ឯកឧត្តមអភិសន្តិបណ្ឌិត ស សុខា ចុះសួរសុខទុក្ខ និងពិនិត្យការងារជាក់ស្ដែងរបស់មន្ត្រីនគរបាលប៉ុស្តិ៍រដ្ឋបាលសូរភី ខេត្តតាកែវ

(តាកែវ)៖ នារសៀលថ្ងៃទី១៤ ខែមិថុនា ឆ្នាំ២០២៦ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ ក្នុងដំណើរឆ្ពោះទៅកាន់បណ្ដាខេត្តភាគនិរតី បានឆៀងចូលសួរសុខទុក្ខ និងពិនិត្យស្ថានភាពការងារជាក់ស្ដែងរបស់មន្ត្រីនគរបាលជាតិ នៃប៉ុស្តិ៍នគរបាលរដ្ឋបាលសូរភី ស្ថិតក្នុងឃុំសូរភី ស្រុកបាទី ខេត្តតាកែវ។

ក្នុងឱកាសនោះ ឯកឧត្តមបានស្វែងយល់អំពីស្ថានភាពសន្តិសុខ សណ្ដាប់ធ្នាប់សាធារណៈ សុវត្ថិភាពសង្គម និងការផ្ដល់សេវារដ្ឋបាលជូនប្រជាពលរដ្ឋ ខណៈមន្ត្រីនគរបាលកំពុងបំពេញភារកិច្ចយ៉ាងសកម្មនៅតាមគោលដៅនានាក្នុងភូមិទាំង៨ នៃឃុំសូរភី។

ឃុំសូរភី ជាតំបន់ប្រជុំជនជាប់ផ្លូវជាតិលេខ៣ ដែលមានប្រជាជនប្រមាណ១ម៉ឺននាក់ បន្ទប់ជួលជាង១ពាន់បន្ទប់ និងមានរោងចក្រ-សហគ្រាសចំនួន១៥កន្លែង ដែលទាមទារឱ្យកម្លាំងនគរបាលត្រូវប្រចាំការយប់ថ្ងៃ ដើម្បីធានាសន្តិសុខ និងសុវត្ថិភាពជូនប្រជាពលរដ្ឋ។

ជាមួយគ្នានេះ ឯកឧត្តមអភិសន្តិបណ្ឌិត ស សុខា ក៏បានស្ដាប់នូវបទពិសោធន៍ការងារ បញ្ហាប្រឈម សំណូមពរ និងទស្សនយោបល់ពីមន្ត្រីថ្នាក់មូលដ្ឋាន ដើម្បីយកទៅពិចារណាកែលម្អ និងពង្រឹងប្រសិទ្ធភាពការងារប៉ុស្តិ៍នគរបាលរដ្ឋបាល ស្របតាមគោលនយោបាយ «ភូមិ-ឃុំ-សង្កាត់មានសុវត្ថិភាព» ក្នុងគោលបំណងលើកកម្ពស់ជំនឿទុកចិត្តរបស់ប្រជាពលរដ្ឋ និងលើកស្ទួយកិត្តិយស សេចក្ដីថ្លៃថ្នូរ និងមោទកភាពរបស់មន្ត្រីអនុវត្តច្បាប់។

ក្នុងឱកាសនោះដែរ ឯកឧត្តមអភិសន្តិបណ្ឌិត ស សុខា បានផ្ញើសារលើកទឹកចិត្ត និងជូនពរដល់លោកនាយប៉ុស្តិ៍ នាយរង និងមន្ត្រីនគរបាលទាំងអស់ ឱ្យមានសុខភាពល្អ កម្លាំងមាំមួន និងបន្តទទួលបានជោគជ័យក្នុងភារកិច្ចបម្រើជាតិ និងប្រជាជន។ ទន្ទឹមនឹងនេះ ឯកឧត្តមក៏បានជូនពរដល់ថ្នាក់ដឹកនាំមូលដ្ឋាន មន្ត្រីរដ្ឋបាល ប្រជាការពារ និងប្រជាពលរដ្ឋឃុំសូរភីទាំងមូល ឱ្យទទួលបានសេចក្ដីសុខ សុភមង្គល និងជោគជ័យគ្រប់ភារកិច្ច ក្រោមការដឹកនាំរបស់រាជរដ្ឋាភិបាលកម្ពុជា៕