សម្ដេចធិបតី ហ៊ុន ម៉ាណែត អំពាវនាវទទួលយកមតិយោបល់ពីប្រជាពលរដ្ឋ ដើម្បីពង្រឹងវិស័យសហគ្រាសធុនតូច និងមធ្យម (SME)

(ភ្នំពេញ)៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា នោលើបណ្ដាញសង្គមហ្វេសប៊ុក នាព្រឹកថ្ងៃទី១៩ ខែកក្ដដា ឆ្នាំ២០២៦ បានអំពាវនាវ និងស្វាគមន៍មតិយោបល់ពីប្រជាពលរដ្ឋ ជាពិសេសម្ចាស់សហគ្រាសធុនតូច និងមធ្យម (SME) ក្នុងស្មារតី «រួមគិត រួមធ្វើ» ដើម្បីរួមចំណែកដោះស្រាយបញ្ហាប្រឈម និងលើកកម្ពស់ការអភិវឌ្ឍវិស័យ SME ឱ្យកាន់តែរឹងមាំ និងមានប្រសិទ្ធភាព។

សម្ដេចធិបតីបានមានប្រសាសន៍ថា សហគ្រាសធុនតូច និងមធ្យម គឺជាកម្លាំងចលករដ៏សំខាន់ក្នុងការជំរុញកំណើនសេដ្ឋកិច្ចជាតិ បង្កើតឱកាសការងារ និងលើកកម្ពស់ជីវភាពរស់នៅរបស់ប្រជាពលរដ្ឋ។ ដោយមើលឃើញពីតួនាទីដ៏សំខាន់នេះ រាជរដ្ឋាភិបាលគ្រប់អាណត្តិបានបន្តដាក់ចេញនូវគោលនយោបាយ និងវិធានការជាបន្តបន្ទាប់ ដើម្បីជំរុញ និងគាំទ្រការរីកចម្រើនរបស់វិស័យ SME ខណៈរាជរដ្ឋាភិបាលនីតិកាលទី៧ ក៏បានបន្ថែមវិធានការថ្មីៗ ដើម្បីលើកទឹកចិត្ត និងសម្រួលដល់ការបង្កើត និងដំណើរការអាជីវកម្មរបស់សហគ្រាសទាំងនេះ។

ទន្ទឹមនឹងសមិទ្ធផលវិជ្ជមានជាច្រើន សម្ដេចធិបតីក៏បានទទួលស្គាល់ថា វិស័យ SME នៅតែប្រឈមនឹងបញ្ហាមួយចំនួន ដែលត្រូវការការយកចិត្តទុកដាក់ និងដំណោះស្រាយបន្ថែម។ ជាពិសេស ក្នុងបរិបទដែលកម្ពុជាកំពុងជំរុញការផលិតផលិតផលក្នុងស្រុក ដើម្បីកាត់បន្ថយការពឹងផ្អែកលើការនាំចូល តួនាទីរបស់សហគ្រាសធុនតូច និងមធ្យម កាន់តែមានសារៈសំខាន់ក្នុងការរួមចំណែកពង្រឹងសេដ្ឋកិច្ចជាតិ។

ក្នុងន័យនេះ សម្ដេចធិបតីបានប្រគល់ភារកិច្ចជូន ឯកឧត្តមអគ្គបណ្ឌិតសភាចារ្យ អូន ព័ន្ធមុន្នីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ក្នុងនាមជាប្រធានគណៈកម្មការនយោបាយសេដ្ឋកិច្ច ដឹកនាំការសិក្សា និងរៀបចំវិធានការចាំបាច់ និងបន្ទាន់បន្ថែម ដើម្បីដោះស្រាយបញ្ហាប្រឈម និងជំរុញការអភិវឌ្ឍវិស័យ SME ឱ្យកាន់តែមានប្រសិទ្ធភាព។

សម្ដេចធិបតីបានបញ្ជាក់ថា ការរៀបចំគោលនយោបាយរបស់រាជរដ្ឋាភិបាលកន្លងមក តែងផ្អែកលើការសិក្សាយ៉ាងលម្អិត និងការពិគ្រោះយោបល់ជាមួយតំណាងសហគ្រាសធុនតូច និងមធ្យម វិស័យឯកជន ព្រមទាំងក្រសួង និងស្ថាប័នពាក់ព័ន្ធ ដើម្បីប្រមូលធាតុចូលឱ្យបានគ្រប់ជ្រុងជ្រោយ។

ជាមួយគ្នានេះ សម្ដេចធិបតីបានអំពាវនាវឱ្យប្រជាពលរដ្ឋ និងអ្នកប្រកបអាជីវកម្ម SME បន្តផ្តល់មតិយោបល់ អំពីបញ្ហាប្រឈមដែលកំពុងជួបប្រទះ ព្រមទាំងសំណើដំណោះស្រាយជាក់ស្តែង ដើម្បីឱ្យរាជរដ្ឋាភិបាលអាចដាក់ចេញវិធានការដែលមានប្រសិទ្ធភាព ឆ្លើយតបតាមតម្រូវការជាក់ស្តែង និងជួយពង្រឹងសមត្ថភាពប្រកួតប្រជែងរបស់សហគ្រាសធុនតូច និងមធ្យម សំដៅរួមចំណែកអភិវឌ្ឍសេដ្ឋកិច្ចជាតិឱ្យមានចីរភាព៕