អតីតព្រះអង្គម្ចាស់អង់គ្លេស Andrew រើចេញពីព្រះរាជដំណាក់ Windsor ក្រោយមានឈ្មោះក្នុងឯកសារ Epstein

(ឡុងដ៍)៖ អតីតព្រះអង្គម្ចាស់អង់គ្លេស Andrew Mountbatten-Windsor បានរើចេញពីព្រះរាជដំណាក់ Windsor ទៅកាន់ព្រះរាជដំណាក់ Sandringham Estate ក្នុងទីក្រុង Norfolk ប្រទេសអង់គ្លេស បន្ទាប់ពីមានឈ្មោះនៅក្នុងឯកសារនៃរឿងអាស្រូវផ្លូវភេទ Epstein។ នេះបើតាមការចេញផ្សាយដោយសារព័ត៌មាន BBC។

អតីតព្រះអង្គម្ចាស់ Andrew បានរើចេញព្រះរាជដំណាក់ Windsor កាលពីយប់ថ្ងៃចន្ទ និងបច្ចុប្បន្ន កំពុងស្នាក់នៅព្រះរាជដំណាក់លំហែកាយ Sandringham Estate ខណៈព្រះរាជដំណាក់អចិន្ត្រៃយ៍ កំពុងស្ថិតនៅក្រោមការជួសជុលឡើងវិញ។ ខាងព្រះបរមរាជវាំង Buckingham Palace បានឱ្យដឹងថាការរើកន្លែងស្នាក់នៅនេះគ្រោងនឹងធ្វើឡើងដើមឆ្នាំ២០២៦ តែគាប់ជួនចំពេលក្រសួងយុត្តិធម៌អាមេរិក បញ្ចេញឯកសារមួយបាច់ធំពាក់ព័ន្ធនឹងរឿងអាស្រូវរំលោភបំពានផ្លូវភេទ Jeffrey Epstein។ នៅក្នុងឯកសារថ្មីចុងក្រោយបំផុតនេះក៏មានឈ្មោះរបស់អតីតព្រះអង្គម្ចាស់ Andrew ផងដែរ។

តាមប្រព័ន្ធផ្សព្វផ្សាយអង់គ្លេស ការរើចេញពីព្រះរាជដំណាក់ Windsor របស់អតីតព្រះអង្គម្ចាស់ Andrew ទំនងជាធ្វើឡើងដើម្បីគេចចេញពីក្រសែភ្នែកសាធារណជន។ ចំណែក ប្រភពស្និទ្ធនឹងគ្រួសាររាជវង្ស អង់គ្លេស បានឱ្យដឹងថាទោះលែងមានងារជាព្រះអង្គម្ចាស់ ព្រះអង្គ Andrew នៅតែជាសមាជិករបស់គ្រួសាររាជវង្សអង់គ្លេសដដែល។

គួរបញ្ជាក់ថា រូបភាពជាច្រើនសន្លឹកនៅក្នុងឯកសារ Epstein បញ្ចេញដោយក្រសួងយុត្តិធម៌អាមេរិកកាលពីសប្ដាហ៍មុន បានបង្ហាញថាអតីតព្រះអង្គម្ចាស់ Andrew បានលុតជង្គង់យកដៃស្ទាបពោះស្ត្រី ម្នាក់កំពុងដេកនៅលើឥដ្ឋ។ ករណីរបស់អតីតព្រះអង្គម្ចាស់អង់គ្លេសអង្គនេះមានលក្ខខណៈធ្ងន់ៗធ្ងរ ជាងគេដោយសារមានរូបភាពច្បាស់ៗ៕