣០ ខែមិថុនា ឆ្នាំ២០២៦។

ក្នុងឱកាសនោះ លោកប្រធានមន្ទីរ ក៏បានជំរុញដល់គ្រប់ការិយាល័យ ត្រូវបន្តពង្រឹងវិន័យការងារ អភិវឌ្ឍសមត្ថភាពមន្ត្រី និងពង្រីកការផ្សព្វផ្សាយព័ត៌មានឱ្យកាន់តែទូលំទូលាយ ទាន់ហេតុការណ៍ មានភាពត្រឹមត្រូវ និងមានប្រសិទ្ធភាពខ្ពស់ ដើម្បីបម្រើផលប្រយោជន៍សាធារណៈ។

ជាមួយគ្នានេះ លោកបានគូសបញ្ជាក់ថា បច្ចេកវិទ្យាបញ្ញាសិប្បនិមិត្ត (AI) កំពុងដើរតួនាទីយ៉ាងសំខាន់ក្នុងវិស័យព័ត៌មាន ដោយអាចជួយសម្រួលដល់ការរៀបចំខ្លឹមសារ ការសង្ខេបឯកសារ ការកែសម្រួលអក្ខរាវិរុទ្ធ និងការបង្កើនប្រសិទ្ធភាពការងាររបស់អ្នកសារព័ត៌មាន។

ទន្ទឹមនឹងនេះ លោក ចាប វន្នី បានណែនាំដល់មន្ត្រីព័ត៌មានទាំងអស់ ឱ្យបង្កើនសមត្ថភាពក្នុងការប្រើប្រាស់បច្ចេកវិទ្យា AI សម្រាប់ការផលិតព័ត៌មាន ប្រកបដោយក្រមសីលធម៌ និងវិជ្ជាជីវៈ ដើម្បីឆ្លើយតបនឹងការវិវត្តយ៉ាងឆាប់រហ័សនៃបច្ចេកវិទ្យាឌីជីថល ស្របតាមទិសដៅរបស់ក្រសួងព័ត៌មាន គោលការណ៍របស់រដ្ឋបាលខេត្ត និងគោលនយោបាយរបស់រាជរដ្ឋាភិបាល៕