ប្រធានាធិបតីអាមេរិកប្រកាសថា ជម្លោះថៃ-កម្ពុជា បានបិទបញ្ចប់ និងបានរិះគន់ UN យ៉ាងចាស់ដៃថា អសកម្ម
(វ៉ាស៊ីនតោន)៖ លោក ដូណាល់ ត្រាំ ប្រធានាធិបតីអាមេរិកបានប្រកាសនៅលើបណ្តាញសង្គមរបស់លោកថា ការប្រយុទ្ធគ្នារវាងថៃ និងកម្ពុជា បានបិទបញ្ចប់ ហើយប្រទេសទាំងពីរនឹងត្រឡប់ទៅរកសន្តិភាពវិញ ដោយអនុលោមតាមសន្ធិសញ្ញាដើមដែលបានព្រមព្រៀងគ្នាកាលពីពេលថ្មីៗនេះ។
នៅលើបណ្តាញទំនាក់ទំនងសង្គម Truth social លោក ត្រាំ បានមានប្រសាសន៍ថា «ខ្ញុំសូមអបអរសាទរមេដឹកនាំដ៏អស្ចារ្យទាំងពីរ ចំពោះភាពវៃឆ្លាតរបស់ពួកគេក្នុងការឈានទៅដល់ការសន្និដ្ឋានដ៏រហ័ស និងយុត្តិធម៌នេះ។ វាពិតជារហ័ស និងម៉ឺងម៉ាត់»។ លោកបានបន្ថែមថា សហរដ្ឋអាមេរិកមានមោទនភាពដែលបានជួយសម្របសម្រួល។
ក្នុងសារដដែលនោះ លោក ត្រាំ បានឆ្លៀតវាយប្រហារអង្គការសហប្រជាជាតិ (UN) យ៉ាងចាស់ដៃ ដោយលើកឡើងថា សហរដ្ឋអាមេរិកហាក់បីដូចជាបានក្លាយជា «អង្គការសហប្រជាជាតិពិតប្រាកដ» ទៅហើយ បន្ទាប់ពីលោកបានដោះស្រាយ និងបញ្ឈប់សង្គ្រាមចំនួន ៨ ក្នុងរយៈពេល ១១ខែចុងក្រោយនេះ។
លោកបានរិះគន់ថា UN ហាក់បានផ្តល់ជំនួយតិចតួចបំផុតក្នុងជម្លោះនានា រួមទាំងសង្គ្រាមរវាងរុស្ស៊ី និងអ៊ុយក្រែនផងដែរ ហើយបានជំរុញឱ្យស្ថាប័នពិភពលោកមួយនេះ «ចាប់ផ្តើមសកម្ម និងចូលរួមក្នុងសន្តិភាពពិភពលោក» ឱ្យបានពិតប្រាកដ៕