សំរាមគរដូចភ្នំនៅក្រោយវត្តសិត្បូ! ពលរដ្ឋ និងអាជីវករមួយចំនួនបោះសំរាមពាសវាលពាសកាល អាជ្ញាធរគួរចាត់វិធានការបន្ទាន់

(កណ្ដាល)៖ ប្រជាពលរដ្ឋ និងអាជីវករមួយចំនួន ត្រូវបានគេរិះគន់ថា មានចរិត និងទម្លាប់មិនល្អ ដោយបានយកសំរាមគ្រប់ប្រភេទទៅបោះចោលពាសវាលពាសកាលនៅក្បែរផ្លូវ ក្រោយវត្តសិត្បូ ស្ថិតក្នុងភូមិសិត្បូ សង្កាត់សិត្បូ ក្រុងតាខ្មៅ ខេត្តកណ្ដាល ដែលធ្វើឱ្យទីតាំងនោះក្លាយជាគំនរសំរាមដ៏ធំ បង្កឱ្យមានក្លិនស្អុយអសោច និងប៉ះពាល់យ៉ាងធ្ងន់ធ្ងរដល់បរិស្ថាន និងសុខភាពប្រជាពលរដ្ឋ។

ជាក់ស្ដែង នៅថ្ងៃទី១៩ ខែមិថុនា ឆ្នាំ២០២៦នេះ ប្រជាពលរដ្ឋដែលធ្វើដំណើរឆ្លងកាត់ផ្លូវខាងលើ បានលើកឡើងថា គំនរសំរាមនៅទីតាំងនេះមានគេយកមកបោះចោលជាយូរមកហើយ ដោយមិនឃើញមានការទប់ស្កាត់ ឬចាត់វិធានការឱ្យមានប្រសិទ្ធភាពនោះទេ។ នៅពេលអាកាសធាតុក្តៅ ក្លិនស្អុយបានសាយភាយយ៉ាងខ្លាំង ធ្វើឱ្យអ្នកធ្វើដំណើរ និងប្រជាពលរដ្ឋរស់នៅក្បែរនោះទទួលរងការរំខានយ៉ាងខ្លាំង។

ប្រជាពលរដ្ឋបានសម្តែងការខកចិត្តថា ការបោះចោលសំរាមដោយគ្មានទំនួលខុសត្រូវបែបនេះ មិនត្រឹមតែបង្ហាញពីការខ្វះសីលធម៌ និងស្មារតីថែរក្សាបរិស្ថានប៉ុណ្ណោះទេ ប៉ុន្តែថែមទាំងធ្វើឱ្យបាត់បង់សោភ័ណភាពទីក្រុង និងបង្កឱ្យមានផលប៉ះពាល់ជាច្រើនដល់សហគមន៍ទៀតផង។

អ្នកជំនាញផ្នែកបរិស្ថានបានលើកឡើងថា គំនរសំរាមដែលទុកចោលយូរអាចក្លាយជាប្រភពបង្កាត់មេរោគ សត្វរុយ មូស កណ្ដុរ និងសត្វល្អិតផ្សេងៗ ដែលជាមូលហេតុនាំឱ្យកើតជំងឺឆ្លងជាច្រើន។ លើសពីនេះ ទឹកសំណល់ហូរចេញពីគំនរសំរាមអាចជ្រាបចូលដី និងប្រព័ន្ធទឹក បង្កការបំពុលបរិស្ថានយ៉ាងធ្ងន់ធ្ងរ។ នៅរដូវវស្សា សំរាមក៏អាចស្ទះប្រព័ន្ធលូ និងផ្លូវបង្ហូរទឹក បណ្តាលឱ្យមានការលិចលង់ និងបញ្ហាសុខាភិបាលផ្សេងៗទៀត។

ជាមួយគ្នានេះ ប្រជាពលរដ្ឋសូមអំពាវនាវដល់លោកចៅសង្កាត់សិត្បូ លោកចៅហ្វាយក្រុងតាខ្មៅ និងលោកប្រធានមន្ទីរបរិស្ថានខេត្តកណ្ដាល មេត្តាចុះពិនិត្យជាក់ស្តែងនៅទីតាំងខាងលើ និងចាត់វិធានការទប់ស្កាត់ឱ្យបានទាន់ពេលវេលា ដោយស្រាវជ្រាវរកអ្នកដែលលួចយកសំរាមមកបោះចោលខុសទីកន្លែង និងអនុវត្តវិធានការផ្លូវច្បាប់ឱ្យបានម៉ឺងម៉ាត់ ដើម្បីរក្សាអនាម័យ បរិស្ថាន និងសោភ័ណភាពក្នុងមូលដ្ឋានឱ្យបានល្អប្រសើរ។

ប្រជាពលរដ្ឋក៏សង្ឃឹមថា អាជ្ញាធរពាក់ព័ន្ធនឹងមិនបណ្តោយឱ្យបញ្ហានេះអូសបន្លាយតទៅទៀតឡើយ ព្រោះបើគ្មានការទប់ស្កាត់ឱ្យបានទាន់ពេល នោះគំនរសំរាមនឹងកាន់តែកើនឡើង ហើយផលប៉ះពាល់ដល់សុខភាពសាធារណៈ និងបរិស្ថាននឹងកាន់តែធ្ងន់ធ្ងរឡើងជាមិនខាន៕