សារថ្វាយព្រះពរដ៏ខ្ពង់ខ្ពស់! ឯកឧត្តម នាយឧត្តមសេនីយ៍ ឈន សារ៉ាណេ និងលោកជំទាវ បួងសួងសូមព្រះមហាក្សត្រជាសះស្បើយ ពេលកំពុងព្យាបាលនៅប៉េកាំង
(ភ្នំពេញ)៖ ឯកឧត្តម នាយឧត្តមសេនីយ៍ ឈន សារ៉ាណេ អនុរដ្ឋលេខាធិការ ក្រសួងមហាផ្ទៃ រួមជាមួយលោកជំទាវ និងក្រុមគ្រួសារ នាថ្ងៃសៅរ៍ ទី១៨ ខែមេសា ឆ្នាំ២០២៦នេះ បានគោរពសូមថ្វាយព្រះពរដ៏ខ្ពង់ខ្ពស់បំផុត ជូនចំពោះ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ខណៈព្រះអង្គកំពុងគង់ប្រថាប់ពិនិត្យ និងព្យាបាលព្រះរោគ ដោយវះកាត់តាមវេជ្ជបញ្ជា នៅរដ្ឋធានីប៉េកាំង នៃសាធារណរដ្ឋប្រជាមានិតចិន។
ក្នុងសារដ៏គោរពសក្ការៈនេះ ឯកឧត្តម និងក្រុមគ្រួសារ បានអភិវន្ទន៍លំឱនកាយវាចាចិត្ត ក្រាបបង្គំសម្តែងនូវមនោសញ្ចេតនាប្រកបដោយក្តីកតញ្ញូតាធម៌យ៉ាងជ្រាលជ្រៅ ជូនចំពោះព្រះមហាក្សត្រ ដែលជាម្លប់ដ៏ត្រជាក់ត្រជុំសម្រាប់ប្រជាពលរដ្ឋខ្មែរ។
ជាមួយគ្នានេះ ក៏បានលើកហត្ថប្រណមបួងសួង
វត្ថុស័ក្តិសិទ្ធិទាំងឡាយ ទេវតាថែរក្សាទឹកដី និងដួងព្រះវិញ្ញាណក្ខន្ធអតីតព្រះមហាក្សត្រទាំងឡាយ សូមព្រះមេត្តាជួយប្រោះព្រំ ថ្វាយព្រះពរជ័យគ្រប់ប្រការ ឲ្យព្រះអង្គទទួលបានជោគជ័យក្នុងការវះកាត់ ព្យាបាលព្រះរោគ និងបានវិលត្រឡប់មកកាន់ព្រះរាជសុខភាពល្អបរិបូរណ៍វិញយ៉ាងឆាប់រហ័ស។
ឯកឧត្តម ឈន សារ៉ាណេ និងក្រុមគ្រួសារ ក៏បានសូមព្រះមេត្តាឲ្យព្រះអង្គទ្រង់មានព្រះកាយពលរឹងមាំ ដើម្បីបន្តគង់ប្រថាប់ជាម្លប់ដ៏ត្រជាក់ត្រជុំ និងដឹកនាំប្រទេសជាតិឲ្យមានសុខសន្តិភាព និងរីកចម្រើនជានិរន្តរ៍៕
