លោក ចាន់ តារា អមដំណើរថ្នាក់ដឹកនាំជាន់ខ្ពស់ ចុះសួរសុខទុក្ខ និងឧបត្ថម្ភអ្នកជំងឺនៅមន្ទីរពេទ្យបង្អែកល្វាឯម ព្រមទាំងអំពាវនាវឱ្យពលរដ្ឋរួមគ្នាបង្ការជំងឺគ្រុនឈាម

(កណ្ដាល)៖ នាថ្ងៃទី២៦ ខែកក្កដា ឆ្នាំ២០២៦ លោក ចាន់ តារា អភិបាលក្រុងអរិយក្សត្រ រួមជាមួយលោក-លោកស្រីអភិបាលរងក្រុង និងមន្ត្រីពាក់ព័ន្ធ បានអមដំណើរ ឯកឧត្តម គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី ទទួលបន្ទុកជាអគ្គនាយក នៃអគ្គនាយកដ្ឋានពន្ធដារ ដែលជាតំណាងដ៏ខ្ពង់ខ្ពស់ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ អញ្ជើញចុះជួបសាកសួរសុខទុក្ខអ្នកជំងឺគ្រុនឈាម និងអ្នកជំងឺទូទៅ ដែលកំពុងសម្រាកព្យាបាលនៅមន្ទីរពេទ្យបង្អែកល្វាឯម ស្ថិតក្នុងសង្កាត់ពាមឧកញ៉ាអុង ក្រុងអរិយក្សត្រ ខេត្តកណ្ដាល។

ក្នុងឱកាសនោះ ឯកឧត្តម គង់ វិបុល បាននាំយកថវិកាឧបត្ថម្ភប្រគល់ជូនអ្នកជំងឺម្នាក់ៗ ដើម្បីជួយសម្រាលការលំបាកក្នុងការព្យាបាល ព្រមទាំងផ្តល់នូវកម្លាំងចិត្ត និងការលើកទឹកចិត្តដល់អ្នកជំងឺ និងក្រុមគ្រួសារ ឱ្យបន្តខិតខំព្យាបាលរហូតដល់ជាសះស្បើយ។

ជាមួយគ្នានេះ ថ្នាក់ដឹកនាំក៏បានអំពាវនាវដល់ប្រជាពលរដ្ឋទាំងអស់ ឱ្យបង្កើនការយកចិត្តទុកដាក់ក្នុងការបង្ការ និងទប់ស្កាត់ជំងឺគ្រុនឈាម ដោយចូលរួមលុបបំបាត់ប្រភពបង្កាត់មូសខ្លា ដូចជា ការចាក់ចោល ឬគ្របដណ្តប់វត្ថុដក់ទឹក បិទគម្របធុងទឹកឱ្យបានជិត រក្សាអនាម័យ និងសម្អាតបរិស្ថានជុំវិញលំនៅឋានឱ្យបានស្អាតជាប្រចាំ។

អាជ្ញាធរក៏បានណែនាំថា ប្រសិនបើមានអាការក្តៅខ្លួនខ្លាំង ឈឺក្បាល ឬសង្ស័យថាមានជំងឺគ្រុនឈាម ប្រជាពលរដ្ឋត្រូវប្រញាប់ទៅពិនិត្យ និងទទួលការព្យាបាលនៅមណ្ឌលសុខភាព ឬមន្ទីរពេទ្យដែលនៅជិតបំផុត ដោយមិនត្រូវពន្យារពេល ឬព្យាបាលដោយខ្លួនឯងឡើយ ព្រោះការព្យាបាលទាន់ពេលវេលា អាចកាត់បន្ថយហានិភ័យ និងការបាត់បង់អាយុជីវិតបានយ៉ាងមានប្រសិទ្ធភាព៕