មេប៉ូលិសខេត្តកណ្ដាល លោកឧត្ដមសេនីយ៍ ឈឿន សុចិត្ត ដាក់បទបញ្ជាយ៉ាងម៉ឺងម៉ាត់ឲ្យបង្រ្កាបក្រុមក្មេងទំនើង មិនឲ្យកើតមានក្នុងមូលដ្ឋានជាដាច់ខាត

(កណ្ដាល)៖ ដោយអនុវត្តតាមបទបញ្ជារបស់លោកនាយឧត្តមសេនីយ៍ ស ថេត អគ្គស្នងការនគរបាលជាតិ, លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្ដសល បានដាក់ចេញវិធានការម៉ឺងម៉ាត់ឲ្យនគរបាលទូទាំងខេត្តកណ្ដាល បង្ក្រានក្រុមក្មេងទំនើង មិនឲ្យកើតមានឡើងជាដាច់ខាតក្នុងមូលដ្ឋាន។

លោកឧត្តមសេនីយ៍ទោ ឈឿន សុចិត្ត បានស្នើឲ្យឪពុកម្តាយ ឬអាណាព្យាបាល សូមធ្វើការណែនាំ អប់រំកូនរបស់ខ្លួនផងដែរ ជៀសវាងដើរខុសគន្លង និងឈានទៅប្រព្រឹត្តបទល្មើស។

លោកស្នងការបានបញ្ជាក់ទៀតថា ក្នុងករណីប្រជាពលរដ្ឋទទួលបានព័ត៌មាន ឬដំណឹងពាក់ព័ន្ធក្មេងទំនើង ធ្វើសកម្មភាពផ្សេងៗ សូមរាយការណ៍មកទូរស័ព្ទប្រចាំបញ្ជាស្នងការដ្ឋាននគរបាលខេត្ដ ដែលមានលេខ (0977780001)។ លោកថា រាល់ប្រជាពលរដ្ឋរាយការណ៍ គឺធានាលាក់ការសម្ងាត់ជូន ដើម្បីបំបាត់ក្មេងទំនើងនៅក្នុងមូលដ្ឋាន។

ការដាក់បទបញ្ជាម៉ឺងម៉ាត់របស់លោកឧត្តមសេនីយ៍ទោ ឈឿន សុចិត្ត ធ្វើឡើងបន្ទាប់ពីមួយរយៈពេលចុងក្រោយនេះ ករណីក្មេងទំនើងបង្កហិង្សាហាក់កម្រើកឡើងវិញ។ ជាក់ប៉ុន្មានថ្ងៃមុននេះ មានករណីក្មេងទំនើងកាប់ប្រហារគ្នាបានកើតឡើងនៅស្រុកកៀនស្វាយ ខេត្តកណ្ដាល បណ្ដាលឲ្យយុវជនម្នាក់ស្លាប់ និងម្នាក់រងរបួសធ្ងន់ ខណៈជនបង្កត្រូវបានកម្លាំងនគរបាលឃាត់ខ្លួនភ្លាមៗ៕