«នៅតែដដែល!» ដេប៉ូខ្សាច់គ្មានយីហោនៅភូមិកោះគរ បន្តបង្កហានិភ័យធ្ងន់ធ្ងរ ខណៈសេចក្ដីជូនដំណឹងរបស់រដ្ឋបាលខេត្តកណ្ដាល ហាក់មិនទាន់មានប្រសិទ្ធភាពក្នុងការអនុវត្ត

(កណ្ដាល)៖ រហូតដល់រសៀលថ្ងៃទី២០ ខែកក្កដា ឆ្នាំ២០២៦ សកម្មភាពដឹកជញ្ជូនខ្សាច់ចេញពីដេប៉ូមួយកន្លែងដែលមិនឃើញមានដាក់យីហោ ស្ថិតជាប់ផ្លូវកៅស៊ូថ្មី ក្នុងភូមិកោះគរ សង្កាត់រកាខ្ពស់ ក្រុងតាខ្មៅ ខេត្តកណ្ដាល នៅតែបន្តយ៉ាងមមាញឹក ដោយមិនទាន់ឃើញមានការកែប្រែជាវិជ្ជមានណាមួយឡើយ។ ប្រសិនបើស្ថានភាពដែលបានរាយការណ៍នេះជាការពិត វាកំពុងបង្កការព្រួយបារម្ភយ៉ាងខ្លាំងដល់ប្រជាពលរដ្ឋ ព្រោះតែហានិភ័យចំពោះសុវត្ថិភាពចរាចរណ៍ ការប៉ះពាល់បរិស្ថាន និងការខូចខាតហេដ្ឋារចនាសម្ព័ន្ធសាធារណៈ ខណៈបទដ្ឋានបច្ចេកទេសដែលរដ្ឋបាលខេត្តកណ្ដាលបានដាក់ចេញ ហាក់មិនត្រូវបានអនុវត្តឱ្យបានត្រឹមត្រូវ។

ជាក់ស្ដែង រថយន្តធុនធំ រួមទាំងរថយន្តយីឌុប និងរថយន្តចង្កូតស្ដាំដឹកខ្សាច់ បានបន្តចេញចូលជាបន្តបន្ទាប់ក្នុងសកម្មភាពដឹកជញ្ជូនយ៉ាងមមាញឹក។ តាមការសង្កេត ខ្សាច់បានជ្រុះរាយប៉ាយពេញផ្ទៃផ្លូវ និងចិញ្ចើមផ្លូវ ខណៈរថយន្តមួយចំនួនបើកបរក្នុងល្បឿនលឿន ដែលអាចបង្កគ្រោះថ្នាក់យ៉ាងធ្ងន់ធ្ងរដល់អ្នកជិះម៉ូតូ អ្នកជិះកង់ និងអ្នកប្រើប្រាស់ផ្លូវទូទៅ។ បន្ថែមពីនេះ ការចេញចូលញឹកញាប់របស់រថយន្តដឹកទំនិញធុនធ្ងន់ ក៏អាចជាមូលហេតុនាំឱ្យផ្លូវឆាប់ប្រេះ ស្រុត និងបាត់បង់គុណភាពមុនអាយុកាលដែលបានគ្រោងទុក ប្រសិនបើមិនមានការគ្រប់គ្រងត្រឹមត្រូវ។

អ្វីដែលគួរឱ្យកត់សម្គាល់ជាងនេះទៅទៀត គឺសេចក្ដីជូនដំណឹងរបស់រដ្ឋបាលខេត្តកណ្ដាល ចុះថ្ងៃទី៧ ខែមេសា ឆ្នាំ២០២៦ ដែលចុះហត្ថលេខាដោយលោក គួច ចំរើន អភិបាលខេត្តកណ្ដាល បានណែនាំយ៉ាងច្បាស់ដល់ម្ចាស់ដេប៉ូខ្សាច់ ថ្ម ម្ចាស់រថយន្តដឹកជញ្ជូន និងអាជីវករពាក់ព័ន្ធទាំងអស់ ឱ្យលាងសម្អាតផ្លូវឱ្យស្អាតជាប្រចាំ ចាប់ពីថ្ងៃទី១៣ ខែមេសា ឆ្នាំ២០២៦ តទៅ និងបានព្រមានថា ប្រសិនបើនៅតែមានការជ្រុះខ្សាច់ ឬថ្មប្រឡាក់លើផ្លូវ នឹងត្រូវបិទអាជីវកម្មជាស្ថាពរ។

ប៉ុន្តែបើពិនិត្យលើស្ថានភាពជាក់ស្ដែងនៅទីតាំងខាងលើ ប្រសិនបើការរាយការណ៍នេះជាការពិត វាហាក់ផ្ទុយស្រឡះពីខ្លឹមសារនៃសេចក្ដីជូនដំណឹងនោះ។ ផ្លូវនៅតែពោរពេញដោយខ្សាច់ ចិញ្ចើមផ្លូវនៅតែប្រឡាក់ សកម្មភាពដឹកជញ្ជូននៅតែបន្តយ៉ាងមមាញឹក ហើយមិនទាន់ឃើញមានការកែលម្អណាមួយឱ្យសមស្របតាមការណែនាំរបស់រដ្ឋបាលខេត្តឡើយ។

មហាជនបានចោទជាសំណួរថា តើសេចក្ដីជូនដំណឹងរបស់រដ្ឋបាលខេត្តកណ្ដាល ដែលបានព្រមានអំពីការបិទអាជីវកម្មចំពោះអ្នកមិនគោរពការណែនាំ មានប្រសិទ្ធភាពក្នុងការអនុវត្តដែរឬទេ? ប្រសិនបើមានការបំពានជាក់ស្ដែង តើហេតុអ្វីបានជាវិធានការដែលបានប្រកាសជាសាធារណៈ មិនទាន់ត្រូវបានអនុវត្ត? ការអនុវត្តច្បាប់ គួរតែមានស្តង់ដារតែមួយ ស្មើភាព និងគ្មានការលើកលែង ដើម្បីរក្សាទំនុកចិត្តរបស់ប្រជាពលរដ្ឋចំពោះការគ្រប់គ្រងរដ្ឋបាល និងនីតិរដ្ឋ។

ប្រជាពលរដ្ឋដែលធ្វើដំណើរឆ្លងកាត់តំបន់នេះ ក៏បានស្នើសុំឱ្យអាជ្ញាធរសង្កាត់រកាខ្ពស់ លោក ឃឹម សំភារ អភិបាលក្រុងតាខ្មៅ មន្ទីរសាធារណការ និងដឹកជញ្ជូនខេត្តកណ្ដាល មន្ទីររ៉ែ និងថាមពលខេត្តកណ្ដាល ព្រមទាំងស្ថាប័នជំនាញពាក់ព័ន្ធ មេត្តាចុះពិនិត្យជាបន្ទាន់ទៅលើទីតាំងដេប៉ូខ្សាច់ខាងលើ ដើម្បីពិនិត្យអំពីការអនុវត្តលក្ខខណ្ឌបច្ចេកទេស អាជ្ញាបណ្ណ ស្ថានភាពផ្លូវ ការផ្ទុកទម្ងន់ និងការគោរពច្បាប់ពាក់ព័ន្ធ។ ប្រសិនបើរកឃើញថាមានការបំពានច្បាប់ ឬការអនុវត្តមិនស្របតាមលក្ខខណ្ឌដែលបានកំណត់ សូមចាត់វិធានការតាមផ្លូវច្បាប់ឱ្យបានម៉ឺងម៉ាត់ និងតម្រូវឱ្យអ្នកពាក់ព័ន្ធទទួលខុសត្រូវចំពោះការខូចខាតដែលបានកើតឡើង។

ការអភិវឌ្ឍវិស័យសំណង់ គឺជាកត្តាសំខាន់សម្រាប់ការរីកចម្រើនរបស់សង្គម ប៉ុន្តែការអភិវឌ្ឍមិនអាចធ្វើឡើងដោយប៉ះពាល់ដល់សុវត្ថិភាពសាធារណៈ បំផ្លាញផ្លូវសាធារណៈ និងរំលងការអនុវត្តច្បាប់បានឡើយ។ ម្ចាស់អាជីវកម្មទាំងអស់ ត្រូវមានការទទួលខុសត្រូវចំពោះសកម្មភាពរបស់ខ្លួន ដោយគោរពបទដ្ឋានបច្ចេកទេស លក្ខខណ្ឌអាជ្ញាបណ្ណ និងការណែនាំរបស់អាជ្ញាធរមានសមត្ថកិច្ច។ ជាមួយគ្នានេះ ស្ថាប័នអនុវត្តច្បាប់ក៏គួរអនុវត្តវិធានការដោយស្មើភាព តម្លាភាព និងគ្មានការលើកលែង ដើម្បីបង្ហាញថា ច្បាប់មានតម្លៃ និងមានប្រសិទ្ធភាពសម្រាប់មនុស្សគ្រប់រូប មិនមែនមានតែលើក្រដាស ឬអនុវត្តចំពោះតែអ្នកខ្សោយនោះទេ។

គិតត្រឹមម៉ោងផ្សាយនេះ នៅថ្ងៃទី២០ ខែកក្កដា ឆ្នាំ២០២៦ អង្គភាពយើងខ្ញុំមិនទាន់ទទួលបានការបំភ្លឺ ឬការឆ្លើយតបពីម្ចាស់ដេប៉ូខ្សាច់ និងស្ថាប័នជំនាញពាក់ព័ន្ធនៅឡើយទេ។ អង្គភាពយើងខ្ញុំរង់ចាំទទួលការបកស្រាយ ឬព័ត៌មានបន្ថែមពីគ្រប់ភាគី ដើម្បីផ្សព្វផ្សាយដោយឈរលើគោលការណ៍តុល្យភាព វិជ្ជាជីវៈ ភាពត្រឹមត្រូវ និងការពិត៕