ស្នងការនគរបាលខេត្តព្រៃវែង ជំរុញការពង្រឹងសន្តិសុខសង្គម និងបម្រើសេវាសាធារណៈឲ្យកាន់តែប្រសើរ

(ព្រៃវែង)៖ លោកឧត្តមសេនីយ៍ទោ ឈឿន ប៊ុនឆន ស្នងការ នៃស្នងការដ្ឋាននគរបាលខេត្តព្រៃវែង នារសៀលថ្ងៃពុធ ទី១ ខែមេសា ឆ្នាំ២០២៦ បានអញ្ជើញជាអធិបតីក្នុងកិច្ចប្រជុំបូកសរុបសភាពការណ៍ និងលទ្ធផលកិច្ចប្រតិបត្តិការ ក្នុងការរក្សាសន្តិសុខសណ្ដាប់ធ្នាប់សាធារណៈ និងសុវត្ថិភាពសង្គម ប្រចាំខែកុម្ភៈ និងខែមីនា ព្រមទាំងដាក់ទិសដៅអនុវត្តបន្តសម្រាប់ខែមេសា ឆ្នាំ២០២៦។

កិច្ចប្រជុំនេះ មានការចូលរួមពីថ្នាក់ដឹកនាំ និងមន្ត្រីនគរបាលគ្រប់លំដាប់ថ្នាក់ រួមមាន ស្នងការរង ប្រធានផែន នាយការិយាល័យជំនាញ អធិការនគរបាលក្រុង-ស្រុក មេបញ្ជាការវរនគរបាលការពារព្រំដែនគោក និងមន្ត្រីពាក់ព័ន្ធជាច្រើនរូប ដែលបង្ហាញពីការសហការយ៉ាងរឹងមាំក្នុងការអនុវត្តភារកិច្ចការពារសន្តិសុខ និងសុវត្ថិភាពសង្គមក្នុងមូលដ្ឋាន។

ក្នុងឱកាសនោះ លោកឧត្តមសេនីយ៍ទោ ស្នងការ បានវាយតម្លៃខ្ពស់ចំពោះលទ្ធផលការងាររបស់មន្ត្រីនគរបាលគ្រប់ផ្នែក ដែលបានខិតខំអនុវត្តភារកិច្ចយ៉ាងសកម្ម ក្នុងការទប់ស្កាត់ និងបង្ក្រាបបទល្មើសនានា ដូចជា បញ្ហាក្មេងទំនើង ចោរកម្ម និងបទល្មើសគ្រឿងញៀន ព្រមទាំងការអនុវត្តយ៉ាងមានប្រសិទ្ធភាពនូវគោលនយោបាយ «ភូមិ-ឃុំ-សង្កាត់មានសុវត្ថិភាព» របស់រាជរដ្ឋាភិបាល។

ជាមួយគ្នានេះ លោកស្នងការ ក៏បានដាក់ទិសដៅសំខាន់ៗ សម្រាប់ការអនុវត្តបន្ត ដោយផ្តោតលើការពង្រឹងសមត្ថភាពអង្គភាព ការរៀបចំផែនការប្រតិបត្តិការយ៉ាងច្បាស់លាស់ និងការកែលម្អគុណភាពសេវាសាធារណៈ ដើម្បីបម្រើប្រជាពលរដ្ឋឲ្យបានកាន់តែមានប្រសិទ្ធភាព និងទាន់ពេលវេលា។

លើសពីនេះ លោកឧត្តមសេនីយ៍ទោ ក៏បានណែនាំ និងក្រើនរំលឹកដល់មន្ត្រីជំនាញទាំងអស់ ឲ្យបង្កើនការយកចិត្តទុកដាក់លើការកសាងសំណុំរឿង និងការពង្រឹងសន្តិសុខសណ្ដាប់ធ្នាប់ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ដែលកំពុងខិតជិតមកដល់ ដើម្បីធានាថាប្រជាពលរដ្ឋអាចអបអរសាទរបុណ្យបានយ៉ាងសុខសាន្ត។

ជាពិសេស លោកស្នងការ បានជំរុញឲ្យមន្ត្រីជំនាញបន្តចុះដល់មូលដ្ឋាន ដើម្បីផ្តល់សេវាធ្វើអត្តសញ្ញាណប័ណ្ណ សៀវភៅគ្រួសារ និងឯកសារសំខាន់ៗផ្សេងៗជូនប្រជាពលរដ្ឋឲ្យបានទាន់ពេលវេលា និងដល់ខ្នងផ្ទះ។ ជាមួយគ្នានេះ ក៏បានផ្តល់ការកោតសរសើរ និងរង្វាន់លើកទឹកចិត្តដល់មន្ត្រីដែលបានបំពេញការងារយ៉ាងខ្ជាប់ខ្ជួន និងមានប្រសិទ្ធភាព។

គួរបញ្ជាក់ថា កិច្ចប្រជុំនេះត្រូវបានរៀបចំឡើងនៅសាលប្រជុំធំទួលបារាយណ៍អណ្ដែត នៃស្នងការដ្ឋាននគរបាលខេត្តព្រៃវែង ក្នុងបរិយាកាសអនុវត្តការងារយ៉ាងមានវិន័យ និងទទួលខុសត្រូវខ្ពស់៕