ដុតកម្ទេចក្រណាត់ក្នុងឡឥដ្ឋ! មន្ទីរបរិស្ថានចុះពិនិត្យភ្លាម និងដាក់វិធានការតឹងរ៉ឹង

(ព្រៃវែង)៖ បន្ទាប់ពីទទួលបានព័ត៌មានរាយការណ៍ពីអ្នកសារព័ត៌មាន នៅរសៀលថ្ងៃទី១៨ ខែមីនា ឆ្នាំ២០២៦ អំពីករណីមានការដុតកម្ទេចក្រណាត់នៅក្នុងសិប្បកម្មឡឥដ្ឋមួយកន្លែង ស្ថិតនៅឃុំកំពង់សឹង ស្រុកព្រះស្តេច មន្ទីរបរិស្ថានខេត្តព្រៃវែង មិនបានរំពឹងយូរឡើយ បានចាត់ក្រុមការងារចុះពិនិត្យភ្លាមៗ។

ក្រុមការងារ ដឹកនាំដោយលោក ទុយ សារឿន អនុប្រធានមន្ទីរទទួលបន្ទុក និងមន្រ្តីជំនាញ បានចុះដល់ទីតាំងជាក់ស្តែង ហើយរកឃើញថា សិប្បកម្មឡឥដ្ឋឈ្មោះ «ជាទឹង ឡឥដ្ឋព្រៃខ្លា» ពិតជាបានប្រើប្រាស់អុស និងដុតកម្ទេចក្រណាត់ ក្នុងដំណើរការផលិតឥដ្ឋមែន។

បញ្ហានេះ ត្រូវបានមហាជនយល់ថា អាចបង្កផលប៉ះពាល់ដល់បរិស្ថាន និងសុខភាពប្រជាពលរដ្ឋជុំវិញ តាមរយៈផ្សែង និងសារធាតុពុលដែលបញ្ចេញពីការដុតសំណល់មិនសមស្រប។

ជាបន្ទាន់ ក្រុមការងារបានអនុវត្តវិធានការច្បាប់ និងដាក់លក្ខខណ្ឌឱ្យម្ចាស់អាជីវកម្មអនុវត្តយ៉ាងតឹងរ៉ឹង រួមមាន៖ ១.ហាមដុតកម្ទេចក្រណាត់បន្តទៀត។២.តម្រូវឱ្យដឹកសំណល់ក្រណាត់នៅសល់ ចេញទៅរកទីតាំងគ្រប់គ្រងឱ្យបានត្រឹមត្រូវ។៣.ត្រូវគ្រប់គ្រងសំណល់រឹង និងសំណល់រាវតាមបទដ្ឋានបរិស្ថាន។៤.ចូលរួមសម្អាតបរិវេណអាជីវកម្មឱ្យបានស្អាត និងមានអនាម័យ។

ទោះបីជាជំហានអនុវត្តរបស់មន្ទីរបរិស្ថានមានភាពរហ័សរហួនក៏ដោយ ក៏មហាជននៅតែសួរថា តើហេតុអ្វីបានជាសកម្មភាពដុតសំណល់បែបនេះ អាចកើតមានបានយូរមកហើយ មុនពេលមានការចុះអន្តរាគមន៍?

ប្រជាពលរដ្ឋសង្ឃឹមថា អាជ្ញាធរពាក់ព័ន្ធនឹងបន្តត្រួតពិនិត្យជាបន្តបន្ទាប់ និងអនុវត្តច្បាប់ឱ្យមានប្រសិទ្ធភាព ដើម្បីការពារបរិស្ថាន និងសុខភាពសាធារណៈឱ្យបានយូរអង្វែង មិនមែនត្រឹមតែសកម្មភាព “ចុះពិនិត្យតាមព្រឹត្តិការណ៍” ប៉ុណ្ណោះទេ៕