ស្នងការដ្ឋាននគរបាលខេត្តបន្ទាយមានជ័យបំភ្លឺជុំវិញករណីហិង្សាកាលពីយប់ថ្ងៃទី៧ ខែកុម្ភៈ ឆ្នាំ២០២៦ថា សមត្ថកិច្ចជំនាញបានខិតខំដោះស្រាយផ្សះផ្សាភាគីទាំងពីរដើម្បីបញ្ចប់ជម្លោះ ក្រោមការសម្របសម្រួលពីឯកឧត្តមព្រះរាជអាជ្ញា

(បន្ទាយមានជ័យ)៖ កាលពីពេលថ្មីៗនេះ មានគណនីហ្វេសប៊ុកឈ្មោះ៖ Rotha Bmc បង្ហោះតាមប្រព័ន្ធបណ្តាញទំនាក់ទំនងសង្គមនូវព័ត៌មានពាក់ព័ន្ធនឹងករណីហិង្សាកាលពីយប់ថ្ងៃទី៧ ខែកុម្ភៈ ឆ្នាំ២០២៦ វេលាម៉ោង២០.២០នាទី មានដើមបណ្ដឹងឈ្មោះ ស និមល ភេទស្រី អាយុ៣៦ឆ្នាំ រស់នៅភូមិ៣ សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ និងចុងបណ្តឹង ឈ្មោះ សៀក ស្រីរ៉េត ភេទស្រី អាយុ៣៩ឆ្នាំ រស់នៅភូមិ៤ សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ។ នេះបើតាមការបំភ្លឺរបស់អ្នកនាំពាក្យនៃស្នងការដ្ឋាននគរបាលខេត្តបន្ទាយមានជ័យដែលអង្គភាព The Mirror News ទទួលបាននៅថ្ងៃទី១២ ខែកុម្ភៈ ឆ្នាំ២០២៦។

ក្រោយពីទទួលព័ត៌មាន និងបានទទួលបណ្តឹងនៅយប់ថ្ងៃទី៧ ខែកុម្ភៈ ឆ្នាំ២០២៦ កម្លាំងសមត្ថកិច្ចបានទៅចុះដល់កន្លែងកើតហេតុ និងសាកសួរសាក្សីនៅជិតកន្លែងនោះថា មានករណីឈ្លោះប្រកែកគ្នារវាងឈ្មោះ ស និមល ភេទស្រី និងឈ្មោះ៖ សៀក ស្រីរ៉េត ភេទស្រី ប្រាកដមែន (តូបនៅជាប់គ្នា) រួចបានអញ្ជើញឈ្មោះ សៀក ស្រីរ៉េត ភេទស្រី មកស្នងការដ្ឋានដើម្បីធ្វើការបំភ្លឺជុំវិញរឿងហេតុ ដោយសារជើងមានហូរឈាម ជនរងគ្រោះឈ្មោះ ស និមល ភេទស្រី បានទៅមន្ទីរពេទ្យស្រុកមង្គលបូរីដើម្បីពិនិត្យ និងព្យាបាលរបួស ។ ឈ្មោះ សៀក ស្រីរ៉េត ភេទស្រី ឆ្លើយថាគ្រាន់តែឈ្លោះប្រកែកគ្នា ខ្លួនរុញដើម្បីទប់អោយជននោះចេញតែជននោះដួល ដោយមិនទាន់មាន សាក្សីបញ្ជាក់បន្ថែម កម្លាំងសមត្ថកិច្ចបានអោយធានាយកឈ្មោះ សៀក ស្រីរ៉េត ភេទស្រី ទៅផ្ទះវិញសិន រង់ចាំ ពេលព្រឹកឡើងមកបង្ហាញខ្លួន និងអោយនាំយកសាក្សីជាមួយផង។ថ្ងៃទី៨ ថ្ងៃទី៩ ខែកុម្ភៈ ឆ្នាំ២០២៦ បានបំភ្លឺ សាក្សីចំនួន៣នាក់។ ព្រឹកថ្ងៃទី៨ ខែកុម្ភៈ ឆ្នាំ២០២៦ ភាគីទាំងពីរបាននិយាយសម្របសម្រួលគ្នាតែមិនត្រូវគ្នាដោយ ម្នាក់ៗប្រកែកយកត្រូវរៀងៗខ្លួន មន្ត្រីនគរបាលយុត្តិធម៌បានសុំគោលការណ៍ដឹកនាំសម្របសម្រួលពីឯកឧត្តម ព្រះរាជអាជ្ញា ដោយអោយទុកពេលអោយភាគីទាំងពីរសម្របសម្រួលគ្នាទៀតនៅតែមិនព្រម និងប្រកែករៀងៗ ខ្លួន ហើយជនរងគ្រោះឈ្មោះ ស និមល ភេទស្រី បានប្រេះឆ្អឹងជើងឆ្វេង (ជើងទើបតែដកដែកចេញបាន២ថ្ងៃ) កំពុងសម្រាកព្យាបាលនៅឡើយ រហូតនៅម៉ោង១៤.០៥នាទីថ្ងៃទី៨ ខែកុម្ភៈ ឆ្នាំ២០២៦ តាមបញ្ជារបស់ឯកឧត្តម ព្រះរាជអាជ្ញា អោយធ្វើការឃាត់ខ្លួនឈ្មោះ សៀក ស្រីរ៉េត ភេទស្រី ជាបណ្តោះអាសន្ន បញ្ជូនទៅតុលាការថ្ងៃទី៩ ខែកុម្ភៈ ឆ្នាំ២០២៦ ចាត់ការបន្តតាមនីតិវិធី នៅដំណាក់កាលតុលាការក៏មានមេធាវីការពារអោយឈ្មោះ សៀក ស្រីរ៉េត ភេទស្រី រួចបានសម្រេចឃុំខ្លួនបណ្តោះអាសន្នថ្ងៃទី១១ ខែកុម្ភៈ ឆ្នាំ២០២៦ ។

គួរបញ្ជាក់ថា មានសាក្សី១នាក់បំភ្លឺបញ្ជាក់ថា ឃើញឈ្មោះ ស និមល ភេទស្រី ដួលលើដី និងត្រូវគេ(សៀក ស្រីរ៉េត)យកជើងជាន់ជើងកន្លែងរបួស ហើយបច្ចុប្បន្នឈ្មោះ ស និមល ភេទស្រី បានចេញពីពេទ្យរុស្សីទៅសម្រាក ព្យាបាលនៅមន្ទីរពេទ្យនៅប្រទេសវៀតណាមបន្តទៀត។

អ្នកនាំពាក្យនៃស្នងការដ្ឋាននគរបាលខេត្តបន្ទាយមានជ័យ សូមបញ្ជាក់ថា ករណីនេះសមត្ថកិច្ចជំនាញបាន ខិតខំដោះស្រាយផ្សះផ្សាភាគីទាំងពីរដើម្បីបញ្ចប់ជម្លោះក្រោមការសម្របសម្រួលពីឯកឧត្តមព្រះរាជអាជ្ញា ហើយ សមត្ថកិច្ចមន្ត្រីនគរបាលយុត្តិធម៌យើង អនុវត្តស្របតាមក្រមនីតិវិធីព្រហ្មទណ្ឌ៕