កម្លាំងជំនាញស្នងការដ្ឋាននគរបាលខេត្តកណ្ដាលឃាត់ខ្លួនក្រុមក្មេងទំនើង ៥នាក់ ករណីគប់ដុំថ្មបំផ្លាញម៉ូតូជនរងគ្រោះ នៅក្រុងតាខ្មៅ

(កណ្ដាល)៖  ករណីក្រុមក្មេងទំនើងមួយក្រុម បានធ្វើសកម្មភាពយកដុំថ្មគប់ទៅលើម៉ូតូជនរងគ្រោះ បណ្ដាលឱ្យខូចខាតទ្រព្យសម្បត្តិ និងបង្កការភ្ញាក់ផ្អើលនៅសង្កាត់សិត្បូ ក្រុងតាខ្មៅ ខេត្តកណ្ដាលដែលបានកើតឡើងនៅវេលាម៉ោង១០:៤០នាទីព្រឹក ថ្ងៃទី១០ ខែឧសភា ឆ្នាំ២០២៦។

លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្ដាល បានបញ្ជាឱ្យកម្លាំងជំនាញ និងអធិការដ្ឋាននគរបាលក្រុងតាខ្មៅ ចុះស្រាវជ្រាវភ្លាមៗ រហូតឈានដល់ការឃាត់ខ្លួនជនសង្ស័យបានចំនួន ០៥នាក់ ក្នុងចំណោម ៧នាក់។

ករណីនេះត្រូវបានកំណត់ថា ជា «ហិង្សាដោយចេតនា និងធ្វើឱ្យខូចខាតដោយចេតនា (បង្កឡើងដោយក្មេងទំនើង)» ដែលបណ្តាលឱ្យម៉ូតូ និងទ្រព្យសម្បត្តិជនរងគ្រោះរងការខូចខាត។

ជនរងគ្រោះមានឈ្មោះ ហង សេងហេង ភេទប្រុស អាយុ ១៣ឆ្នាំ រស់នៅភូមិសិត្បូ សង្កាត់សិត្បូ ក្រុងតាខ្មៅ ខេត្តកណ្ដាល។
ដោយឡែកជនសង្ស័យ សមត្ថកិច្ចបានកំណត់អត្តសញ្ញាណជនសង្ស័យសរុប ៧នាក់ ក្នុងនោះ ឃាត់ខ្លួនបាន៥នាក់ និង ២នាក់កំពុងគេចខ្លួន៖ *សុផាត ផាន់ណា អាយុ ១៣ឆ្នាំ (អនីតិជន) *រដ្ឋ សុខហេង អាយុ ១៦ឆ្នាំ (ឃាត់ខ្លួន) *បូ សម្បត្តិ អាយុ ១៥ឆ្នាំ (ឃាត់ខ្លួន) *ហ៊ន់ គីមហ៊ួន អាយុ ១៥ឆ្នាំ (ឃាត់ខ្លួន) *បញ្ញា ងួនហ៊ង ហៅស្វិត អាយុ ១៥ឆ្នាំ (ឃាត់ខ្លួន) *នាថ អាយុ ១៤ឆ្នាំ (គេចខ្លួន) *សង្ហា ហៅង៉ោល អាយុ ១៦ឆ្នាំ (គេចខ្លួន)។

តាមការបញ្ជាក់របស់សមត្ថកិច្ច ជនសង្ស័យទាំង៥នាក់ដែលបានឃាត់ខ្លួន មានលទ្ធផលតេស្តទឹកនោមរកសារធាតុញៀន អវិជ្ជមាន (-)។
វត្ថុតាងដកហូត *បំណែកដុំថ្ម ០១ដុំ *ម៉ូតូហុងដា C125 ពណ៌ខ្មៅ ០១គ្រឿង *ម៉ូតូហុងដា Beat ពណ៌សលាយខៀវ ០១គ្រឿង *ទូរស័ព្ទដៃ iPhone 8 Plus ០១គ្រឿង។

នៅចំពោះមុខសមត្ថកិច្ច ជនសង្ស័យបានសារភាពថា ពួកខ្លួនពិតជាបានយកដុំថ្មគប់ទៅលើជនរងគ្រោះ ព្រោះមានទំនាស់ពាក្យសម្ដីតាមបណ្ដាញសង្គម TikTok កាលពីពេលកន្លងមក ទើបនាំឱ្យកើតមានអំពើហិង្សានេះឡើង។ ការខូចខាត ចង្កៀងម៉ូតូ និងផ្នែកខាងមុខម៉ូតូខាងឆ្វេងរងការខូចខាត និងទូរស័ព្ទ iPhone 11 មួយគ្រឿងរងការខូចខាតផ្នែកខ្នង។

បច្ចុប្បន្ន ជនសង្ស័យទាំង ៥នាក់ ត្រូវបានឃាត់ខ្លួនបណ្ដោះអាសន្ននៅអធិការដ្ឋាននគរបាលក្រុងតាខ្មៅ ដើម្បីបន្តចាត់ការតាមនីតិវិធីច្បាប់។

ស្នងការដ្ឋាននគរបាលខេត្តកណ្ដាល សូមអំពាវនាវដល់សាធារណជន ជាពិសេសយុវជន សូមជៀសវាងអំពើហិង្សា និងប្រើប្រាស់បណ្ដាញសង្គមដោយការទទួលខុសត្រូវ ដើម្បីចៀសវាងផលវិបាកផ្នែកច្បាប់ និងសង្គម៕