ចោរប្តីប្រពន្ធលួចលុយលក់ហ្គាស់ជាង ១២០លានរៀល សារភាពទោសហើយរត់គេចខ្លួនទាំងយប់

(ព្រះវិហារ)៖ មហាជនមានការភ្ញាក់ផ្អើល បន្ទាប់ពីជនសង្ស័យជាប្តីប្រពន្ធពីរនាក់ ត្រូវបានចោទប្រកាន់ថា បានធ្វើសកម្មភាពលួចលុយលក់ហ្គាស់សរុបប្រមាណ ១២០លានរៀល ពីម្ចាស់អាជីវកម្មមួយកន្លែងនៅខេត្តព្រះវិហារ។

តាមប្រភពព័ត៌មានបានឱ្យដឹងថា ក្រោយពេលកើតហេតុ ជនសង្ស័យទាំងពីរ បានសារភាពថា ពិតជាបានលួចប្រាក់ខាងលើប្រាកដមែន និងបានសន្យាថា នឹងសងប្រាក់វិញនៅព្រឹកថ្ងៃបន្ទាប់។ ទោះជាយ៉ាងណា ពួកគេបានអះអាងថា ប្រាក់មួយចំនួនត្រូវបានផ្ទេរទៅឱ្យម្ដាយក្មេកទុកនៅខេត្តបាត់ដំបងរួចហើយ។

ប៉ុន្តែអ្វីដែលគួរឱ្យភ្ញាក់ផ្អើលនោះ គឺនៅវេលាម៉ោងប្រមាណ ១២៖៣០នាទីយប់ ជនសង្ស័យទាំងពីរ បាននាំគ្នាឡើងរថយន្តបើករត់គេចខ្លួនបាត់ ដោយមិនទទួលខុសត្រូវចំពោះទង្វើរបស់ខ្លួនឡើយ។

បច្ចុប្បន្ន ម្ចាស់រងគ្រោះបានអំពាវនាវដល់សមត្ថកិច្ចគ្រប់ខេត្ត-ក្រុង មេត្តាជួយសហការតាមស្វែងរក និងឃាត់ខ្លួនជនសង្ស័យទាំងពីរ ដើម្បីយកមកអនុវត្តតាមនីតិវិធីច្បាប់។ ជាមួយគ្នានេះដែរ ប្រជាពលរដ្ឋ ក៏ត្រូវបានអំពាវនាវឱ្យមានការប្រុងប្រយ័ត្ន ជាពិសេសតាមផ្ទះសំណាក់ ឬទីតាំងការងារផ្សេងៗ ប្រសិនបើឃើញជនសង្ស័យទាំងនេះចូលស្នាក់នៅ ឬសុំធ្វើការ។

ក្នុងករណីប្រទះឃើញ ឬមានព័ត៌មានពាក់ព័ន្ធ សូមរាយការណ៍តាមលេខទូរស័ព្ទ 071 556 6622 ដើម្បីជួយដល់ការស្រាវជ្រាវរបស់សមត្ថកិច្ច។ ម្ចាស់រងគ្រោះបានបញ្ជាក់ថា នឹងមានការជូនសាគុណចំពោះអ្នកផ្តល់ដំណឹងផងដែរ។ ប្រភព៖ គីម ឡាយ