ឯកឧត្តម នាយឧត្តមសេនីយ៍ ឈន សារ៉ាណេ ចុះពិនិត្យគម្រោងស្ថាបនាហេដ្ឋារចនាសម្ព័ន្ធពន្ធនាគារខេត្តកែប សម្រេចបាន១០០% ត្រៀមសម្ពោធដាក់ឱ្យប្រើប្រាស់

(កែប)៖ នារសៀលថ្ងៃសៅរ៍ ទី២៥ ខែកក្កដា ឆ្នាំ២០២៦ ដោយអនុវត្តតាមការណែនាំដ៏ខ្ពង់ខ្ពស់របស់ ឯកឧត្តម អភិសន្តិបណ្ឌិត ស សុខា ឧបនាយករដ្ឋមន្ត្រី និងរដ្ឋមន្ត្រីក្រសួងមហាផ្ទៃ ឯកឧត្តម នាយឧត្តមសេនីយ៍ ឈន សារ៉ាណេ អនុរដ្ឋលេខាធិការក្រសួងមហាផ្ទៃ បានដឹកនាំក្រុមការងារចុះពិនិត្យ និងតាមដានការស្ថាបនាហេដ្ឋារចនាសម្ព័ន្ធនៅពន្ធនាគារខេត្តកែប ដែលបច្ចុប្បន្នសម្រេចបាន១០០ភាគរយ និងត្រៀមសម្រាប់ពិធីសម្ពោធដាក់ឱ្យប្រើប្រាស់នាពេលខាងមុខ។

គម្រោងនេះរួមមាន ការកាត់ជម្រាលចង្កេះភ្នំ ការចាក់ដីពង្រីក និងលើកកម្ពស់តួផ្លូវ មុនចាក់បេតុងសរសៃដែកកម្រាស់០,១៥ម៉ែត្រ ប្រវែង៤៤៧ម៉ែត្រ ទទឹង៨ម៉ែត្រ ព្រមទាំងការចាក់បេតុងសរសៃដែកនៅមុខអគាររដ្ឋបាល ដងទង់ជាតិ និងមុខអគារឃុំឃាំង សរុបផ្ទៃក្រឡា១,៤៧៤ម៉ែត្រការ៉េ។ បន្ថែមពីនេះ ក៏បានដាំបង្គោលសុវត្ថិភាពចំនួន១២០ដើម និងដំឡើងរបាំងសុវត្ថិភាពប្រវែង១០៥ម៉ែត្រ ដើម្បីពង្រឹងសុវត្ថិភាព និងលើកកម្ពស់សោភ័ណភាពក្នុងបរិវេណពន្ធនាគារ។

សូមបញ្ជាក់ថា គម្រោងស្ថាបនាហេដ្ឋារចនាសម្ព័ន្ធនេះ គឺជាអំណោយដ៏ថ្លៃថ្លារបស់ ឯកឧត្តម អភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងលោកជំទាវ កែ សួនសុភី ក្នុងគោលបំណងលើកកម្ពស់ស្តង់ដារហេដ្ឋារចនាសម្ព័ន្ធ និងបរិយាកាសការងាររបស់អង្គភាពពន្ធនាគារខេត្តកែប។

ក្នុងឱកាសនោះដែរ ឯកឧត្តម នាយឧត្តមសេនីយ៍ ឈន សារ៉ាណេ បានជួបសំណេះសំណាល សាកសួរសុខទុក្ខ និងលើកទឹកចិត្តដល់មន្ត្រីពន្ធនាគារ និងកងកម្លាំងវិស្វកម្មសរុបចំនួន៣៤នាក់ ដែលកំពុងបំពេញការងារនៅទីតាំង ដោយបានឧបត្ថម្ភថវិកាក្នុងម្នាក់ចំនួន ៤០,០០០រៀល និងឧបត្ថម្ភថវិកាដល់អង្គភាពពន្ធនាគារខេត្តកែបចំនួន ២,០០០,០០០រៀល ដើម្បីជាការលើកទឹកចិត្ត និងគាំទ្រដល់ការបំពេញភារកិច្ចប្រកបដោយប្រសិទ្ធភាព៕