កម្ពុជាបន្តពង្រឹងទំនាក់ទំនងវិនិយោគជាមួយសហរដ្ឋអាម៉េរិក ខណៈ US-ABC បង្ហាញការចាប់អារម្មណ៍លើសក្តានុពលសេដ្ឋកិច្ចកម្ពុជា

(ភ្នំពេញ)៖ នារសៀលថ្ងៃពុធ ទី២២ ខែកក្កដា ឆ្នាំ២០២៦ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា (ក.អ.ក.) បានអនុញ្ញាតជូនគណៈប្រតិភូ ក្រុមប្រឹក្សាធុរកិច្ចអាម៉េរិក-អាស៊ាន (US-ABC) ដឹកនាំដោយ ឯកឧត្តម Brian D. McFeeters ប្រធាន និងជានាយកប្រតិបត្តិ US-ABC ចូលជួបសម្តែងការគួរសម និងពិភាក្សាការងារ ក្នុងឱកាសបំពេញទស្សនកិច្ចធុរកិច្ចផ្លូវការនៅកម្ពុជា។

ជំនួបនេះផ្តោតសំខាន់លើការពង្រឹងកិច្ចសហប្រតិបត្តិការវិនិយោគ ការផ្លាស់ប្តូរព័ត៌មានធុរកិច្ច និងការស្វែងរកឱកាសថ្មីៗ ដើម្បីជំរុញឱ្យក្រុមហ៊ុនអាម៉េរិកកាន់តែច្រើនចូលមកវិនិយោគនៅកម្ពុជា។

ក្នុងឱកាសនោះ ឯកឧត្តម ស៊ុន ចាន់ថុល បានស្វាគមន៍យ៉ាងកក់ក្តៅចំពោះគណៈប្រតិភូ US-ABC និងបានបង្ហាញពីតួនាទីសំខាន់របស់ ក.អ.ក. ក្នុងការសម្របសម្រួល និងទាក់ទាញវិនិយោគិនអន្តរជាតិ ព្រមទាំងបានលើកឡើងពីសន្ទុះនៃការអនុម័តគម្រោងវិនិយោគដែលមានលក្ខណៈសម្បត្តិគ្រប់គ្រាន់ ដែលបានកើនឡើងជាបន្តបន្ទាប់ក្នុងរយៈពេលប៉ុន្មានឆ្នាំចុងក្រោយនេះ។

ឯកឧត្តមឧបនាយករដ្ឋមន្ត្រី ក៏បានរំលេចពីលទ្ធផលវិជ្ជមាននៃបេសកកម្មទាក់ទាញ និងជំរុញវិនិយោគនៅសហរដ្ឋអាម៉េរិក ព្រមទាំងកិច្ចសហប្រតិបត្តិការថ្មីៗរវាងប្រទេសទាំងពីរ រួមមាន ការចុះហត្ថលេខាលើកិច្ចព្រមព្រៀងពាណិជ្ជកម្មបដិការ (ART) ការចុះកិច្ចព្រមព្រៀងដឹកជញ្ជូនតាមផ្លូវអាកាស (Open Skies) និងការគាំទ្រហិរញ្ញវត្ថុពីសាជីវកម្មហិរញ្ញវត្ថុសម្រាប់ការអភិវឌ្ឍអន្តរជាតិ (DFC) របស់សហរដ្ឋអាម៉េរិក សម្រាប់គម្រោងហេដ្ឋារចនាសម្ព័ន្ធសំខាន់ៗនៅអាកាសយានដ្ឋានអន្តរជាតិតេជោ។

ឯកឧត្តមបានបញ្ជាក់ថា រាជរដ្ឋាភិបាលកម្ពុជាបានដាក់ចេញនូវយន្តការជាច្រើន ដើម្បីគាំទ្រវិស័យឯកជន និងដោះស្រាយបញ្ហាប្រឈមប្រកបដោយប្រសិទ្ធភាព រួមមាន វេទិការដ្ឋាភិបាល-វិស័យឯកជន (G-PSF) វេទិកាកិច្ចសន្ទនារដ្ឋ-វិស័យឯកជន (P-PSD) និងកម្មវិធី “Open Day with DPM” ដែលផ្តល់ឱកាសឱ្យវិនិយោគិនអាចចូលជួបពិភាក្សាដោយផ្ទាល់ជាមួយថ្នាក់ដឹកនាំជាន់ខ្ពស់។

ជាមួយគ្នានេះ ឯកឧត្តម ស៊ុន ចាន់ថុល បានគូសបញ្ជាក់ពីការធ្វើកំណែទម្រង់ផ្ទៃក្នុងនៅ ក.អ.ក. ដើម្បីលើកកម្ពស់ប្រសិទ្ធភាព តម្លាភាព និងភាពទាក់ទាញនៃបរិយាកាសវិនិយោគនៅកម្ពុជា ស្របតាមគោលដៅបង្កើនភាពប្រកួតប្រជែងក្នុងតំបន់អាស៊ាន។

ជាការឆ្លើយតប ឯកឧត្តម Brian D. McFeeters និងគណៈប្រតិភូ US-ABC បានថ្លែងអំណរគុណចំពោះការទទួលបដិសណ្ឋារកិច្ចយ៉ាងកក់ក្តៅ និងការផ្តល់ព័ត៌មានច្បាស់លាស់ពាក់ព័ន្ធនឹងឱកាស និងគោលនយោបាយវិនិយោគនៅកម្ពុជា។

គណៈប្រតិភូបានវាយតម្លៃខ្ពស់ចំពោះការខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការកែលម្អបរិយាកាសធុរកិច្ច និងបានបង្ហាញចំណាប់អារម្មណ៍ក្នុងការបន្តពង្រឹងទំនាក់ទំនងជាមួយស្ថាប័នពាក់ព័ន្ធ ដើម្បីស្វែងរកឱកាសវិនិយោគថ្មីៗ។

ជំនួបនេះបានបញ្ចប់ដោយការប្តេជ្ញារួមរបស់ភាគីទាំងពីរ ក្នុងការបន្តពង្រឹងកិច្ចសហប្រតិបត្តិការ បង្កើតបណ្តាញទំនាក់ទំនងកាន់តែជិតស្និទ្ធ និងជំរុញការផ្លាស់ប្តូរព័ត៌មានវិនិយោគ ដើម្បីទាក់ទាញវិនិយោគិនអាម៉េរិកមកកាន់កម្ពុជាកាន់តែច្រើន សំដៅរួមចំណែកដល់ការអភិវឌ្ឍសេដ្ឋកិច្ចប្រកបដោយចីរភាព និងផលប្រយោជន៍ទៅវិញទៅមកសម្រាប់ប្រទេសទាំងពីរ៕