មន្ត្រីគ្រប់រូប សុទ្ធតែមានតម្លៃស្មើគ្នា! អភិបាលខេត្តកណ្ដាលលើកទឹកចិត្តពេលបំពាក់មេដាយ៣១៣នាក់!

(កណ្តាល)៖ រដ្ឋបាលខេត្តកណ្តាលបានរៀបចំពិធីបំពាក់មេដាយសំរឹទ្ធការងារជូនមន្ត្រីរាជការ និងមន្ត្រីជាប់កិច្ចសន្យាសរុប៣១៣នាក់ ដែលបានបម្រើការងារលើសពី១០ឆ្នាំ និងមិនធ្លាប់ទទួលគ្រឿងឥស្សរិយយសពីមុន។

ពិធីនេះ ប្រព្រឹត្តទៅក្រោមអធិបតីភាព ឯកឧត្តម នូ សាខន និងឯកឧត្តម គួច ចំរើន អភិបាលខេត្ត កាលពីរសៀលថ្ងៃទី២៥ ខែមីនា ឆ្នាំ២០២៦ ដោយមានការលើកសរសើរខ្ពស់ចំពោះការខិតខំប្រឹងប្រែង និងការលះបង់របស់មន្ត្រីទាំងអស់ក្នុងការបម្រើសង្គម។

ឯកឧត្តមអភិបាលខេត្តបានបញ្ជាក់ថា ការបំពាក់មេដាយនេះ គឺអនុវត្តតាមអនុសាសន៍របស់សម្តេចនាយករដ្ឋមន្ត្រី ហ៊ុន ម៉ាណែត ដើម្បីលើកទឹកចិត្ត និងយកចិត្តទុកដាក់ចំពោះមន្ត្រីគ្រប់រូប មិនថាក្របខ័ណ្ឌ ឬកិច្ចសន្យា។

ជាមួយគ្នានេះ ឯកឧត្តមក៏បានអំពាវនាវឲ្យមន្ត្រីសុខាភិបាល បន្តគោរពក្រមសីលធម៌វិជ្ជាជីវៈ បម្រើអ្នកជំងឺដោយភាពទន់ភ្លន់ និងបន្តអភិវឌ្ឍជំនាញ ដើម្បីលើកកម្ពស់គុណភាពសេវាសុខាភិបាលឲ្យកាន់តែល្អប្រសើរ។

គួរបញ្ជាក់ថា នេះជាលើកទី២ ដែលរដ្ឋបាលខេត្តរៀបចំពិធីនេះ ខណៈលើកទី១ បានផ្តល់ជូនមន្ត្រីចំនួន៣៨៩នាក់៕