អភិបាលក្រុង ចាន់ តារា ដឹកនាំមុតមាំ! អរិយក្សត្រសន្តិសុខរឹងមាំថ្ងៃចូលឆ្នាំដំបូង

(កណ្តាល)៖ នៅថ្ងៃទី១ នៃពិធីនគរសង្គ្រាន្តឆ្នាំ២០២៦ ត្រូវនឹងថ្ងៃទី១៤ ខែមេសា ឆ្នាំ២០២៦ រដ្ឋបាលក្រុងអរិយក្សត្រ ក្រោមការដឹកនាំប្រកបដោយភាពទទួលខុសត្រូវខ្ពស់ពីលោក ចាន់ តារា អភិបាលក្រុង និងជាប្រធានគណបញ្ជាការឯកភាពក្រុង បានអនុវត្តការងារធានាសន្តិសុខ សណ្ដាប់ធ្នាប់ និងសុវត្ថិភាពសាធារណៈបានយ៉ាងល្អប្រសើរ បង្កើតបរិយាកាសសុខសាន្ត និងមានរបៀបរៀបរយទូទាំងក្រុងដែលមាន១១សង្កាត់។

កម្លាំងមានសមត្ថកិច្ចគ្រប់ផ្នែក ត្រូវបានដាក់ពង្រាយយ៉ាងមានប្រសិទ្ធភាពនៅតាមគោលដៅសំខាន់ៗ ជាពិសេសនៅចំណុចកំពង់ចម្លងអរិយក្សត្រ និងស្វាយជ្រុំ ដែលជាទីកន្លែងមានចរាចរណ៍ច្រើន ក្នុងអំឡុងពេលបុណ្យ។ ការរៀបចំ និងសម្រួលចរាចរណ៍ត្រូវបានអនុវត្តយ៉ាងម៉ឺងម៉ាត់ ធ្វើឲ្យការធ្វើដំណើររបស់បងប្អូនប្រជាពលរដ្ឋមានភាពរលូន កាត់បន្ថយការកកស្ទះ និងធានាសុវត្ថិភាពបានយ៉ាងមានប្រសិទ្ធភាព។

លោក ចាន់ តារា បានអំពាវនាវដល់ប្រជាពលរដ្ឋទាំងអស់ ឲ្យបន្តគោរពច្បាប់ចរាចរណ៍ និងអនុវត្តវិធានសុវត្ថិភាព ដើម្បីចូលរួមថែរក្សាសណ្ដាប់ធ្នាប់សាធារណៈ និងបង្កើនសុវត្ថិភាពសម្រាប់ខ្លួនឯង និងសហគមន៍ទាំងមូល។

គួរបញ្ជាក់ថា ក្នុងថ្ងៃដំបូងនៃពិធីនេះ ស្ថានការណ៍សន្តិសុខទូទៅនៅក្រុងអរិយក្សត្រ មានភាពល្អប្រសើរ ដោយមិនមានបញ្ហាក្មេងទំនើង ឬហេតុការណ៍អវិជ្ជមានណាមួយគួរឲ្យកត់សម្គាល់ឡើយ។ ជាពិសេស ប្រជាពលរដ្ឋបាននាំគ្នាចូលរួមលេងកម្សាន្តតាមទីវត្តអារាម និងល្បែងប្រជាប្រិយ៍យ៉ាងសប្បាយរីករាយ ដោយបង្វែរចេញពីការលេងតាមដងផ្លូវ ដែលជាហានិភ័យដល់សុវត្ថិភាព។ ទន្ទឹមនោះ លោក​អភិបាលក្រុងបានឲ្យកម្លាំងចុះណែនាំមិនឲ្យមានការលេងកាំភ្លើងទឹកនោះទេ។

គួរជម្រាបជួនថា នៅព្រឹកថ្ងៃទី១៤ ខែមេសា ឆ្នាំ២០២៦ រដ្ឋបាលក្រុងក៏បានរៀបចំ ពិធីទទួលទេវតាឆ្នាំថ្មី ព្រះនាម រាក្យសាទេវី ជាបុត្រីទី៣ នៃកបិលមហាព្រហ្ម ឆ្នាំមមី អដ្ឋស័ក ព.ស.២៥៦៩ ឈានចូល ព.ស.២៥៧០ផងដែរ។

សមិទ្ធផលដ៏ល្អប្រសើរនេះ បង្ហាញឲ្យឃើញពីសមត្ថភាពដឹកនាំដ៏មានប្រសិទ្ធភាព និងការសហការយ៉ាងជិតស្និទ្ធរវាងអាជ្ញាធរ និងកម្លាំងពាក់ព័ន្ធ ក្នុងការធានាសន្តិសុខសង្គម និងបម្រើប្រជាពលរដ្ឋឲ្យមានភាពកក់ក្ដៅ និងទំនុកចិត្ត៕