ឯកឧត្តមបណ្ឌិត ជិន ម៉ាលីន និងសហការី ចូលរួមកិច្ចប្រជុំរៀបចំដំណើរការប្រឡងជ្រើសរើសមន្ត្រីរាជការក្រសួងយុត្តិធម៌ ប្រកបដោយតម្លាភាព និងប្រសិទ្ធភាព

(ភ្នំពេញ)៖ នាព្រឹកថ្ងៃពុធ ទី១៣ ខែឧសភា ឆ្នាំ២០២៦ ឯកឧត្តមបណ្ឌិត ជិន ម៉ាលីន រដ្ឋលេខាធិការប្រចាំការក្រសួងយុត្តិធម៌ រួមជាមួយសហការី បានអញ្ជើញចូលរួមកិច្ចប្រជុំស្តីពីការរៀបចំដំណើរការប្រឡងប្រជែងជ្រើសរើសមន្ត្រីរាជការជំនាញច្បាប់ ក្របខ័ណ្ឌប្រភេទ “ក” ចំនួន ៤៥នាក់ ឱ្យចូលបម្រើការងារក្នុងក្របខ័ណ្ឌក្រសួងយុត្តិធម៌ ដែលប្រព្រឹត្តទៅនៅទីស្តីការគណៈកម្មាធិការកែទម្រង់រដ្ឋបាលសាធារណៈ។

កិច្ចប្រជុំនេះ បានប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានគណៈកម្មការរៀបចំការប្រឡងប្រជែង ដោយផ្តោតលើការធានាឱ្យដំណើរការប្រឡងប្រព្រឹត្តទៅប្រកបដោយតម្លាភាព យុត្តិធម៌ ប្រសិទ្ធភាព និងគុណភាពខ្ពស់។

នៅក្នុងកិច្ចប្រជុំ អង្គប្រជុំបានពិនិត្យ និងពិភាក្សាយ៉ាងលម្អិតលើរបៀបវារៈសំខាន់ៗជាច្រើន រួមមាន ការស្តាប់របាយការណ៍សង្ខេបស្តីពីវឌ្ឍនភាពនៃការទទួលពាក្យបេក្ខជន ការរៀបចំការងារទូទៅ ការកំណត់សម័យប្រឡង និងមណ្ឌលប្រឡង ព្រមទាំងការត្រៀមកិច្ចការចាំបាច់នានា ឆ្ពោះទៅកាន់ថ្ងៃប្រឡងប្រជែងនាពេលខាងមុខ។

ជាមួយគ្នានេះ អង្គប្រជុំក៏បានពិភាក្សាបន្ថែមអំពីការរៀបចំដំណើរការប្រឡងប្រជែងជ្រើសរើសមន្ត្រីរាជការ សម្រាប់ក្រសួងការបរទេស និងសហប្រតិបត្តិការអន្តរជាតិ ព្រមទាំងរដ្ឋលេខាធិការដ្ឋានកិច្ចការព្រំដែន ដើម្បីធានាបាននូវស្តង់ដាររួម និងប្រសិទ្ធភាពក្នុងការជ្រើសរើសធនធានមនុស្សសម្រាប់បម្រើវិស័យសាធារណៈ។

សូមបញ្ជាក់ថា កិច្ចប្រជុំនេះក៏មានការចូលរួមពី ឯកឧត្តម ខាន់ វណ្ណៈ រដ្ឋលេខាធិការ និងជាប្រធានក្រុមការងារកែទម្រង់រដ្ឋបាលសាធារណៈក្រសួងយុត្តិធម៌ ឯកឧត្តម កើត សេកាណូ អគ្គលេខាធិការក្រសួងយុត្តិធម៌ ព្រមទាំងសហការីពាក់ព័ន្ធជាច្រើនរូបផងដែរ៕