អាជ្ញាធរខេត្តកណ្តាល បន្តចុះរៀបចំសណ្តាប់ធ្នាប់តាមដងផ្លូវសំខាន់ៗក្នុងក្រុងតាខ្មៅ លើកកម្ពស់សោភ័ណភាព និងសុវត្ថិភាពចរាចរណ៍

(កណ្តាល)៖ ឯកឧត្តម ណុប ដារ៉ា អភិបាលរងខេត្តកណ្តាល នារសៀលថ្ងៃទី១៩ ខែឧសភា ឆ្នាំ២០២៦ រួមជាមួយអាជ្ញាធរ តាខ្មៅ និងមន្ទីរពាក់ព័ន្ធ បានបន្តចុះត្រួតពិនិត្យ និងអនុវត្តវិធានការរៀបចំសណ្តាប់ធ្នាប់សាធារណៈ តាមបណ្តោយផ្លូវជាតិសំខាន់ៗក្នុងភូមិសាស្ត្រក្រុងតាខ្មៅ ដោយផ្តោតលើការរុះរើសំណង់ សំយាប និងស្លាកសញ្ញាផ្សព្វផ្សាយពាណិជ្ជកម្ម ដែលសង់ ឬដាក់តាំងរំលោភលើចំណីផ្លូវសាធារណៈ។

ការចុះអនុវត្តវិធានការនេះ ធ្វើឡើងក្នុងគោលបំណងពង្រឹងសណ្តាប់ធ្នាប់សាធារណៈ កែលម្អសោភ័ណភាពទីក្រុង និងធានាឱ្យការធ្វើចរាចរណ៍មានរបៀបរៀបរយ កាន់តែងាយស្រួល និងមានសុវត្ថិភាពសម្រាប់ប្រជាពលរដ្ឋ។

ក្នុងឱកាសនោះ ឯកឧត្តម ណុប ដារ៉ា បានមានប្រសាសន៍ថា ការរៀបចំសណ្ដាប់ធ្នាប់តាមដងផ្លូវជាតិសំខាន់ៗនេះ គឺដើម្បីធ្វើឱ្យទីក្រុងមានភាពស្អាតសមរម្យ សាកសមជាទីក្រុងស្អាត មានសន្តិសុខ សណ្ដាប់ធ្នាប់ និងរបៀបរៀបរយល្អប្រសើរ។ ទន្ទឹមនឹងនេះ អាជ្ញាធរ ក៏បានណែនាំដល់បងប្អូនអាជីវករ និងប្រជាពលរដ្ឋដែលលក់ដូរ ឬដាក់តាំងទំនិញលើចិញ្ចើមផ្លូវ ឱ្យធ្វើការរុះរើដោយស្ម័គ្រចិត្ត ដើម្បីបញ្ចៀសការរាំងស្ទះដល់អ្នកថ្មើរជើង និងយានយន្តធ្វើដំណើរ។

ឯកឧត្តមអភិបាលរងខេត្ត បានបញ្ជាក់បន្ថែមថា វិធានការនេះ ក៏ជាផ្នែកមួយក្នុងការសម្រួលដល់លំហូរចរាចរណ៍ កាត់បន្ថយការកកស្ទះ និងរួមចំណែកទប់ស្កាត់គ្រោះថ្នាក់ចរាចរណ៍នៅតាមដងផ្លូវសំខាន់ៗផងដែរ។

ជាមួយគ្នានេះ អាជ្ញាធរខេត្តកណ្តាល ក៏បានអំពាវនាវដល់បងប្អូនអាជីវករទាំងអស់ សូមបន្តចូលរួមសហការជាមួយអាជ្ញាធរ ដោយមិនត្រូវត្រឡប់មកលក់ដូរ ឬរំលោភលើចិញ្ចើមផ្លូវសាធារណៈវិញ បន្ទាប់ពីសមត្ថកិច្ចបញ្ចប់ការចុះអនុវត្តនោះឡើយ។

សូមជម្រាបថា នេះជាលើកទី៧ហើយ ដែលអាជ្ញាធរខេត្តកណ្តាល ដឹកនាំដោយឯកឧត្តម ណុប ដារ៉ា បានបន្តចុះរៀបចំសណ្ដាប់ធ្នាប់សាធារណៈនៅតាមតំបន់នានាក្នុងភូមិសាស្ត្រក្រុងតាខ្មៅ ដើម្បីធានាបរិស្ថានទីក្រុងកាន់តែមានរបៀបរៀបរយ និងសោភ័ណភាពល្អប្រសើរ៕