ដីកាចាប់ខ្លួនចេញជាង១ខែហើយ តែអតីតមន្ត្រីអាវុធហត្ថ នួន នីណារ៉ូ នៅតែបាត់ដំណឹង ខណៈជាប់ពាក់ព័ន្ធសំណុំរឿង Online Scams និងសម្អាតប្រាក់

(ភ្នំពេញ)៖ គិតត្រឹមថ្ងៃទី៣ ខែមិថុនា ឆ្នាំ២០២៦នេះ មានរយៈពេលជាងមួយខែហើយ បន្ទាប់ពីលោក ឆៃ វិវឌ្ឍនៈ ចៅក្រមស៊ើបសួរ នៃសាលាដំបូងរាជធានីភ្នំពេញ បានចេញដីកាបង្គាប់ឱ្យចាប់ខ្លួន ប៉ុន្តែឈ្មោះ នួន នីណារ៉ូ នៅមិនទាន់ត្រូវបានសមត្ថកិច្ចចាប់ឃាត់ខ្លួនបាននៅឡើយ ខណៈសំណុំរឿងដែលជាប់ពាក់ព័ន្ធ ត្រូវបានចាត់ទុកជាបទល្មើសឧក្រិដ្ឋធ្ងន់ធ្ងរ ពាក់ព័ន្ធការឆបោកតាមប្រព័ន្ធបច្ចេកវិទ្យា (Online Scams) និងសម្អាតប្រាក់។

យោងតាមដីកាបង្គាប់ឱ្យចាប់ខ្លួន ចុះថ្ងៃទី២២ ខែឧសភា ឆ្នាំ២០២៦ ឈ្មោះ នួន នីណារ៉ូ ភេទប្រុស កើតថ្ងៃទី១០ ខែសីហា ឆ្នាំ១៩៨៤ ជនជាតិខ្មែរ មានទីកន្លែងកំណើត និងទីលំនៅបច្ចុប្បន្ននៅភូមិកំពង់សៀម ស្រុកកំពង់សៀម ខេត្តកំពង់ចាម ត្រូវបានដាក់ឱ្យស្ថិតក្រោមការពិនិត្យពីបទ សមគំនិតក្នុងអំពើឆបោកតាមប្រព័ន្ធបច្ចេកវិទ្យា និងសម្អាតប្រាក់ ដែលត្រូវបានចោទថា បានប្រព្រឹត្តនៅអគារ ១៣ ជាន់ ស្ថិតក្នុងភូមិក្បាលស្ពាន២ សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ ចាប់ពីអំឡុងឆ្នាំ២០២២ រហូតដល់ថ្ងៃទី២៤ ខែមេសា ឆ្នាំ២០២៦។

តុលាការបានបញ្ជាក់ថា បទល្មើសខាងលើមានបញ្ញត្តិផ្តន្ទាទោសតាមមាត្រា ២៩ នៃក្រមព្រហ្មទណ្ឌ មាត្រា ៥ កថាខណ្ឌទី៣ ចំណុចទី១ នៃច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យា និងមាត្រា ៣៨ នៃច្បាប់ស្តីពីការប្រឆាំងការសម្អាតប្រាក់ និងហិរញ្ញប្បទានភេរវកម្ម។

នៅក្នុងដីកាដដែល ចៅក្រមស៊ើបសួរបានលើកឡើងថា តំណាងអយ្យការអមសាលាដំបូងរាជធានីភ្នំពេញ តាមដីកាបញ្ជូនឱ្យឆ្លើយលេខ ៤៥៧ “ខ១” ព្រ.ទ ចុះថ្ងៃទី២១ ខែឧសភា ឆ្នាំ២០២៦ បានផ្តល់យោបល់ឯកភាពឱ្យចេញដីកាបង្គាប់ចាប់ខ្លួន។ ជាមួយគ្នានោះដែរ នាយកដ្ឋានប្រឆាំងបទល្មើសល្បែងពាណិជ្ជកម្ម ក៏បានបញ្ជាក់តាមលិខិតលេខ ១៧១ ស.ណ ចុះថ្ងៃទី១៤ ខែឧសភា ឆ្នាំ២០២៦ ថា ជនត្រូវចោទកំពុងស្ថិតក្នុងស្ថានភាពគេចខ្លួន។

ដោយផ្អែកលើហេតុផលទាំងនេះ តុលាការបានសម្រេចបង្គាប់ឱ្យកងកម្លាំងមានសមត្ថកិច្ចទាំងអស់ ស្រាវជ្រាវរកចាប់ខ្លួនឈ្មោះ នួន នីណារ៉ូ និងនាំមកប្រគល់ជូនសាលាដំបូងរាជធានីភ្នំពេញ ដើម្បីចាត់ការតាមនីតិវិធីច្បាប់ ព្រមទាំងបញ្ជាឱ្យពន្ធនាគារ ឬមណ្ឌលឃុំខ្លួនទទួលឃុំខ្លួនភ្លាមៗ ប្រសិនបើបុគ្គលរូបនេះត្រូវបានចាប់ខ្លួន។

ជាមួយគ្នានេះដែរ បើតាមការបង្ហោះរបស់លោក ផែង វណ្ណៈ នៅព្រឹកថ្ងៃទី៣ ខែមិថុនា ឆ្នាំ២០២៦ បានអះអាងថា ឈ្មោះ នួន នីណារ៉ូ គឺជានាយរងសេនាធិការ កងរាជអាវុធហត្ថខេត្តបន្ទាយមានជ័យ ហើយបច្ចុប្បន្នកំពុងរត់គេចខ្លួនពីសំណាញ់ច្បាប់ ពាក់ព័ន្ធសំណុំរឿងឆបោកតាមប្រព័ន្ធបច្ចេកវិទ្យា និងសម្អាតប្រាក់។ ប្រភពដដែលក៏បានអះអាងថា តុលាការបានចេញវិធានការបង្កកទ្រព្យសម្បត្តិពាក់ព័ន្ធចំនួន ៨ ទីតាំងផងដែរ។

សាធារណជនជាច្រើនកំពុងរង់ចាំមើលថា តើសមត្ថកិច្ចនឹងអាចតាមចាប់ខ្លួនបុគ្គលដែលតុលាការចេញដីកាបង្គាប់ឱ្យចាប់ខ្លួនរូបនេះបាននៅពេលណា ខណៈយុទ្ធនាការបង្ក្រាបបទល្មើសឆបោកតាមប្រព័ន្ធបច្ចេកវិទ្យា និងការសម្អាតប្រាក់ កំពុងត្រូវបានរាជរដ្ឋាភិបាលអនុវត្តយ៉ាងម៉ឺងម៉ាត់នៅទូទាំងប្រទេស៕