អភិបាលក្រុងអរិយក្សត្រ ដឹកនាំកិច្ចប្រជុំគណៈបញ្ជាការឯកភាពរដ្ឋបាលក្រុង ពង្រឹងសន្តិសុខ និងជំរុញប្រសិទ្ធភាពសេវាសាធារណៈ

(កណ្ដាល)៖ លោក ចាន់ តារ អភិបាលក្រុងអរិយក្សត្រ នៅថ្ងៃទី២៧ ខែកក្ដដា ឆ្នាំ២០២៦ បានដឹកនាំកិច្ចប្រជុំគណៈបញ្ជាការឯកភាពរដ្ឋបាលក្រុង ប្រចាំខែកក្កដា ឆ្នាំ២០២៦ ដោយផ្តោតលើការត្រួតពិនិត្យលទ្ធផលការងារកន្លងមក និងដាក់ចេញទិសដៅអនុវត្តការងារសំខាន់ៗសម្រាប់ខែបន្ទាប់។

កិច្ចប្រជុំបានពិនិត្យវឌ្ឍនភាពការងារលើវិស័យសន្តិសុខ សណ្តាប់ធ្នាប់សាធារណៈ ការបង្ក្រាបបទល្មើស ការអប់រំ សុរិយោដី សំណង់ ហេដ្ឋារចនាសម្ព័ន្ធ ការចែកប័ណ្ណកម្មសិទ្ធិដីធ្លី (ពន្ធសូន្យ) និងការដោះស្រាយវិវាទក្នុងមូលដ្ឋាន។

លោកអភិបាលក្រុងបានកោតសរសើរចំពោះកងកម្លាំងប្រដាប់អាវុធ អាជ្ញាធរមូលដ្ឋាន និងភាគីពាក់ព័ន្ធ ដែលបានខិតខំបំពេញភារកិច្ចរក្សាសន្តិសុខ និងទប់ស្កាត់បទល្មើស ជាពិសេសការបង្ការ និងបង្រ្កាបបទល្មើសឆបោកតាមប្រព័ន្ធអនឡាញ (Scam Online)។

ជាមួយគ្នានេះ លោកក៏បានណែនាំឱ្យបន្តពង្រឹងការអនុវត្តគោលនយោបាយ «ភូមិ-ឃុំ-សង្កាត់មានសុវត្ថិភាព» បង្ក្រាបបទល្មើសគ្រប់ប្រភេទ រក្សាសណ្តាប់ធ្នាប់សាធារណៈ គ្រប់គ្រងបរិស្ថាន ត្រៀមអន្តរាគមន៍គ្រោះមហន្តរាយក្នុងរដូវវស្សា និងលើកកម្ពស់គុណភាពសេវារដ្ឋបាលជូនប្រជាពលរដ្ឋ ប្រកបដោយតម្លាភាព គណនេយ្យភាព និងវិជ្ជាជីវៈខ្ពស់៕