ស្នងការដ្ឋាននគរបាលខេត្តកណ្តាលប្រកាសថ្កោលទោសចំពោះសង្គ្រាមឈ្លានពានរបស់ថៃមកលើដែនអធិបតេយ្យនៃព្រះរាជាណាចក្រកម្ពុជា

(កណ្ដាល)៖ ស្នងការដ្ឋាននគរបាលខេត្តកណ្តាលសូមប្រកាសថ្កោលទោសយ៉ាងធ្ងន់ធ្ងរបំផុត ចំពោះទង្វើដ៏អមនុស្សធម៌ និងសាហាវយង់ឃ្នងរបស់យោធាថៃ នៅក្នុងអំពើឈ្លានពានមកលើដែនអធិបតេយ្យនៃព្រះរាជាណាចក្រកម្ពុជា ដោយបានបន្តបាញ់ប្រហារមកលើប្រជាជនស៊ីវិល ស្លូតត្រង់នៅតាមបណ្តាខេត្តជាប់ព្រំដែនកម្ពុជា-ថៃ ចាប់តាំង ពីរសៀលថ្ងៃទី ០៧ ខែធ្នូ រហូតដល់ថ្ងៃទី២៥ ខែធ្នូ ឆ្នាំ២០២៥ នេះ និងដោយបានប្រើប្រាស់គ្រឿងយុទ្ធោបករណ៍ ធុនធ្ងន់ច្រើនប្រភេទផ្ទុយនឹងច្បាប់អន្តរជាតិ ដូចជា៖ យន្តហោះចម្បាំង, នាវាចម្បាំង, ផ្សែងពុល និងគ្រាប់បែក- ចង្កោម ជាដើម បាញ់ស្រោចចូលក្នុងដែនអធិបតេយ្យរបស់កម្ពុជា យ៉ាងកំរោលមិនរើសគោលដៅ ធ្វើឱ្យប្រជាជន ស៊ីវិលកម្ពុជាមួយចំនួនស្លាប់ និងរងរបួស ព្រមទាំងខូចខាតផ្ទះសម្បែង សាលារៀន មន្ទីរពេទ្យ វត្តអារាម ផ្លូវថ្នល់ ស្ពាន ប្រាសាទបុរាណជាច្រើនកន្លែង។ នេះបើយោងតាមញត្តិថ្កោលទោសរបស់ស្នងការដ្ឋាននគរបាលខេត្តកណ្ដាលដែលបណ្ដាញសារព័ត៌មាន The Mirror News ទទួលបាននៅថ្ងៃទី២៥ ខែធ្នូ ឆ្នាំ២០២៥នេះ។

ស្នងការដ្នាននគរបាលបញ្ជាក់ថា ភាគីថៃតែងតែបានបង្កើតលេស ម្តងហើយម្តងទៀត និងញុះញង់ ដើម្បីរំលោភបំពានលើបទឈប់បាញ់ និងសេចក្តីថ្លែងការណ៍រួមទីក្រុងកូឡាឡាំពួ ដែលមាន ឯកឧត្តម Donald J. Trump ប្រធានាធិបតីសហរដ្ឋ- អាម៉េរិក និង ឯកឧត្តម Anwar Ibrahim នាយករដ្ឋមន្ត្រីម៉ាឡេស៊ី និងជាប្រធានប្តូរវេនអាស៊ានធ្វើជាសាក្សី កាលពី ថ្ងៃទី២៦ ខែតុលា ឆ្នាំ២០២៥ នៅប្រទេសម៉ាឡេស៊ី ជាពិសេសថ្មីៗនេះ ភាគីថៃបានទាត់ចោលសំណើ បទឈប់បាញ់ ដែលស្នើដោយ ឯកឧត្តម នាយករដ្ឋមន្ត្រីម៉ាឡេស៊ីចំនួន០៣លើក និង ឯកឧត្តម ប្រធានាធិបតី សហរដ្ឋអាម៉េរិក ចំនួន០១លើក។

ស្នងការដ្ឋាននគរបាលខេត្តកណ្តាល ក៏ដូចជាអង្គភាពនិងស្ថាប័នផ្សេងៗទៀតទាំងរបស់រដ្ឋ និងឯកជន សូមអំពាវនាវដល់សហគមន៍អន្តរជាតិ ថ្កោលទោសយ៉ាងធ្ងន់ធ្ងរចំពោះការរំលោភបំពាន សេចក្តីថ្លែងការណ៍រួម ទីក្រុងកូឡាឡាំពួ និងសកម្មភាពដ៏ឃោរឃៅអមនុស្សធម៌របស់ភាគីថៃ ជាមួយគ្នានេះភាគីថៃត្រូវតែទទួលខុសត្រូវ ទាំងស្រុង ចំពោះការរំលោភបំពានទាំងនេះមកលើអធិបតេយ្យកម្ពុជា ដែលក៏ជាការគំរាមកំហែង ដល់សន្តិភាព និងស្ថិរភាពនៅក្នុងតំបន់។

ស្នងការដ្ឋាននគរបាលខេត្តកណ្តាល សូមអំពាវនាវឱ្យភាគីថៃបញ្ឈប់ជាបន្ទាន់រាល់អរិភាព ហើយងាក មកគោរពកិច្ចព្រមព្រៀង បទឈប់បាញ់ សេចក្តីថ្លែងការណ៍រួមទីក្រុងកូឡាឡាំពួ និងកាតព្វកិច្ចទាំងឡាយនៅ ក្រោមច្បាប់អន្តរជាតិ ឱ្យបានម៉ឺងម៉ាត់ ស្មោះត្រង់ ព្រមទាំងប្រកាន់ខ្ជាប់នូវការដោះស្រាយជម្លោះដោយសន្តិវិធី សំដៅស្វែងរកដំណោះស្រាយ មួយប្រកបដោយយុត្តិធម៌ ត្រឹមត្រូវ និងយូរអង្វែងសម្រាប់ប្រជាជាតិទាំងពីរ៕