ស្នងការដ្ឋាននគរបាលខេត្តកណ្តាលថ្កោលទោសចំពោះការបាញ់ប្រហាររបស់ភាគីថៃ មកលើពលរដ្ឋខ្មែរស្លូតត្រង់ បណ្តាលឱ្យស្លាប់ និងរបួសនៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ

(កណ្ដាល)៖ «កាលពីថ្ងៃទី១២ ខែវិច្ឆិកា ឆ្នាំ២០២៥ វេលាម៉ោង ១៥:៥០នាទី កន្លងមកនេះ កងកម្លាំងប្រដាប់អាវុធថៃ បានបើក ការបាញ់ប្រហារមកលើប្រជាពលរដ្ឋកម្ពុជាស្លូតត្រង់ ដែលកំពុងស្នាក់នៅក្នុងជម្រកកៅស៊ូតង់ ស្ថិតក្នុងភូមិ ព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ក្នុងដែនអធិបតេយ្យនៃព្រះរាជាណាចក្រកម្ពុជា បណ្តាលឱ្យ ប្រជាពលរដ្ឋខ្មែរបាត់បង់ជីវិតចំនួន ០១រូប និងរងរបួសចំនួន ០៣រូប។ នេះគឺជាអំពីសាហាវព្រៃផ្សៃ និងយង់ឃ្នង បន្ថែមទៀតរបស់ភាគីថៃ បន្ទាប់ពីកងកម្លាំងចម្រុះថៃបានធ្វើទុក្ខបុកម្នេញគ្រប់បែបយ៉ាងដល់អ្នកភូមិរស់នៅតំបន់នេះ ក្នុងពេលកន្លងមក ដូចជាការចូលមករាយបន្លាលួស ហ៊ុមព័ទ្ធយកផ្ទះ ដីធ្លី រាយស្បៃខ្មៅ ដាក់កង់ឡាន គ្រោងបាញ់ទឹក លាមក បណ្តេញប្រជាពលរដ្ឋចេញពីលំនៅឋាន ចាក់បំពងសំឡេងរន្ធត់គ្រប់ប្រភេទ បាញ់កាំភ្លើងគ្រាប់ជ័រ ជំពាម គ្រាប់ដែក គ្រាប់ឃ្លី បាញ់ផ្សែងពុលជាដើម។ ទង្វើអមនុស្សធម៌ទាំងនោះ បានរំលោភលើសេចក្តីថ្លែងការណ៍ជា សាកលអំពីសិទ្ធិមនុស្ស ធម្មនុញ្ញអង្គការសហប្រជាជាតិ ធម្មនុញ្ញអាស៊ាន និងច្បាប់អន្តរជាតិផ្សេងទៀត ដែលសុទ្ធតែ ជាបទល្មើសឧក្រិដ្ឋកម្មអន្តរជាតិ ឧក្រិដ្ឋកម្មប្រឆាំងមនុស្សជាតិ ឧក្រិដ្ឋកម្ម សង្គ្រាម។ល។» ស្នងការដ្ឋាននគរបាលខេត្តកណ្តាល នៅថ្ងៃទី១៣​ ខែវិច្ឆិកា ឆ្នាំ២០២៥នេះ ប្រកាសថ្កោលទោសយ៉ាងដាច់អហង្ការ ចំពោះការប្រើអំពើ ហិង្សាដ៏សាហាវឃោរឃៅ អមនុស្សធម៌របស់ភាគីថៃ មកលើប្រជាពលរដ្ឋជាជនស៊ីវិលស្លូតត្រង់កម្ពុជា ដែល សកម្មភាពទាំងអស់នេះបានរំលោភបំពានលើសេចក្តីថ្លែងការណ៍រួម ស្តីពីកិច្ចព្រមព្រៀងសន្តិភាពរវាងកម្ពុជា-ថៃ ដែលភាគីទាំងពីរបានចុះហត្ថលេខាកាលពីថ្ងៃទី២៦ ខែតុលា ឆ្នាំ២០២៥ នៅទីក្រុងគូឡាឡាំពួរ ប្រទេសម៉ាឡេស៊ី។

ស្នងការដ្ឋាននគរបាលខេត្តកណ្តាលសូមចូលរួមរំលែកមរណទុក្ខជាមួយក្រុមគ្រួសារសព និងសូមចូល រួមរំលែកការឈឺចាប់របស់ជនរួមជាតិគ្រប់រូប ជាពិសេសជាមួយគ្រួសារដែលមានសមាជិករងរបួស ដោយសារ អំពើសាហាវព្រៃផ្សៃរបស់ភាគីថៃនេះ។

ជាចុងក្រោយ ស្នងការដ្ឋាននគរបាលខេត្តកណ្តាល សូមប្រកាសគាំទ្រយ៉ាងពេញទំហឹងចំពោះជំហរ និង ការសម្រេចចិត្តរបស់រាជរដ្ឋាភិបាលកម្ពុជា ក្នុងការដោះស្រាយបញ្ហាព្រំដែនដោយសន្តិវិធី ស្របតាមស្មារតីនៃ សេចក្តីថ្លែងការណ៍រួម ទីក្រុងគូឡាឡាំពួរ ដើម្បីឈានទៅដល់ការបញ្ចប់ជម្លោះ និងកសាងសន្តិភាពពិតប្រាកដរវាងប្រទេសទាំងពីរ៕