អ្នកបង្ហោះម៉ូតូធំលើដងផ្លូវជាតិក្នុងខេត្តតាកែវ ត្រូវនគរបាលឃាត់ខ្លួនចាត់ការតាមច្បាប់ ក្រោយផ្ទុះការរិះគន់ពីមហាជន

(តាកែវ)៖ បុរសម្នាក់ដែលបើកម៉ូតូធំបង្ហោះកង់មុខយ៉ាងអនាធិបតេយ្យតាមដងផ្លូវជាតិ ក្នុងភូមិសាស្ត្រខេត្តតាកែវ និងត្រូវបានមហាជនរិះគន់យ៉ាងខ្លាំងលើបណ្តាញសង្គមនោះ ពេលនេះត្រូវបានកម្លាំងនគរបាលធ្វើការឃាត់ខ្លួន និងចាត់ការតាមនីតិវិធីច្បាប់ហើយ។

លោកឧត្តមសេនីយ៍ទោ ម៉ែន លី ស្នងការនគរបាលខេត្តតាកែវ បានបញ្ជាក់ថា កម្លាំងជំនាញរបស់ស្នងការដ្ឋាននគរបាលខេត្ត បានធ្វើការស្រាវជ្រាវ និងឃាត់ខ្លួនអ្នកបើកម៉ូតូធំរូបនោះយកមកសួរនាំ តាំងពីថ្ងៃទីម្សិលមិញ បន្ទាប់ពីវីដេអូបង្ហោះម៉ូតូត្រូវបានចែកចាយពេញបណ្តាញសង្គម និងបង្កការព្រួយបារម្ភដល់សាធារណជន។

ស្នងការនគរបាលខេត្តតាកែវ បានបញ្ជាក់ទៀតថា បុគ្គលរូបនេះ ត្រូវទទួលខុសត្រូវចំពោះមុខច្បាប់លើបទល្មើស និងកំហុសមួយចំនួន រួមមាន៖ ប្រើប្រាស់ម៉ូតូអត់ពន្ធ, ម៉ូតូគ្មានស្លាកលេខ, គ្មានបណ្ណបើកបរ ព្រមទាំងធ្វើសកម្មភាពបង្ហោះម៉ូតូបង្កគ្រោះថ្នាក់ និងអនាធិបតេយ្យលើដងផ្លូវសាធារណៈ ដែលអាចប៉ះពាល់ដល់សុវត្ថិភាពអ្នកដំណើរដទៃ។

បុរសខាងលើមានឈ្មោះ ឡាយ ឈៀង អាយុ២៧ឆ្នាំ មុខរបរលក់រថយន្ត មានទីលំនៅភូមិឡូរី សង្កាត់រកាក្នុង ក្រុងដូនកែវ ខេត្តតាកែវ។

មហាជនជាច្រើនបានសម្តែងការគាំទ្រចំពោះចំណាត់ការរបស់សមត្ថកិច្ច ដោយចាត់ទុកថា ជាវិធានការចាំបាច់ដើម្បីទប់ស្កាត់អំពើបើកបរប្រកបដោយគ្រោះថ្នាក់ និងពង្រឹងការអនុវត្តច្បាប់ចរាចរណ៍ឱ្យមានប្រសិទ្ធភាព។

សមត្ថកិច្ច ក៏បានអំពាវនាវដល់អ្នកប្រើប្រាស់ផ្លូវទាំងអស់ ត្រូវគោរពច្បាប់ចរាចរណ៍ និងជៀសវាងសកម្មភាពគ្រោះថ្នាក់ផ្សេងៗ ដែលអាចបង្កហានិភ័យដល់អាយុជីវិតខ្លួនឯង និងអ្នកដទៃ៕