PeyPey Dy បកស្រាយក្រោយគ្រោះថ្នាក់ចរាចរណ៍នៅសៀមរាប៖ តេស្តទឹកនោមអវិជ្ជមានគ្រឿងញៀន និងគ្មានជាតិស្រវឹង

(សៀមរាប)៖ លោក PeyPey Dy បានចេញមុខបកស្រាយជាសាធារណៈតាមរយៈគណនីហ្វេសប៊ុកផ្ទាល់ខ្លួន នាល្ងាចថ្ងៃទី០៨ ខែមិថុនា ឆ្នាំ២០២៦ ក្រោយរងការរិះគន់ និងការចែករំលែកព័ត៌មានយ៉ាងផុសផុលជុំវិញករណីគ្រោះថ្នាក់ចរាចរណ៍ដែលបានកើតឡើងនៅខេត្តសៀមរាបកាលពីពេលថ្មីៗនេះ។

លោកបានបញ្ជាក់ថា ក្រោយការត្រួតពិនិត្យ និងធ្វើតេស្តទឹកនោមដោយសមត្ថកិច្ចជំនាញ លទ្ធផលបង្ហាញថា មិនមានសារធាតុញៀន និងមិនមានជាតិស្រវឹងនៅក្នុងខ្លួនឡើយ។ ជាមួយគ្នានេះ លោកក៏បានទទួលស្គាល់កំហុសរបស់ខ្លួន និងបានដោះស្រាយបញ្ហាជាមួយម្ចាស់ម៉ូតូរងគ្រោះរួចរាល់ហើយ ក្រោមការសម្របសម្រួលពីនគរបាលចរាចរណ៍ខេត្តសៀមរាប។

នៅក្នុងសារបង្ហោះនោះ លោក PeyPey Dy បានថ្លែងអំណរគុណចំពោះការព្រួយបារម្ភ និងការសាកសួរសុខទុក្ខពីសំណាក់មហាជន ព្រមទាំងសុំទោសចំពោះហេតុការណ៍ដែលបានកើតឡើង។

លោកក៏បានលើកឡើងដែរថា ការរិះគន់ និងការវាយប្រហារតាមបណ្ដាញសង្គមក្រោយកើតហេតុ បានធ្វើឱ្យលោកមានសម្ពាធផ្លូវចិត្ត និងស្ទើរតែមិនហ៊ានបើកមើលបណ្ដាញសង្គមនោះទេ។

គួរបញ្ជាក់ថា គ្រោះថ្នាក់ចរាចរណ៍ខាងលើបានកើតឡើងនៅខេត្តសៀមរាប កាលពីថ្ងៃទី០៧ ខែមិថុនា ឆ្នាំ២០២៦ បង្កឱ្យមានការចាប់អារម្មណ៍ និងការជជែកវែកញែកយ៉ាងច្រើននៅលើបណ្ដាញសង្គម មុនពេលសាមីខ្លួនចេញមុខបកស្រាយ និងបញ្ជាក់ការពិតជាសាធារណៈ៕