លោក ដូណាល់ ត្រាំ បង្ហើបថា នៅចុងឆ្នាំនេះ ប្រធានាធិបតីចិន លោក ស៊ី ជីនពីង នឹងធ្វើទស្សនកិច្ចទៅកាន់សហរដ្ឋអាមេរិក 

(វ៉ាស៊ីនតោន)៖ ប្រធានាធិបតីអាមេរិក លោក ដូណាល់ ត្រាំ បាននិយាយថារូបលោកនឹងត្រូវទទួលស្វាគមន៍ជួបប្រធានាធិបតីចិន លោក ស៊ី ជីនពីង នៅឯសេតវិមាននាចុងឆ្នាំ២០២៦នេះ ខណៈមហាអំណាចទាំង២ កំពុងសម្លឹងរកការស្ដារទំនាក់ទំនងឡើងវិញ។ នេះបើតាមការចេញផ្សាយដោយទីភ្នាក់ងារសារព័ត៌មាន​ AFP។

លោក ត្រាំ ធ្វើការកត់សម្គាល់បែបនេះក្នុងបទសម្ភាសន៍ជាមួយសារព័ត៌មាន NBC News ដែលត្រូវបានថតទុកកាលពីថ្ងៃពុធ ទី៤ ខែកុម្ភៈ ជាថ្ងៃតែមួយដែលរូបលោកបានបើកកិច្ចសន្ទនា តាមទូរស័ព្ទជាមួយលោក ស៊ី ជីនពីង ស្ដីពីពាណិជ្ជកម្ម តៃវ៉ាន់ សង្រ្គាមរបស់រុស្ស៉ីនៅអ៊ុយក្រែន និងស្ថានការណ៍នៅអ៉ីរ៉ង់។ លោក ត្រាំត្រូវបានរំពឹងថានឹងធ្វើទស្សនកិច្ចទៅកាន់ទីក្រុងប៉េកាំង នៅខែមេសាខាងមុខ មុននឹងមេដឹកនាំចិនត្រូវធ្វើទស្សនកិច្ចទៅកាន់សហរដ្ឋអាមេរិក។

នៅក្នុងបទសម្ភាសន៍ដែលត្រូវបានចាក់ផ្សាយកាលពីថ្ងៃអាទិត្យ ទី៨ ខែកុម្ភៈ លោក ត្រាំ បានលើកឡើងថា «ជាការពិត គាត់ (លោក ស៊ី ជីនពីង) នឹងធ្វើដំណើរទស្សនកិច្ចមកកាន់សេតវិមាន នៅចុងឆ្នាំនេះ។ នេះគឺជាប្រទេស២ដែលមានអំណាចបំផុតនៅលើពិភពលោក ហើយយើងមានទំនាក់ទំនងដ៏ល្អប្រសើរមួយ»។

គួរបញ្ជាក់ថា លោក ស៊ី ជីនពីង បានធ្វើទស្សនកិច្ចលើកចុងក្រោយបំផុតទៅកាន់សហរដ្ឋអាមេរិកក្នុងឆ្នាំ២០២៣។ កាលពីថ្ងៃពុធសប្ដាហ៍មុន លោក ស៊ី ជីនពីងក៏បានព្រមានលោក ត្រាំ ឱ្យមានការប្រុងប្រយ័ត្នផងដែរចំពោះការលក់អាវុធឱ្យតៃវ៉ាន់ ដែលចិនចាត់ទុកថាជាផ្នែកមួយនៃទឹកដីរបស់ចិន៕