«ប្រជាពលរដ្ឋទាមទារភាពតម្លាភាព៖ សំណង់ស្ថានភាពស្រដៀងគ្នា តែការអនុវត្តវិធានការខុសគ្នា អាជ្ញាធរមិនទាន់បំភ្លឺ»

(តាកែវ)៖ ការអនុវត្តច្បាប់ស្តីពីសំណង់ គួរតែឈរលើគោលការណ៍ស្មើភាព តម្លាភាព និងគ្មានការរើសអើង ព្រោះច្បាប់មិនគួរមានស្តង់ដារពីរសម្រាប់ប្រជាពលរដ្ឋនោះឡើយ។ ប៉ុន្តែករណីសំណង់ពីរនៅទីប្រជុំជនព្រៃល្វា ស្រុកព្រៃកប្បាស ខេត្តតាកែវ បានធ្វើឱ្យមានការរិះគន់ និងការចោទសួរពីសំណាក់ប្រជាពលរដ្ឋជាច្រើន អំពីភាពស្មើគ្នាក្នុងការអនុវត្តច្បាប់របស់អាជ្ញាធរ។

តាមព័ត៌មានដែលទទួលបាន រដ្ឋបាលស្រុកព្រៃកប្បាស កាលពីថ្ងៃទី៦ ខែកក្កដា ឆ្នាំ២០២៦ បានចេញលិខិតមិនអនុញ្ញាតឱ្យសំណង់របស់លោក ហ៊ាង បន្តការសាងសង់។ ទន្ទឹមនឹងនោះ សំណង់លំនៅឋានមួយទៀតដែលគេស្គាល់ថាជារបស់លោក ពៅ នៅលើផ្លូវតែមួយ ក៏នៅតែបន្តសាងសង់រហូតជិតរួចរាល់។ ភាពខុសគ្នានៃការអនុវត្តវិធានការនេះ បានធ្វើឱ្យប្រជាពលរដ្ឋមួយចំនួនសម្តែងការងឿងឆ្ងល់ និងទាមទារឱ្យមានការបំភ្លឺជាសាធារណៈ។

បើសំណង់ទាំងពីរមានស្ថានភាពផ្លូវច្បាប់ខុសគ្នា អាជ្ញាធរគួរបញ្ជាក់ឱ្យបានច្បាស់ ដើម្បីបំបាត់ការសង្ស័យ។ ប៉ុន្តែបើមានស្ថានភាពស្រដៀងគ្នា ការអនុវត្តច្បាប់គួរតែធ្វើឡើងដោយស្មើភាព មិនគួរឱ្យមានការយល់ឃើញថា មានការអនុវត្ត «បិទភ្នែកម្ខាង បើកភ្នែកម្ខាង» នោះទេ។

តាមគោលការណ៍នៃច្បាប់ស្តីពីសំណង់ ការសាងសង់ត្រូវមានការអនុញ្ញាតពីអាជ្ញាធរមានសមត្ថកិច្ច និងអនុវត្តតាមលក្ខណៈបច្ចេកទេស ដើម្បីធានាសុវត្ថិភាពរបស់អ្នកប្រើប្រាស់ សាធារណជន និងសោភ័ណភាពនៃការរៀបចំដែនដី។ ការគ្រប់គ្រងដែលខ្វះប្រសិទ្ធភាព ឬការអនុវត្តច្បាប់មិនស្មើគ្នា ប្រសិនបើមានពិត នឹងអាចប៉ះពាល់ដល់ទំនុកចិត្តរបស់ប្រជាពលរដ្ឋលើអាជ្ញាធរ និងគោលការណ៍នីតិរដ្ឋ។

លោក ហ៊ាង បានលើកឡើងថា លោកត្រៀមខ្លួនអនុវត្តតាមការសម្រេចរបស់អាជ្ញាធរ ប្រសិនបើការអនុវត្តច្បាប់ធ្វើឡើងដោយស្មើភាពចំពោះសំណង់ទាំងអស់។ ការលើកឡើងនេះ ក៏បានជំរុញឱ្យប្រជាពលរដ្ឋអំពាវនាវឱ្យមានការត្រួតពិនិត្យសំណង់ទាំងអស់ដោយគ្មានការរើសអើង។

គិតត្រឹមថ្ងៃទី២២ ខែកក្កដា ឆ្នាំ២០២៦ លោក គិន ភក្តី អភិបាលស្រុកព្រៃកប្បាស មិនទាន់បានផ្តល់ការបំភ្លឺជាផ្លូវការពាក់ព័ន្ធនឹងករណីនេះនៅឡើយ ដោយសារជាប់ប្រជុំ និងបានស្នើឱ្យអ្នកសារព័ត៌មានទៅជួបនៅសាលាស្រុក។ ចំណែកម្ចាស់សំណង់មួយទៀត អង្គភាពសារព័ត៌មានក៏មិនទាន់អាចទាក់ទងសុំការបំភ្លឺបានដែរ។

អង្គភាពសារព័ត៌មានសូមរង់ចាំការបំភ្លឺពីអាជ្ញាធរពាក់ព័ន្ធ និងភាគីទាំងអស់ ដើម្បីផ្សព្វផ្សាយព័ត៌មានឱ្យបានគ្រប់ជ្រុងជ្រោយ មានតុល្យភាព និងស្របតាមក្រមសីលធម៌វិជ្ជាជីវៈសារព័ត៌មាន។ ប្រសិនបើមានការបំភ្លឺ ឬឯកសារបញ្ជាក់ពីភាគីណាមួយ អង្គភាពសារព័ត៌មាននឹងចុះផ្សាយជាបន្តទៀតដោយមិនលំអៀង៕