លោក គួយ ប៊ុនធឿន៖ កម្មករ កម្មការិនីបានពិសារនំបញ្ចុកដែលលក់នៅក្នុងរោងចក្រ មុនចូលបំពេញការងារ ទើបមានអាការៈ ធីងធោង វិលមុខ ក្អួតចង្អោរ រាកញឹកញាប់ និងចុកពោះខ្លាំង

(កណ្ដាល)៖ ប្រធានមន្ទីរសុខាភិបាលខេត្តកណ្ដាល លោក គួយ ប៊ុនធឿន បានគូសបញ្ជាក់ថា កម្មករ កម្មការិនីដែលកំពុងសម្រាកព្យាបាលនៅមណ្ឌលសុខភាពសៀមរាប ក៏ដូចជានៅគ្លីនិកឯកជន ពួកគាត់បានពិសារនំបញ្ចុកដែលលក់នៅក្នុងរោងចក្រ មុនចូលបំពេញការងារ ហើយបន្ទាប់មកពួកគាត់ មានអាការៈ ធីងធោង វិលមុខ ក្អួតចង្អោរ រាកញឹកញាប់ (៤ទៅ៦ដង) និងចុកពោះខ្លាំង។

ការគូសបញ្ជាក់ខាងលើនេះ កាលពីរសៀលថ្ងៃទី១៨ ខែមេសា ឆ្នាំ២០២៥ ក្នុងពេលលោក គួយ ប៊ុនធឿន ប្រធានមន្ទីរសុខាភិបាលខេត្តកណ្ដាលអញ្ជើញអមដំណើរអភិបាលរងខេត្តកណ្ដាល លោក គ្រុយ ម៉ាឡែន ចុះសួរសុខទុក្ខ និងនាំយកថវិការបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី ឧបត្ថម្ភដល់កម្មករ កម្មការិនី ដែលពុលអាហារនៅមណ្ឌលសុខភាព និងគ្លីនិកឯកជនដោយផ្ទាល់ បន្ទាប់ពីទទួលបានដំណឹង មានកម្មករ កម្មការិនី នៅរោងចក្រមួយកន្លែងចំនួន២៣នាក់ បានពុលអាហារ  កំពុងសម្រាកព្យាបាលនៅមណ្ឌលសុខភាពសៀមរាប ក្នុងស្រុកកណ្ដាលស្ទឹង និងខ្លះទៀតសម្រាកព្យាបាលនៅគ្លីនិកឯកជន។

លោកប្រធានមន្ទីរបានបន្តថា គិតមកដល់ពេលនេះ កម្មក រកម្មការិនីទាំងអស់ មានអាការៈធូរស្បើយឡើងវិញហើយ បន្ទាប់ពីមានការយកចិត្តទុកដាក់ពីក្រុមគ្រូពេទ្យនៅមណ្ឌលសុខភាពសៀមរាប ក្នុងការព្យាបាលដោយការយកចិត្តទុកដាក់។ 

លោក គួយ ប៊ុនធឿន បានបញ្ជាក់ទៀតថា ជំហានដំបូងក្រុមការងារបានដាក់ការសង្ស័យថាបណ្ដាលមកពីការហូបនំបញ្ចុក ពីព្រោះអ្នកដែលមានអាការៈពុលអាហារនេះ សុទ្ធតែបានហូបនំបញ្ចុកមុនចូលធ្វើការ ហើយមកដល់ពេលនេះ ក្រុមការងារកំពុងតែពិនិត្យ និងស្រាវជ្រាវរកមូលហេតុ ដែលបណ្ដាលឱ្យមានការពុលអាហារនេះ។

លោក គ្រុយ ម៉ាឡែន អភិបាលរងខេត្ត បាននាំយកនូវការផ្ដាំផ្ញើសាកសួរសុខទុក្ខ ពីសំណាកសម្ដេចមហាបវរអធិបតី នាយករដ្ឋមន្ត្រី និងលោកអភិបាលខេត្តកណ្ដាល ដោយក្ដីនឹករលឹក។ លោកបន្តថា រាជរដ្ឋាភិបាលក្រោមការដឹកនាំរបស់ សម្ដេចមហាបវរអធិបតី នាយករដ្ឋមន្ត្រី បានយកចិត្តទុកដាក់ខ្ពស់បំផុត ចំពោះសុខទុក្ខរបស់បងប្អូនកម្មករ កម្មការិនីទាំងអស់ ព្រោះថាបន្ទាប់ពីទទួលបានព័ត៌មានភ្លាម ថ្នាក់ដឹកនាំគ្រប់ជាន់ថ្នាក់ បានយកចិត្តទុកដាក់តាមដាន និងពិនិត្យជាប់ជាប្រចាំ ដើម្បីធានាបានថាបងប្អូនទាំងអស់ដែលពុលអាហារ នៅពេលនេះមិនមានគ្រោះថ្នាក់អ្វីធ្ងន់ធ្ងរដល់អាយុជីវិតឡើយ។

លោកអភិបាលរងខេត្តបានលើកទឹកចិត្តដល់កម្មករ កម្មការិនីទាំងអស់ កុំមានការព្រួយបារម្ភ និងភ័យខ្លាច ចំពោះការចំណាយក្នុងការព្យាបាល ព្រោះថាបងប្អូនរបស់យើងមានប.ស.ស ក្នុងការរ៉ាប់រងថ្លៃចំណាយទាំងអស់ ដូច្នេះសូមបងប្អូនសម្រាកឱ្យបានស្រួល ថែបំប៉នសុខភាពឱ្យបានល្អ ដើម្បីឆាប់ជាសះស្បើយ និងចូលបម្រើការងារបន្តទៀត៕