កំពង់ស្ពឺក្តៅគគុក! អាវុធហត្ថបង្ក្រាបក្រុមក្មេងទំនើងប្រដាប់ដាវ–កាំបិត៤នាក់ អុកឡុកភូមិ បង្កភ័យខ្លាចប្រជាពលរដ្ឋ

(កំពង់ស្ពឺ)៖ ដោយអនុវត្តតាមបទបញ្ជាយ៉ាងម៉ឺងម៉ាត់របស់លោកឧត្ដមសេនីយ៍ត្រី ម៉េង ស្រ៊ុន មេបញ្ជាការកងរាជអាវុធហត្ថខេត្តនិងមានការសម្របសម្រួលនីតិវិធីពីព្រះរាជអាជ្ញា កម្លាំងអាវុធហត្ថខេត្តកំពង់ស្ពឺ បានបើកប្រតិបត្តិការបង្ក្រាបក្រុមក្មេងទំនើង៤នាក់ ដែលប្រដាប់ដោយកាំបិត និងដាវ អុកឡុកក្នុងភូមិ បង្កការភ័យខ្លាចដល់ប្រជាពលរដ្ឋ។

ប្រតិបត្តិការនេះ ធ្វើឡើងនៅយប់ថ្ងៃទី១៧ ខែមីនា ឆ្នាំ២០២៦ បន្ទាប់ពីទទួលព័ត៌មានតាមលេខ Hotline 1292 ពីប្រជាពលរដ្ឋ នៅភូមិព្រៃរំដួល ឃុំសែនដី ស្រុកសំរោងទង។ កម្លាំងអាវុធហត្ថបានចុះអន្តរាគមន៍ភ្លាមៗ និងឃាត់ខ្លួនជនបង្កទាំង៤នាក់បាននៅកន្លែងកើតហេតុ។

ក្នុងប្រតិបត្តិការ សមត្ថកិច្ចបានដកហូតវត្ថុតាងរួមមាន៖ ម៉ូតូ៣គ្រឿង កាំបិតផ្គាក់២ដើម ដាវ១ដើម និងទូរស័ព្ទ១គ្រឿង។

បច្ចុប្បន្ន ជនបង្ក និងវត្ថុតាង ត្រូវបានកម្លាំងជំនាញកសាងសំណុំរឿង បញ្ជូនទៅសាលាដំបូងខេត្ត ដើម្បីចាត់ការតាមនីតិវិធីច្បាប់ ខណៈអាជ្ញាធរបន្តអំពាវនាវឲ្យយុវជនឈប់ចូលរួមសកម្មភាពអុកឡុក ដែលប៉ះពាល់ដល់សន្តិសុខសង្គម៕