តុលាការបានសម្រេចកាត់ទោសជនដៃដល់ម្នាក់ឱ្យជាប់គុកអស់មួយជីវិត ចំណែកគូកន២នាក់ទៀត ឱ្យដាក់គុក២០ឆ្នាំ ពាក់ព័ន្ទសំណុំរឿងរំលោភសម្លាប់ក្មេងស្រីវ័យ ១៥ឆ្នាំ នៅក្នុងបន្ទប់ទឹកសាលាបឋមសិក្សាវត្តគ្រួស

(ភ្នំពេញ)៖ ប្រធានក្រុមប្រឹក្សារចៅក្រមជំនុំជម្រះ លោកស្រី អ៉ីវ កន្និកា និងមានលោក ថោង ផល្លារង្សី លោក ឈឹន មករា ជាចៅក្រមប្រេក្សារ អមដោយតំណាងអយ្យការ លោកស្រី សាយ ធីតា នៅរសៀលថ្ងៃទី២៥ ខែធ្នូ ឆ្នាំ២០២៥នេះ បើកសវនាការប្រកាសសាលក្រមលើសំណុំរឿង ជនដៃដល់ចំនួន ៣នាក់ ដែលបានរំលោភសម្លាប់ក្មេងស្រី វ័យ ១៥ឆ្នាំ កាលពីថ្ងៃទី២១ ខែឧសភា ឆ្នាំ២០២៥ នៅចំណុចក្នុងបន្ទប់ទឹកសាលាបឋមសិក្សាវត្តគ្រួស ស្ថិតនៅក្នុងវត្ដជេសដ្ឋាឧត្តម ហៅវត្តគ្រួស ផ្លូវជាតិលេខ៥ ភូមិគ្រួស សង្កាត់សំរោង ខណ្ឌព្រែកព្នៅ រាជធានីភ្នំពេញ។

សម្រាប់សំណុំរឿងរំលោភសម្លាប់ក្មេងស្រីវ័យ ១៥ឆ្នាំ តុលាការ បានសម្រេចឃុំខ្លួន ឈ្មោះ សុខ ច័ន្ទសុវណ្ណសេង ភេទប្រុស អាយុ ១៨ឆ្នាំ ដែលជាជនដៃដល់ដាក់គុកអស់ ១ជីវិត, ឈ្មោះ ទៀន ផារ៉ែត ភេទប្រុស អាយុ១៥ឆ្នាំ ដាក់គុក ២០ឆ្នាំ និងឈ្មោះ បូ ឧត្តម ភេទប្រុស អាយុ ១៦ឆ្នាំ ដាក់គុក ២០ឆ្នាំ ។
សូមរម្លឹកថា ក្នុងកំឡុងពេលសវនាការសួរដេញដោលចំពោះមុខជនត្រូវចោទ មេធាវីមកពីគណ:មេធាវីដែលការពារជនក្រីក្រ ដោយមិនយកកម្រៃសេវាប្រចាំតុលាការ លោក ឌុន វិបុល ជាអ្នកការពារឲ្យជនត្រូវចោទទាំង ៣នាក់បានបញ្ជាក់ថា អំពីអាយុពួកគេ គឺនៅជាអនីតិជននៅឡើយហើយពួកគេខ្វះការអប់រំ ខ្វះកាសិក្សា មិនបានរៀនសូត្រ ក៏ព្រោះតែឪពុកម្តាយ អាណាព្យាបាលទីទាល់ក្រលំបាក ថែមទាំងបានសំពាធផ្សេងនៃបរិយាកាសជុំវិលខ្លួនទៀតផង មានស្រា គ្រឿងញៀនជាដើម។

ដោយមើលជើញក្នុងមូលហេតុនេះទើបលោកមេធាវី ឌុន វិបុល បានធ្វើសេក្តីសន្និដ្ឋានសុំបន្ធូបន្ថយទោសដល់កូនក្តីរបស់លោក ហើយនៅទីបញ្ចប់ ចៅក្រមក្រមក្រុមប្រឹក្សាជំនុំជម្រះ បានសម្រេចេ គឺអនីតិជនទាំង២នាក់ ក្នុងរឿងនេះដាក់ទោសកំណត់ត្រឹមម្នាក់ៗ ២០ឆ្នាំប៉ុណ្ណោះ។

ពាក់ព័ន្ធករណីនេះ ដោយអនុវត្តតាមបទបញ្ជាផ្ទាល់របស់លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញកម្លាំងជំនាញអធិការដ្ឋាននគរបាលខណ្ឌព្រែកព្នៅ សហការជាមួយកម្លាំងជំនាញផែនការងារនគរបាលព្រហ្មទណ្ឌនៃស្នងការដ្ឋាននគរបាលរាជធានីភ្នំពេញ បានបំបែកសំណុំរឿង ករណី អំពើឃាតកម្មដោយមានទារុណកម្ម អំពើឃោរឃៅ ឬអំពើរំលោភសេពសន្ថវៈ (យកថ្នាំងងុយដេកដាក់ក្នុងភេសជ្ជៈឲ្យជនរងគ្រោះផឹក ហើយរំលោភសម្លាប់ ប្លន់ យកទ្រព្យសម្បត្តិ ជនរងគ្រោះ) បង្រ្កាបឃាត់ខ្លួនជនសង្ស័យចំនួន០៣នាក់ នៅថ្ងៃទី២១ ខែឧសភា ឆ្នាំ២០២៥ វេលាម៉ោង១២៖៣០នាទីថ្ងៃត្រង់ នៅចំណុចក្នុងបន្ទប់ទឹកសាលាបឋមសិក្សាវត្តគ្រួស ស្ថិតនៅក្នុងវត្ដជេសដ្ឋាឧត្តម ហៅវត្តគ្រួស ផ្លូវជាតិលេខ៥ ភូមិគ្រួស សង្កាត់សំរោង ខណ្ឌព្រែកព្នៅ រាជធានីភ្នំពេញ កាលពីវេលាម៉ោង០១៖ ២៧នាទីយប់អធ្រាត្រ ឈានចូលថ្ងៃទី២១ ខែឧសភា ឆ្នាំ២០២៥៕