កម្លាំងកងរាជអាវុធហត្ថខេត្តកំពង់ស្ពឺអន្តរាគមន៍ទាន់ពេល ឃាត់ខ្លួនជនសង្ស័យម្នាក់ ក្រោយប្រើកាំបិតផ្គាក់គំរាមកំហែង និងគប់ដុំថ្មលើផ្ទះពលរដ្ឋ

(កំពង់ស្)ពឺ៖ កម្លាំងជំនាញកងរាជអាវុធហត្ថខេត្តកំពង់ស្ពឺ បានចុះអន្តរាគមន៍ភ្លាមៗ និងឃាត់ខ្លួនជនសង្ស័យម្នាក់ ក្រោយធ្វើសកម្មភាពយកកាំបិតផ្គាក់គំរាមកំហែងកាប់ និងគប់ដុំថ្មទៅលើផ្ទះរបស់ប្រជាពលរដ្ឋ បង្កឱ្យមានការភ័យខ្លាចដល់អ្នករស់នៅក្នុងមូលដ្ឋាន។ ប្រតិបត្តិការនេះធ្វើឡើងបន្ទាប់ពីមានការរាយការណ៍ និងស្នើសុំកិច្ចអន្តរាគមន៍តាមរយៈលេខទូរស័ព្ទសង្គ្រោះបន្ទាន់ 1292។

ប្រតិបត្តិការនេះ ត្រូវបានអនុវត្តតាមបទបញ្ជាយ៉ាងម៉ឺងម៉ាត់របស់លោកឧត្តមសេនីយ៍ត្រី ម៉េង ស្រ៊ុន មេបញ្ជាការកងរាជអាវុធហត្ថខេត្តកំពង់ស្ពឺ ដោយកាលពីវេលាម៉ោង ៩:១៧នាទីយប់ ថ្ងៃទី១៨ ខែមិថុនា ឆ្នាំ២០២៦ ក្រុមការងារប្រចាំមណ្ឌលប្រតិបត្តិការ HotLine 1292 ដែលបម្រើការងារ ២៤ម៉ោងលើ ២៤ម៉ោង បានទទួលការហៅចូលពីប្រជាពលរដ្ឋម្នាក់ ដើម្បីរាយការណ៍អំពីករណីជនសង្ស័យប្រើអំពើហិង្សា និងគំរាមកំហែងដល់សុវត្ថិភាពអ្នកដទៃ។

ក្រោយទទួលព័ត៌មានភ្លាម កម្លាំងមូលដ្ឋានកងរាជអាវុធហត្ថស្រុកសំរោងទង បានចុះទៅដល់ទីតាំងកើតហេតុ និងធ្វើការឃាត់ខ្លួនជនបង្កបានភ្លាមៗ។ ជនសង្ស័យមានឈ្មោះ លឹម ថាច ភេទប្រុស អាយុ ៣០ឆ្នាំ មុខរបរមិនពិតប្រាកដ មានទីលំនៅភូមិរំដួល ឃុំត្រពាំងគង ស្រុកសំរោងទង ខេត្តកំពង់ស្ពឺ។

ក្នុងប្រតិបត្តិការនេះ សមត្ថកិច្ចបានដកហូតវត្ថុតាងរួមមាន កាំបិតផ្គាក់ចំនួន ១ដើម និងដុំថ្មចំនួន ២ដុំ ដែលត្រូវបានប្រើប្រាស់ក្នុងសកម្មភាពបង្កហេតុខាងលើ។
បច្ចុប្បន្ន ជនសង្ស័យរួមជាមួយវត្ថុតាង ត្រូវបានកម្លាំងជំនាញមន្ទីរស្រាវជ្រាវ និងបង្ក្រាបបទល្មើស នៃបញ្ជាការដ្ឋានកងរាជអាវុធហត្ថខេត្តកំពង់ស្ពឺ កសាងសំណុំរឿងបញ្ជូនទៅសាលាដំបូងខេត្តកំពង់ស្ពឺ ដើម្បីចាត់ការតាមនីតិវិធីច្បាប់។

ករណីនេះបង្ហាញពីប្រសិទ្ធភាពនៃប្រព័ន្ធទទួលព័ត៌មានបន្ទាន់ 1292 ដែលបានជួយឱ្យកម្លាំងមានសមត្ថកិច្ចអន្តរាគមន៍បានទាន់ពេលវេលា រក្សាសន្តិសុខ សុវត្ថិភាព និងសណ្តាប់ធ្នាប់សាធារណៈជូនប្រជាពលរដ្ឋក្នុងមូលដ្ឋាន៕