អភិបាលខេត្តកណ្ដាលជំរុញការអប់រំពលរដ្ឋរឿងទុកដាក់សំរាម និងពង្រឹងសណ្ដាប់ធ្នាប់សាធារណៈ

(កណ្ដាល)៖ ឯកឧត្តម គួច ចំរើន អភិបាល នៃគណៈអភិបាលខេត្តកណ្ដាល បានណែនាំដល់មន្ទីរ អង្គភាពពាក់ព័ន្ធ និងអាជ្ញាធរមូលដ្ឋានទាំងអស់ ឱ្យបន្តពង្រឹងការផ្សព្វផ្សាយអប់រំដល់ប្រជាពលរដ្ឋ អំពីការទុកដាក់សំរាមឱ្យបានត្រឹមត្រូវ ដើម្បីរួមចំណែកថែរក្សាបរិស្ថាន អនាម័យ និងសោភ័ណភាពសាធារណៈឱ្យកាន់តែល្អប្រសើរ។

ការណែនាំនេះ បានធ្វើឡើងក្នុងឱកាសដែលឯកឧត្តម អញ្ជើញជាអធិបតីរួមជាមួយ ឯកឧត្តម នូ សាខន ប្រធានក្រុមប្រឹក្សាខេត្ត ក្នុងកិច្ចប្រជុំសាមញ្ញលើកទី២៤ អាណត្តិទី៤ របស់ក្រុមប្រឹក្សាខេត្តកណ្ដាល នាថ្ងៃទី១៣ ខែឧសភា ឆ្នាំ២០២៦ នៅសាលាខេត្តកណ្ដាល។

ក្នុងកិច្ចប្រជុំនោះ ឯកឧត្តម នូ សាខន បានថ្លែងកោតសរសើរដល់គណៈអភិបាលខេត្ត ដែលបានបន្តជំរុញសកម្មភាពផ្សព្វផ្សាយអប់រំដល់មន្ត្រីរាជការ កងកម្លាំងប្រដាប់អាវុធ ព្រះសង្ឃ និងប្រជាពលរដ្ឋទូទាំងខេត្ត ឱ្យយល់ដឹងពីសភាពការណ៍ថ្មីៗ និងគោលនយោបាយនានារបស់រាជរដ្ឋាភិបាល។

ជាមួយគ្នានេះ ឯកឧត្តម គួច ចំរើន បានសង្កត់ធ្ងន់ថា បញ្ហាសំរាមមិនមែនជាកាតព្វកិច្ចរបស់អាជ្ញាធរតែម្នាក់ឯងនោះទេ ប៉ុន្តែជាការចូលរួមរបស់ប្រជាពលរដ្ឋគ្រប់រូប។ ការបោះចោលសំរាមពាសវាលពាសកាល មិនត្រឹមតែប៉ះពាល់ដល់បរិស្ថាន និងអនាម័យប៉ុណ្ណោះទេ ប៉ុន្តែថែមទាំងធ្វើឱ្យបាត់បង់សោភ័ណភាពទីក្រុង និងអាចបង្កផលប៉ះពាល់ដល់សុខភាពសាធារណៈផងដែរ។

ឯកឧត្តម អភិបាលខេត្ត ក៏បានជំរុញដល់មន្ទីរបរិស្ថានខេត្ត និងមន្ទីរអប់រំ យុវជន និងកីឡាខេត្ត បន្តអប់រំផ្សព្វផ្សាយដល់សិស្សានុសិស្ស និងប្រជាពលរដ្ឋ អំពីការបែងចែក និងទុកដាក់សំរាមទៅតាមប្រភេទឱ្យបានត្រឹមត្រូវ ដើម្បីបណ្ដុះស្មារតីស្រឡាញ់បរិស្ថានតាំងពីវ័យក្មេង។

ក្រៅពីបញ្ហាបរិស្ថាន ឯកឧត្តម គួច ចំរើន ក៏បានណែនាំដល់អាជ្ញាធរក្រុង-ស្រុកទាំងអស់ ឱ្យបន្តរៀបចំសណ្ដាប់ធ្នាប់តាមដងផ្លូវសាធារណៈ និងពង្រឹងការគ្រប់គ្រងសំណង់គ្រប់ប្រភេទ ដោយត្រូវរុះរើសំណង់ ផ្លាកយីហោ ឬសំយាបណា ដែលរំលោភលើផ្លូវសាធារណៈ និងអាចបង្កការកកស្ទះ ឬគ្រោះថ្នាក់ចរាចរណ៍។ ការអនុវត្តត្រូវធ្វើក្នុងស្មារតី “ទន់ភ្លន់ តែម៉ឺងម៉ាត់” ដើម្បីធានាបាននូវប្រសិទ្ធភាព និងផលប្រយោជន៍រួមរបស់សង្គម៕