រថយន្តទំនើប តែទង្វើថោក! កុំឱ្យសង្គមវាស់តម្លៃមនុស្សត្រឹមរថយន្ត តែត្រូវវាស់តាមសីលធម៌ និងការទទួលខុសត្រូវ

(កណ្ដាល)៖ ការដឹកសំរាមយកទៅបោះចោលតាមដងផ្លូវសាធារណៈ មិនមែនជារឿងតូចតាចឡើយ ប៉ុន្តែជាទង្វើដែលបង្ហាញពីការខ្វះស្មារតីទទួលខុសត្រូវចំពោះសង្គម និងបរិស្ថាន។ ជាពិសេស នៅពេលទង្វើបែបនេះកើតឡើងពីម្ចាស់រថយន្តស៊េរីទំនើប កាន់តែធ្វើឱ្យមហាជនមានការខកចិត្ត ព្រោះទ្រព្យសម្បត្តិមិនអាចជំនួសសីលធម៌ និងមនសិការបានឡើយ។

កាលពីថ្ងៃទី២៦ ខែកក្កដា ឆ្នាំ២០២៦ ឯកឧត្តម គួច ចំរើន អភិបាលខេត្តកណ្ដាល បានបង្ហោះសារថា៖ «សង្ហា ឬ ថោក ប្រិយមិត្ត?» ព្រមទាំងបញ្ជាឱ្យម្ចាស់រថយន្តចូលមកបង់ពិន័យ ចំពោះការដឹកសំរាមមកទម្លាក់នៅចិញ្ចើមផ្លូវសាធារណៈ ក្នុងស្រុកមុខកំពូល។

ទន្ទឹមនឹងនោះ ក្រសួងបរិស្ថានក៏បានលើកឡើងថា នេះជាទង្វើដែលសង្គមមិនអាចទទួលយកបាន និងប៉ះពាល់យ៉ាងធ្ងន់ធ្ងរដល់បរិស្ថាន។

ទោះជាយ៉ាងណា មតិសាធារណជនជាច្រើនបានលើកឡើងថា ការផាកពិន័យតែមួយមុខ ប្រហែលមិនទាន់គ្រប់គ្រាន់សម្រាប់បង្កើតការរារាំងនោះទេ។ គួរតែមានវិធានការអប់រំ និងការងារបម្រើសាធារណៈ ដូចជាការចូលរួមបោសសម្អាតទីសាធារណៈ ដើម្បីឱ្យអ្នកល្មើសយល់ពីតម្លៃនៃភាពស្អាត និងទំនួលខុសត្រូវរួម។

ជាមួយគ្នានេះ ការរិះគន់ក៏គួរតែសំដៅទៅលើការពង្រឹងការគ្រប់គ្រងរបស់អាជ្ញាធរផងដែរ។ តំបន់ដែលមានការបោះសំរាមញឹកញាប់ គួរតែដាក់ស្លាកហាមឃាត់ឱ្យច្បាស់លាស់ ដំឡើងកាមេរ៉ាតាមដាន ពង្រឹងការអនុវត្តច្បាប់ និងផ្សព្វផ្សាយការអប់រំដល់ប្រជាពលរដ្ឋជាប្រចាំ មិនមែនរង់ចាំដល់មានករណីកើតឡើងទើបប្រតិកម្មនោះទេ។

ការរក្សាអនាម័យ និងបរិស្ថាន មិនមែនជាកាតព្វកិច្ចរបស់អាជ្ញាធរតែម្នាក់ឯងឡើយ ប៉ុន្តែជាកាតព្វកិច្ចរួមរបស់ប្រជាពលរដ្ឋគ្រប់រូប។ ផ្ទះស្អាត តែផ្លូវសាធារណៈកខ្វក់ មិនមែនជាសញ្ញានៃសង្គមអភិវឌ្ឍន៍ឡើយ។

ប្រទេសស្អាត ចាប់ផ្តើមពីមនុស្សម្នាក់ៗ។ បើយើងគោរពច្បាប់ មានសីលធម៌ និងចេះថែរក្សាបរិស្ថាន នោះកម្ពុជានឹងកាន់តែស្រស់ស្អាត ទាក់ទាញ និងរីកចម្រើនប្រកបដោយចីរភាព។ ការផាកពិន័យគឺជាការព្រមាន ប៉ុន្តែការអប់រំ និងការចូលរួមពីគ្រប់ភាគី ទើបជាដំណោះស្រាយយូរអង្វែង៕