Breaking News: ACU បញ្ជូនមន្ត្រីជាន់ខ្ពស់ ២រូប និងជនពាក់ព័ន្ធ ២នាក់ទៀត ទៅតុលាការ ពាក់ព័ន្ធសង្ស័យស៊ីសំណូក និងសម្អាតប្រាក់ពីក្រុម Online Scam

(ភ្នំពេញ)៖ អង្គភាពប្រឆាំងអំពើពុករលួយ (ACU) នឹងបញ្ជូនមន្ត្រីជាន់ខ្ពស់ ២រូប រួមទាំងជនពាក់ព័ន្ធ ២នាក់ទៀត ទៅកាន់តុលាការ នៅរសៀលថ្ងៃទី២២ ខែមេសា ឆ្នាំ២០២៦នេះ ពាក់ព័ន្ធនឹងករណីសង្ស័យស៊ីសំណូក និងសម្អាតប្រាក់ ដែលមានទំនាក់ទំនងជាមួយក្រុមប្រតិបត្តិការ Online Scam។

ការបញ្ជាក់នេះត្រូវបានធ្វើឡើងដោយ លោកទេសរដ្ឋមន្រ្តី ឱម យ៉ិនទៀង ប្រធានអង្គភាពប្រឆាំងអំពើពុករលួយ ដែលបានឲ្យដឹងថា ជនសង្ស័យដែលត្រូវបញ្ជូនទៅតុលាការរួមមាន ឧត្តមសេនីយ៍ឯក អ៊ុក ហៃសីឡា អគ្គនាយករងអន្តោរប្រវេសន៍ និង ឧត្តមសេនីយ៍ទោ សរ សំណាង ស្នងការរងនគរបាលរាជធានីភ្នំពេញ ព្រមទាំងជនពាក់ព័ន្ធ ២នាក់ទៀត។

ប្រភពដដែលបន្តថា ជនពាក់ព័ន្ធបន្ថែមទាំងពីររូប គឺអ្នកស្រី អស កូ ពិសី ដែលជាភរិយារបស់លោក សរ សំណាង និងឈ្មោះ យ៉ាត កុសល ដែលត្រូវបានសង្ស័យថា មានជាប់ពាក់ព័ន្ធក្នុងសកម្មភាពទទួលសំណូក និងសម្អាតប្រាក់ពីបណ្តាញឆបោកតាមអនឡាញ។

ការចាប់ខ្លួនមន្ត្រីនគរបាលជាន់ខ្ពស់ទាំងនេះ ត្រូវបានអនុវត្តជាបន្តបន្ទាប់ចាប់ពីថ្ងៃទី១៩ ខែមេសា ឆ្នាំ២០២៦ ខណៈដែលអង្គភាពប្រឆាំងអំពើពុករលួយបានបើកប្រតិបត្តិការស៊ើបអង្កេតរយៈពេលប្រមាណ ២០ថ្ងៃមកហើយ។

លោកទេសរដ្ឋមន្រ្តី ឱម យ៉ិនទៀង បញ្ជាក់បន្ថែមថា ព័ត៌មានលម្អិតពាក់ព័ន្ធនឹងសំណុំរឿង នឹងត្រូវបង្ហាញជាសាធារណៈ បន្ទាប់ពីការបញ្ជូនជនសង្ស័យទាំង៤នាក់ទៅកាន់តុលាការបានបញ្ចប់តាមនីតិវិធី។

មហាជនបានលើកឡើងថា ករណីនេះបង្ហាញពីការបន្តអនុវត្តច្បាប់ដោយមិនលើកលែងចំពោះមន្ត្រីមានតួនាទីខ្ពស់ និងជាសញ្ញាវិជ្ជមានមួយក្នុងការពង្រឹងភាពត្រឹមត្រូវ និងទំនួលខុសត្រូវក្នុងស្ថាប័នសាធារណៈ។ ទោះជាយ៉ាងណា សាធារណជននៅតែរង់ចាំការបង្ហាញភស្តុតាង និងដំណើរការតុលាការដោយតម្លាភាព ដើម្បីធានាថាការអនុវត្តច្បាប់មានសុចរិតភាព និងយុត្តិធម៌ពិតប្រាកដ៕