លោក ប៉ែត សារ៉ាត់ ប្រធានក្រុមការងារ ស.ស.យ.ក វិស័យសាធារណការ និងដឹកជញ្ជូនខេត្តកណ្តាលចេញញត្តិថ្កោលទោសចំពោះការបាញ់ប្រហាររបស់កងកម្លាំងថៃមកលើជនស៊ីវិលស្លូតត្រង់កម្ពុជានៅភូមិព្រៃចាន់ 

(កណ្ដាល)៖ លោក ប៉ែត សារ៉ាត់ ប្រធានក្រុមការងារ ស.ស.យ.ក វិស័យសាធារណការ និងដឹកជញ្ជូនខេត្តកណ្តាល នៅថ្ងៃ ព្រហស្បតិ៍ ទី ១៣ ខែ វិច្ឆិកា ឆ្នាំ ២០២៥ ចេញញត្តិថ្កោលទោសចំពោះការបាញ់ប្រហាររបស់កងកម្លាំងថៃមកលើជនស៊ីវិលស្លូតត្រង់កម្ពុជានៅភូមិព្រៃចាន់ ឃុំអូរបីជាន់ ស្រុកអូជ្រៅ ខេត្តបន្ទាយមានជ័យ កាលពីរសៀលថ្ងៃទី១២ ខែ វិច្ឆិកា ឆ្នាំ ២០២៥ បានបណ្តាលឱ្យជនស៊ីវិលម្នាក់ស្លាប់ និង៣នាក់ទៀតរងរបួស។

យើងខ្ញុំទាំងអស់គ្នាជាថ្នាក់ដឹកនាំ និងសមាជិក សមាជិកា ក្រុមការងារ ស.ស.យ.ក. វិស័យសាធារណការ និង ដឹកជញ្ជូន ខេត្តកណ្តាល សូមសម្តែងនូវការសោកស្តាយជាពន់ពេក និងថ្កោលទោសចំពោះទង្វើដ៏សាហាវឃោរឃៅរបស់ យោធាថៃដែលបានធ្វើការបាញ់ប្រហារដោយគ្មានហេតុផលមកលើជនស៊ីវិលកម្ពុជា នៅភូមិព្រៃចាន់ ឃុំអូរបីជាន់ ស្រុកអូជ្រៅ ខេត្តបន្ទាយមានជ័យ កាលពីរសៀលថ្ងៃទី១២ ខែ វិច្ឆិកា ឆ្នាំ ២០២៥ បានបណ្តាលឱ្យជនស៊ីវិលម្នាក់ស្លាប់ និង៣នាក់ទៀតរងរបួស។ អំពើដ៏ព្រៃផ្សៃដែលយោធាថៃបានធ្វើឡើងនេះ បានបង្ហាញអំពីការរំលោភយ៉ាងធ្ងន់ធ្ងរលើអធិបតេយ្យភាព និងបូរណភាព ទឹកដីរបស់ប្រទេសកម្ពុជា ព្រមទាំងបំពានយ៉ាងគឃ្លីនលើច្បាប់មនុស្សធម៌អន្តរជាតិ គោលការណ៍ជាមូលដ្ឋាននៃធម្មនុញ្ញ អង្គការសហប្រជាជាតិ ធម្មនុញ្ញអាស៊ាន និងសន្ធិសញ្ញាមិត្តភាពនិងសហប្រតិបត្តិការអាស៊ីអាគ្នេយ៍ (TAC) ជាពិសេសបំពាន លើសេចក្តីថ្លែងការណ៍រួមកម្ពុជា-ថៃ នៅទីក្រុងគូឡាឡាំពួ ថ្ងៃទី២៦ ខែតុលា ឆ្នាំ ២០២៥ ដែលមាន ឯកឧត្តម ដូណាល់ ត្រាំ ប្រធានាធិបតីសហរដ្ឋអាមេរិច និង ឯកឧត្តម អាន់វ៉ា អ៊ីប្រាហ៊ីម នាយករដ្ឋមន្ត្រីម៉ាឡេស៊ី និងជាប្រធានប្តូរវេនអាស៊ាន ធ្វើជា សាក្សីយ៉ាងឱឡារិក។

យើងខ្ញុំទាំងអស់គ្នា សូមអំពាវនាវឱ្យភាគីថៃបញ្ឈប់ជាបន្ទាន់នូវការប្រើប្រាស់កម្លាំងមកលើប្រជាពលរដ្ឋស្លូតត្រង់កម្ពុជា ក៏ដូចជាបញ្ឈប់ការប្រើប្រាស់កម្លាំងយោធាក្នុងការដោះស្រាយបញ្ហាព្រំដែនរវាងប្រទេសទាំងពីរ ហើយយើងខ្ញុំក៏សូមអំពាវនាវ ឱ្យសហគមន៍អន្តរជាតិថ្កោលទោសយ៉ាងម៉ឺងម៉ាត់ចំពោះការរំលោភបំពានលើសេចក្តីថ្លែងការរួមកម្ពុជា-ថៃ និងសកម្មភាពខុស ច្បាប់របស់ថៃម្តងហើយម្តងទៀត ដោយទាមទារឱ្យថៃទទួលខុសត្រូវទាំងស្រុងចំពោះការរំលោភបំពានដ៏កំរោលនេះ។ បន្ថែមពីនេះ យើងខ្ញុំសូមគាំទ្រចំពោះចំណាត់ការរបស់រាជរដ្ឋាភិបាលកម្ពុជាដែលបានស្នើឱ្យមានការស៊ើបអង្កេតដោយឯករាជ្យ លើទង្វើរបស់ថៃមកលើប្រជាពលរដ្ឋស្លូតត្រង់កម្ពុជា ដោយមានការចូលរួមពីភាគីបរទេសដែលមានជំនាញ ដើម្បីស្វែងរកការពិត និងផ្តល់យុត្តិធម៌ជូនប្រទេសកម្ពុជា ក៏ដូចជាប្រជាពលរដ្ឋដែលរងគ្រោះដោយសារការបាញ់ប្រហារនេះ។

សាជាថ្មីម្តងទៀត យើងខ្ញុំទាំងអស់គ្នាសូមប្រកាសគាំទ្រយ៉ាងពេញទំហឹងនូការបន្តរក្សាជំហររបស់រាជរដ្ឋាភិបាលកម្ពុជា ដឹកនាំដោយ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ក្នុងការដោះស្រាយបញ្ហាដោយសន្តិវិធី ស្របតាមស្មារតីនៃ សេចក្តីថ្លែងការរួមទីក្រុងគូឡាឡាំពួ ដើម្បីឈានដល់ការបញ្ចប់ជម្លោះ និងកសាងសន្តិភាពរវាងប្រទេសទាំងពីរ កម្ពុជា-ថៃ៕