ក្រោយមានការរិះគន់ពីមហាជន និងអ្នកសារព័ត៌មាន រដ្ឋបាលខណ្ឌពោធិ៍សែនជ័យចេញវិធានការកែលម្អសណ្តាប់ធ្នាប់បន្ថែម! 

(ភ្នំពេញ)៖ បន្ទាប់ពីមានការផ្សព្វផ្សាយ និងការរិះគន់ពីសំណាក់មហាជន និងអ្នកសារព័ត៌មានពាក់ព័ន្ធនឹងបញ្ហាសណ្តាប់ធ្នាប់ ការលក់ដូររំលោភលើចិញ្ចើមផ្លូវ និងបញ្ហាអនាម័យនៅមុខផ្សារជម្ពូវ័ន តាមបណ្តោយផ្លូវជាតិលេខ៤ រដ្ឋបាលខណ្ឌពោធិ៍សែនជ័យ បានចេញវិធានការបន្ថែម ដើម្បីដោះស្រាយបញ្ហាខាងលើឱ្យមានប្រសិទ្ធភាព និងឆាប់រហ័ស។

រដ្ឋបាលខណ្ឌបានបញ្ជាក់ថា ការរិះគន់ពីមហាជន និងសារព័ត៌មាន គឺជាកត្តាជំរុញដ៏សំខាន់ក្នុងការកែលម្អការងារគ្រប់គ្រងរដ្ឋបាល និងការផ្តល់សេវាសាធារណៈឱ្យកាន់តែល្អប្រសើរ។ ដូច្នេះ អាជ្ញាធរមូលដ្ឋានបានចាត់វិធានការយ៉ាងតឹងរឹង និងជាក់ស្តែង ដើម្បីធានាបាននូវសណ្តាប់ធ្នាប់ របៀបរៀបរយ និងអនាម័យសាធារណៈ។

ក្នុងនោះ រដ្ឋបាលខណ្ឌនឹងបន្តចុះអនុវត្តការត្រួតពិនិត្យ និងរៀបចំសណ្តាប់ធ្នាប់ជាបន្តបន្ទាប់ ព្រមទាំងចាត់កម្លាំងពាក់ព័ន្ធ ចុះណែនាំ និងអនុវត្តវិធានការតាមផ្លូវច្បាប់ចំពោះបុគ្គល ឬអាជីវករ ដែលមិនគោរពតាមសេចក្តីជូនដំណឹង។

ជាមួយគ្នានេះ អាជ្ញាធរបានអំពាវនាវឱ្យបងប្អូនប្រជាពលរដ្ឋ និងអាជីវករទាំងអស់ សហការជាមួយអាជ្ញាធរ ដោយអនុវត្តតាមការណែនាំឱ្យបានម៉ឺងម៉ាត់ ជៀសវាងការលក់ដូរលើចិញ្ចើមផ្លូវ ការចតយានយន្តមិនត្រឹមត្រូវ និងការបោះចោលសំណល់ដោយគ្មានរបៀបរៀបរយ។

រដ្ឋបាលខណ្ឌពោធិ៍សែនជ័យ ក៏បានបញ្ជាក់ផងដែរថា នឹងបន្តទទួលយកមតិយោបល់ និងការរិះគន់ពីមហាជន ដើម្បីយកមកកែលម្អការងារគ្រប់វិស័យឱ្យកាន់តែប្រសើរ ស្របតាមគោលការណ៍បម្រើប្រជាពលរដ្ឋជាចម្បង។

អាជ្ញាធរ សង្ឃឹមយ៉ាងមុតមាំថា តាមរយៈវិធានការថ្មីៗ និងការចូលរួមសហការពីគ្រប់ភាគី នឹងអាចធ្វើឱ្យតំបន់មុខផ្សារជម្ពូវ័ន មានសណ្តាប់ធ្នាប់ល្អ អនាម័យស្អាត និងបរិស្ថានប្រសើរឡើងវិញក្នុងពេលឆាប់ៗខាងមុខ៕ IMG_7643 IMG_7634