អភិបាលខេត្ត គួច ចំរើន ដឹកនាំចុះរដ្ឋបាលចំហរ នៅក្រុងសំពៅពូន បន្តបោសសម្អាតបទល្មើស Online Scam ឱ្យអស់ពីមូលដ្ឋានខេត្តកណ្ដាល

(កណ្ដាល)៖ ឯកឧត្តម គួច ចំរើន អភិបាលខេត្តកណ្ដាល និងជាប្រធានគណៈបញ្ជាការឯកភាពរដ្ឋបាលខេត្ត នៅរសៀលថ្ងៃទី០៨ ខែមិថុនា ឆ្នាំ២០២៦ បានដឹកនាំកងកម្លាំងមានសមត្ថកិច្ច មន្ត្រីជំនាញ និងអាជ្ញាធរក្រុងសំពៅពូន ចុះអនុវត្តរដ្ឋបាលចំហរ ស្របតាមអនុក្រឹត្យលេខ ០៣ អនក្រ.បក ដើម្បីពង្រឹងវិធានការបង្ការ និងបង្ក្រាបបទល្មើស Online Scam ស្របតាមគោលនយោបាយរបស់រាជរដ្ឋាភិបាល។

ក្នុងឱកាសនោះ ឯកឧត្តមអភិបាលខេត្ត បានអំពាវនាវដល់ប្រជាពលរដ្ឋឱ្យចូលរួមផ្ដល់ព័ត៌មាន ឬរាយការណ៍ទីតាំងសង្ស័យពាក់ព័ន្ធបទល្មើស Online Scam ដោយអាជ្ញាធរធានារក្សាការសម្ងាត់ និងមានការលើកទឹកចិត្តចំពោះអ្នកផ្តល់ព័ត៌មានដែលជួយដល់ការបង្ក្រាបបទល្មើស។

ឯកឧត្តម ក៏បានណែនាំដល់ម្ចាស់ផ្ទះជួល និងម្ចាស់ទីតាំងដែលជួលឱ្យជនបរទេស ត្រូវសហការជាមួយអាជ្ញាធរមានសមត្ថកិច្ចក្នុងការរាយការណ៍ និងអនុញ្ញាតឱ្យមានការត្រួតពិនិត្យជាប្រចាំ ដើម្បីទប់ស្កាត់ការលួចលាក់ប្រព្រឹត្តសកម្មភាពខុសច្បាប់។

ជាមួយគ្នានេះ ឯកឧត្តម គួច ចំរើន បានដាក់បទបញ្ជាដល់គណៈបញ្ជាការឯកភាពរដ្ឋបាលក្រុង-ស្រុកទាំងអស់ បន្តចុះត្រួតពិនិត្យរដ្ឋបាលឱ្យបានជាប្រចាំ ដោយប្រកាន់ខ្ជាប់នូវវិជ្ជាជីវៈ ការគោរពសិទ្ធិប្រជាពលរដ្ឋ និងការអនុវត្តច្បាប់ប្រកបដោយតម្លាភាព និងប្រសិទ្ធភាព។

ជាលទ្ធផលនៃប្រតិបត្តិការនេះ សមត្ថកិច្ចមិនបានរកឃើញទីតាំង ឬសកម្មភាពបទល្មើស Online Scam ថ្មីណាមួយនៅក្នុងភូមិសាស្ត្រក្រុងសំពៅពូននោះទេ ខណៈអាជ្ញាធរបន្តប្តេជ្ញាចិត្តរក្សាសន្តិសុខ សណ្តាប់ធ្នាប់ និងបោសសម្អាតបទល្មើសបច្ចេកវិទ្យាឱ្យអស់ពីមូលដ្ឋានខេត្តកណ្ដាល៕