កងរាជអាវុធហត្ថខេត្តកណ្តាលរៀបចំពិធីបរិច្ចាគឈាមស្ម័គ្រចិត្ត អបអរសាទរខួបអនុស្សាវរីយ៍លើកទី៣៣ ថ្ងៃបង្កើតកងរាជអាវុធហត្ថ

(កណ្តាល)៖ បញ្ជាការដ្ឋានកងរាជអាវុធហត្ថខេត្តកណ្តាល ក្រោមការដឹកនាំរបស់លោកឧត្ដមសេនីយ៍ត្រីមេបញ្ជាការ សំ តុលា សហការជាមួយមជ្ឈមណ្ឌលជាតិផ្តល់ឈាម សហភាពសហព័ន្ធយុវជនកម្ពុជាខេត្តកណ្តាល និងមន្ទីរពេទ្យបង្អែកជ័យជំនះខេត្តកណ្តាល បានរៀបចំពិធីបរិច្ចាគឈាមស្ម័គ្រចិត្ត ដើម្បីអបអរសាទរខួបអនុស្សាវរីយ៍លើកទី៣៣ ថ្ងៃបង្កើតកងរាជអាវុធហត្ថ (១៤ កក្កដា ១៩៩៣ – ១៤ កក្កដា ២០២៦) ដោយបង្ហាញពីស្មារតីមនុស្សធម៌ និងការចូលរួមចំណែកជួយសង្គ្រោះអាយុជីវិតអ្នកជំងឺដែលត្រូវការឈាមជាបន្ទាន់។

ពិធីនេះបានប្រព្រឹត្តទៅក្រោមអធិបតីភាព លោកឧត្តមសេនីយ៍ មេបញ្ជាការកងរាជអាវុធហត្ថខេត្តកណ្តាល លោកស្រីវេជ្ជបណ្ឌិត អនុប្រធានមជ្ឈមណ្ឌលជាតិផ្តល់ឈាម និងលោកវេជ្ជបណ្ឌិត អនុប្រធានមន្ទីរពេទ្យបង្អែកជ័យជំនះខេត្តកណ្តាល ដោយមានការចូលរួមពីនាយទាហាន នាយទាហានរង ពលទាហាន ក្រុមគ្រូពេទ្យ ក្រុមគ្រួសារកងទ័ព និងប្រជាពលរដ្ឋយ៉ាងច្រើនកុះករ។

សកម្មភាពមនុស្សធម៌នេះ ស្របតាមភារកិច្ចស្នូល «បង្ការ បង្ក្រាប និងសង្គ្រោះ» ក្រោមការដឹកនាំ និងចង្អុលបង្ហាញជាប្រចាំពី ឯកឧត្តម នាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស ព្រមទាំង ឯកឧត្តម គួច ចំរើន អភិបាលនៃគណៈអភិបាលខេត្តកណ្តាល។ កម្លាំងកងរាជអាវុធហត្ថខេត្តកណ្តាល តែងប្រកាន់ខ្ជាប់នូវវិន័យ សាមគ្គីភាព និងការត្រៀមខ្លួនជានិច្ច ដើម្បីជួយសង្គ្រោះប្រជាពលរដ្ឋដែលជួបគ្រោះថ្នាក់ ឬត្រូវការឈាមជាបន្ទាន់ គ្រប់ពេលវេលា និងគ្រប់ទីកន្លែង។

ក្នុងឱកាសនោះ លោកឧត្តមសេនីយ៍ មេបញ្ជាការ បានថ្លែងកោតសរសើរ និងលើកទឹកចិត្តដល់នាយទាហាន នាយទាហានរង ពលទាហាន និងអ្នកចូលរួមទាំងអស់ ដែលបានស្ម័គ្រចិត្តបរិច្ចាគឈាម ដោយចាត់ទុកថា ការបរិច្ចាគឈាមមួយផ្លោក អាចជួយសង្គ្រោះជីវិតមនុស្សបានម្នាក់ ឬច្រើននាក់ និងជាការចែករំលែកក្តីស្រឡាញ់ដ៏មានតម្លៃចំពោះសង្គមជាតិ។

ជាលទ្ធផល ពិធីបរិច្ចាគឈាមឆ្នាំនេះ មានអ្នកចូលរួមសរុប ២៦៥នាក់ ក្នុងនោះអ្នកបរិច្ចាគឈាមជាក់ស្តែងមាន ១៨៥នាក់ ទទួលបានឈាមសរុប ១៨៥ផ្លោក។ ចាប់តាំងពីឆ្នាំ២០១៥ រហូតមកដល់បច្ចុប្បន្ន បញ្ជាការដ្ឋានកងរាជអាវុធហត្ថខេត្តកណ្តាល បានរៀបចំពិធីបរិច្ចាគឈាមយ៉ាងតិចមួយលើកក្នុងមួយឆ្នាំ សរុបចំនួន ១៦លើក ដោយមានអ្នកចូលរួមសរុប ៣,៦៩៧នាក់ និងប្រគល់ឈាមជូនមជ្ឈមណ្ឌលជាតិផ្តល់ឈាមបាន ជាង ២,០០០ផ្លោក ដែលជាការរួមចំណែកយ៉ាងសំខាន់ក្នុងការផ្គត់ផ្គង់ឈាមសម្រាប់ការព្យាបាលអ្នកជំងឺនៅទូទាំងប្រទេស។

សកម្មភាពនេះ បានឆ្លុះបញ្ចាំងពីការប្តេជ្ញាចិត្តរបស់កងរាជអាវុធហត្ថខេត្តកណ្តាល ក្នុងការបំពេញភារកិច្ចមិនត្រឹមតែការពារសន្តិសុខ និងសណ្តាប់ធ្នាប់សង្គមប៉ុណ្ណោះទេ ប៉ុន្តែថែមទាំងបន្តលើកកម្ពស់ការងារមនុស្សធម៌ និងវប្បធម៌ចែករំលែក ដើម្បីជាប្រយោជន៍ដល់សង្គម និងប្រជាពលរដ្ឋកម្ពុជាទាំងមូល៕