សំណង់ឃ្លាំងនៅក្បែរស្តុបក្រពើហារ ក្រុងតាខ្មៅ ម្ចាស់បានដាក់ពាក្យសុំច្បាប់ហើយ តែការអនុម័តមិនទាន់ច្បាស់ ខណៈការដ្ឋានបន្តសាងសង់

(កណ្តាល)៖ ករណីសំណង់ឃ្លាំងមួយនៅក្រុងតាខ្មៅ កំពុងទាក់ទាញការយកចិត្តទុកដាក់ពីសាធារណជន បន្ទាប់ពីអាជ្ញាធរមូលដ្ឋានបានចេញលិខិតផ្អាកការដ្ឋាន កាលពីថ្ងៃទី៧ ខែមេសា ឆ្នាំ២០២៦ ពាក់ព័ន្ធនឹងការសាងសង់ដោយគ្មានលិខិតអនុញ្ញាតត្រឹមត្រូវ។

តាមឯកសារផ្លូវការ លោក ឈុន គៀ និងភរិយា ធៀប ចេងទៀង មានអាសយដ្ឋាននៅភូមិតាខ្មៅ៣ សង្កាត់តាខ្មៅ ក្រុងតាខ្មៅ បានដាក់ពាក្យសុំជូនអភិបាលខេត្តកណ្តាល តាមរយៈមន្ទីររៀបចំដែនដី នគរូបនីយកម្ម និងសំណង់ ដើម្បីសុំអនុញ្ញាតសាងសង់ និងពង្រីកអគារឃ្លាំង លើក្បាលដីលេខ 08110204-0933 ស្ថិតនៅភូមិក្រពើហាកើត សង្កាត់ព្រែកឫស្សី។

យ៉ាងណាក៏ដោយ តាមកំណត់ហេតុត្រួតពិនិត្យ និងលិខិតផ្អាកការដ្ឋាន អាជ្ញាធរបានបញ្ជាក់ថា ការដ្ឋាននេះបានដំណើរការសាងសង់រួចមកហើយ ដោយគ្មានលិខិតអនុញ្ញាត និងមិនមានកិច្ចសន្យាជាប់ព្រំត្រឹមត្រូវ ដែលជាការបំពានលើច្បាប់ស្តីពីសំណង់ ឆ្នាំ២០១៩ និងបទប្បញ្ញត្តិពាក់ព័ន្ធ។

បើយោងតាមប្រភពព័ត៌មាននៅមូលដ្ឋាន បានឲ្យដឹងថា ម្ចាស់សំណង់បានដាក់ពាក្យសុំលិខិតអនុញ្ញាតទៅរដ្ឋបាលខេត្តកណ្តាលរួចហើយ ប៉ុន្តែរហូតមកដល់ពេលនេះ ការអនុម័តនៅមិនទាន់មានភាពច្បាស់លាស់នៅឡើយ។

អ្វីដែលគួរឲ្យកត់សម្គាល់នោះគឺ ទោះបីមិនទាន់ទទួលបានលិខិតអនុញ្ញាតផ្លូវការឡើយ ក៏ដោយ ការដ្ឋានត្រូវបានរាយការណ៍នៅព្រឹកថ្ងៃទី០២ ខែឧសភា ឆ្នាំ២០២៦នេះថា ក្រុមជាងរបស់ម្ចាស់សំណង់ឃ្លាំងកំពុងបន្តសកម្មភាពសាងសង់ឡើងវិញ ដែលបង្កការព្រួយបារម្ភពីសំណាក់សាធារណជន និងអ្នកជំនាញ។

តាមច្បាប់ស្តីពីសំណង់ ឆ្នាំ២០១៩ និងអនុក្រឹត្យលេខ ២២៤ ឆ្នាំ២០២០ ស្តីពីលិខិតអនុញ្ញាតសាងសង់ គ្រប់សំណង់ត្រូវទទួលបានការអនុញ្ញាតជាមុន មុនចាប់ផ្តើមសាងសង់។ ការបំពានអាចនាំឲ្យផ្អាកការដ្ឋាន ពិន័យ ឬចាត់វិធានការតាមផ្លូវច្បាប់។

មហាជនបានលើកឡើងថា សកម្មភាពបន្តសាងសង់ ខណៈពេលមិនទាន់មានលិខិតអនុញ្ញាត និងធ្លាប់ត្រូវបានផ្អាករួចមកហើយ អាចត្រូវបានពិនិត្យថា ជាការមិនគោរពនីតិវិធីច្បាប់ និងអាចប៉ះពាល់ដល់សុវត្ថិភាពសំណង់ និងសហគមន៍ជុំវិញ។

សាធារណជនបានលើកឡើងថា អាជ្ញាធរគួរតែពង្រឹងការត្រួតពិនិត្យ និងអនុវត្តច្បាប់ឲ្យមានប្រសិទ្ធភាព និងតម្លាភាពបន្ថែម ដើម្បីធានាថា ការអភិវឌ្ឍសំណង់កើតមានក្នុងក្របខណ្ឌច្បាប់ និងមានសុវត្ថិភាពជាអាទិភាព៕