កម្ពុជាបង្ហាញសក្ដានុពលពាណិជ្ជកម្មសេវា លើឆាកអន្តរជាតិ ជំរុញកំណើនសេដ្ឋកិច្ចប្រកបដោយបរិយាបន្ន

(ភ្នំពេញ)៖ លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម និងជាប្រធានគណៈប្រតិភូកម្ពុជា បានអញ្ជើញចូលរួមជាវាគ្មិនក្នុងព្រឹត្តិការណ៍អន្តរជាតិ ស្តីពី «ពាណិជ្ជកម្មសេវាដើម្បីការអភិវឌ្ឍ (TS4D)» កាលពីព្រឹកថ្ងៃទី២៥ ខែមីនា ឆ្នាំ២០២៦ ដោយមានការចូលរួមពីរដ្ឋមន្ត្រីពាណិជ្ជកម្មពីបណ្តាប្រទេសជាច្រើន រួមមាន ហ្កាណា, ចាម៉ៃកា, រវ៉ាន់ដា, អេត្យូពី និង ចក្រភពអង់គ្លេស។

ក្នុងឱកាសនោះ លោកជំទាវរដ្ឋមន្ត្រី បានវាយតម្លៃខ្ពស់ចំពោះតួនាទីសំខាន់របស់វិស័យសេវាកម្មក្នុងសេដ្ឋកិច្ចកម្ពុជា និងបានសង្កត់ធ្ងន់ថា ពាណិជ្ជកម្មសេវា កំពុងក្លាយជាម៉ាស៊ីនជំរុញសំខាន់មួយ សម្រាប់ការអភិវឌ្ឍប្រទេស ការពិពិធកម្មសេដ្ឋកិច្ច និងការលើកកម្ពស់កំណើនប្រកបដោយភាពធន់ និងបរិយាបន្ន។

លោកជំទាវបានបញ្ជាក់បន្ថែមថា កម្ពុជា កំពុងផ្តោតលើការអភិវឌ្ឍធនធានមនុស្ស ជាពិសេសការបណ្តុះបណ្តាលជំនាញឌីជីថល ដើម្បីធានាថាកម្លាំងពលកម្មមានសមត្ថភាពប្រកួតប្រជែង និងអាចទាញយកផលប្រយោជន៍ពេញលេញពីវិស័យពាណិជ្ជកម្មសេវា។

បន្ថែមពីនេះ កម្ពុជាក៏កំពុងប្រើប្រាស់អត្ថប្រយោជន៍ពីក្របខណ្ឌកិច្ចព្រមព្រៀងពាណិជ្ជកម្មទាំងក្នុងតំបន់ និងពហុភាគី ដើម្បីបើកច្រកទីផ្សារថ្មីៗ សម្រាប់អ្នកផ្គត់ផ្គង់សេវា និងពង្រឹងការចូលរួមរបស់ខ្លួនក្នុងសេដ្ឋកិច្ចសកល។

ការចូលរួមរបស់កម្ពុជា ក្នុងវេទិកាអន្តរជាតិនេះ ត្រូវបានចាត់ទុកថា ជាជំហានសំខាន់មួយ ក្នុងការលើកកម្ពស់កិត្យានុភាពជាតិ និងបង្ហាញពីការប្តេជ្ញាចិត្តក្នុងការជំរុញវិស័យសេវាកម្ម ឱ្យក្លាយជាគ្រឹះមាំមួននៃកំណើនសេដ្ឋកិច្ចនាពេលអនាគត៕