ដីកាបង្គាប់ឲ្យនាំខ្លួនថៅកែផ្សារទំនើបហេងឆៃលី! ពាក់ព័ន្ធករណីបើកបរបណ្ដាលឲ្យមនុស្សស្លាប់ ហើយរត់គេចខ្លួន

(បាត់ដំបង)៖ លោក ​ផែង វណ្ណៈ បានបង្ហោះសារឲ្យដឹងនៅថ្ងៃទី២០ ខែឧសភា ឆ្នាំ២០២៦នេះថា ចៅក្រមស៊ើបសួរ នៃសាលាដំបូងខេត្តបាត់ដំបង បានចេញដីកាបង្គាប់ឲ្យនាំខ្លួនឈ្មោះ សយ បូរ៉ា ថៅកែផ្សារទំនើបហេងឆៃលី ក្រុងបាត់ដំបង ពាក់ព័ន្ធបទល្មើស “បើកបរដោយធ្វេសប្រហែស ខ្ជីខ្ជា មិនប្រុងប្រយ័ត្ន បណ្ដាលឲ្យស្លាប់ដល់អ្នកដទៃ” ហើយជាពិសេស ត្រូវបានរាយការណ៍ថា បានបើករត់គេចខ្លួនក្រោយកើតហេតុថែមទៀត។

ប្រភពដដែលបញ្ជាក់ទៀតថា បច្ចុប្បន្នឈ្មោះ សយ បូរ៉ា កំពុងរត់គេចខ្លួនទៅក្រៅប្រទេស ខណៈសមត្ថកិច្ច និងស្ថាប័នតុលាការ កំពុងបន្តនីតិវិធីស្វែងរកចាប់ខ្លួន ដើម្បីយកមកអនុវត្តតាមផ្លូវច្បាប់។

ជុំវិញករណីនេះ លោក ផែង វណ្ណៈ ក៏បានផ្ដល់យោបល់ថា ក្រុមគ្រួសារជនរងគ្រោះ គួរដាក់ពាក្យបណ្ដឹងស្នើសុំតុលាការ ចាត់វិធានការទប់ស្កាត់ និងបង្កកទ្រព្យសម្បត្តិរបស់ឈ្មោះ សយ បូរ៉ា ដើម្បីធានាការទូទាត់សំណងរដ្ឋប្បវេណីជូនជនរងគ្រោះ និងក្រុមគ្រួសារ ក្នុងករណីត្រូវលក់ឡៃឡុងទ្រព្យសម្បត្តិតាមនីតិវិធីច្បាប់។

មហាជនកំពុងតាមដានយ៉ាងយកចិត្តទុកដាក់ថា តើសមត្ថកិច្ចអាចនាំខ្លួនជនពាក់ព័ន្ធមកផ្ដន្ទាទោសតាមច្បាប់បានដែរឬទេ ខណៈសំណុំរឿងនេះ កំពុងក្លាយជាប្រធានបទក្ដៅក្នុងសង្គម ជាពិសេសពាក់ព័ន្ធការទទួលខុសត្រូវរបស់អ្នកមានទ្រព្យ និងអ្នកមានអំណាច នៅពេលបង្កគ្រោះថ្នាក់ដល់អាយុជីវិតអ្នកដទៃ៕