សេតវិមានសាទរ «បទឈប់បាញ់២សប្ដាហ៍» ជាមួយអ៊ីរ៉ង់ អះអាងជាជ័យជម្នះ និងបើកផ្លូវសន្តិភាពយូរអង្វែង

(វ៉ាស៊ីនតោន)៖ អ្នកនាំពាក្យសេតវិមាន លោកស្រី Karoline Leavitt នៅថ្ងៃអង្គារ ទី៧ ខែមេសា ឆ្នាំ២០២៦ (ម៉ោងនៅវ៉ាស៊ីនតោន) បានបង្ហាញការសាទរយ៉ាងខ្លាំងចំពោះការយល់ព្រមលើបទឈប់បាញ់រយៈពេល២សប្ដាហ៍ ក្នុងបរិបទតានតឹងរវាងសហរដ្ឋអាមេរិក និងអ៊ីរ៉ង់ ដោយបានចាត់ទុកថា ជាជ័យជម្នះសំខាន់មួយសម្រាប់សហរដ្ឋអាមេរិក។ នេះបើតាមការចេញផ្សាយរបស់ទីភ្នាក់ងារសារព័ត៌មាន AFP។

លោកស្រី Karoline Leavitt បានគូសបញ្ជាក់តាមរយៈបណ្ដាញសង្គម X ថា «នេះគឺជាជ័យជម្នះសម្រាប់សហរដ្ឋអាមេរិក ដែលសម្រេចបានក្រោមការដឹកនាំរបស់ប្រធានាធិបតី ដូណាល់ ត្រាំ និងកម្លាំងយោធាដ៏រឹងមាំរបស់យើង»។ លោកស្រីបានបន្ថែមថា ជោគជ័យផ្នែកយោធានេះ បានបង្កើតសម្ពាធដ៏ខ្លាំងលើភាគីពាក់ព័ន្ធ បើកផ្លូវឱ្យមានកិច្ចចរចាដ៏តឹងរ៉ឹង ដែលនាំឱ្យកើតមានឱកាសសម្រាប់ដំណោះស្រាយតាមផ្លូវការទូត និងសន្តិភាពយូរអង្វែង។

តាមប្រភពព័ត៌មានដដែល សហរដ្ឋអាមេរិក និងអ៊ីរ៉ង់ បានឈានដល់ការយល់ព្រមលើបទឈប់បាញ់នេះ ត្រឹមតែ១ម៉ោងមុនឱសានវាទដែលប្រធានាធិបតី ដូណាល់ ត្រាំ កំណត់សម្រាប់វិធានការយោធាដ៏តឹងរ៉ឹងលើអ៊ីរ៉ង់។ ខណៈដែលភាគីតេហេរ៉ង់ ក៏បានអះអាងពី “ជ័យជម្នះ” របស់ខ្លួនផងដែរ ដោយលើកឡើងថា សហរដ្ឋអាមេរិកបានយល់ព្រមទទួលយកលក្ខខណ្ឌចំនួន១០ចំណុចរបស់ខ្លួន។

ជាមួយគ្នានេះ ប្រព័ន្ធផ្សព្វផ្សាយអាមេរិក និងអ៊ីស្រាអែល បានរាយការណ៍ថា អ៊ីស្រាអែលក៏បានយល់ព្រមគាំទ្របទឈប់បាញ់នេះដែរ ដែលជាសញ្ញាដ៏វិជ្ជមានមួយសម្រាប់ការកាត់បន្ថយភាពតានតឹងក្នុងតំបន់មជ្ឈិមបូព៌ា។

យ៉ាងណាមិញ តាមការបញ្ជាក់របស់ក្រុមប្រឹក្សាសន្តិសុខកំពូលអ៊ីរ៉ង់ កិច្ចចរចាផ្លូវការរវាងសហរដ្ឋអាមេរិក និងអ៊ីរ៉ង់ គ្រោងនឹងចាប់ផ្ដើមនៅថ្ងៃសុក្រសប្ដាហ៍នេះ ក្នុងទីក្រុងអ៊ីស្លាម៉ាបាដ ដើម្បីស្វែងរកដំណោះស្រាយយូរអង្វែងលើវិបត្តិនេះ។

ការយល់ព្រមលើបទឈប់បាញ់រយៈពេលខ្លីនេះ ត្រូវបានមើលឃើញថា ជាជំហានដំបូងដ៏សំខាន់ក្នុងការបន្ធូរភាពតានតឹង និងបើកផ្លូវទៅរកសន្តិភាពតាមរយៈការចរចា ទោះបីជាភាគីទាំងសងខាងនៅតែបន្តអះអាងពីជ័យជម្នះរបស់ខ្លួនក៏ដោយ៕