លោកអធិការ យី វណ្ណដា ណែនាំឱ្យកម្លាំងក្រោមឱវាទត្រូវបន្តពង្រឹងលើកិច្ចការងារការពារថ្នាក់ដឹកនាំជាតិ , ការងារសន្តិសុខសុវត្ថិភាព និងកិច្ចការងារភូមិសង្កាត់មានសុវត្ថិភាព!

(កណ្ដាល)៖ ដោយអនុវត្តតាមគោលការណ៍របស់លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល នាព្រឹកថ្ងៃទី២ ខែកុម្ភៈ ឆ្នាំ២០២៦ លោកវរសេនីយ៍ឯក យី វណ្ណដា អធិការនគរបាលក្រុងតាខ្មៅបានដឹកនាំកិច្ចប្រជុំពិនិត្យវឌ្ឍនភាពការងារប្រចាំខែមករា ឆ្នាំ២០២៦ និងលើកទិសដៅការងារបន្តសម្រាប់ខែកុម្ភះឆ្នាំ២០២៦ ដោយមានការចូលរួមពីលោក-លោកស្រីអធិការរង លោកនាយផ្នែក លោកនាយប៉ុស្តិ៍ នាយរងផ្នែក នាយរងប៉ុស្ដិ៍ និងមន្ត្រីពាក់ព័ន្ធទាំងអស់ផងដែរ។

លោកអធិការបានឲ្យកម្លាំងផ្នែកជំនាញ និងកម្លាំងប៉ុស្ដិ៍នគរបាលរដ្ឋបាលទាំងអស់ ត្រូវពង្រឹងលើកិច្ចការងារការពារថ្នាក់ដឹកនាំជាតិ, ការងារសន្តិសុខសុវត្ថិភាព និងរបៀបរៀបរយសាធារណៈ, កិច្ចការងារភូមិសង្កាត់មានសុវត្ថិភាព ការងារបង្ក្រាបក្រុមក្មេងទំនើង គ្រឿងញៀន និងបទល្មើសផ្សេងៗនៅក្នុងមូលដ្ឋាន ក៏ដូចជាការចុះដោះស្រាយការកកស្ទះចរាចរណ៍ តាមបណ្តាផ្លូវមានបញ្ហាប្រឈមនានា ជូនបងប្អូនប្រជាពលរដ្ឋ។

លោកអធិការក៏បានសង្កត់ធ្ងន់ឱ្យផ្នែកជំនាញ និងលោកនាយប៉ុស្ដិ៍ត្រូវបន្តយកចិត្តការផ្តល់សេវាផ្សេងៗ ការអន្តរាគមន៍ផ្សេងៗជូនដល់ប្រជាពលរដ្ឋក្នុងមូលដ្ឋាន៕