បង្ក្រាប Online Scam យ៉ាងក្តៅគគុកនៅព្រះសីហនុ! ឃាត់ខ្លួនជនបរទេសជាង១០០នាក់ និងរឹបអូសឧបករណ៍រាប់ពាន់

(ព្រះសីហនុ)៖ រដ្ឋបាលខេត្តព្រះសីហនុបានបង្កើនល្បឿនអនុវត្តអនុក្រឹត្យលេខ០៣ ដោយចុះត្រួតពិនិត្យ និងបង្ក្រាបបទល្មើសឆបោកតាមប្រព័ន្ធបច្ចេកវិទ្យា (Online Scam) និងការស្នាក់នៅមិនស្របច្បាប់របស់ជនបរទេស នៅ១០ទីតាំងផ្សេងគ្នា ក្នុងខេត្ត ក្នុងអំឡុងថ្ងៃទី៨–៩ ខែមេសា ឆ្នាំ២០២៦។

លទ្ធផលប្រតិបត្តិការ សមត្ថកិច្ចបានរកឃើញទីតាំងពាក់ព័ន្ធ Online Scam មួយកន្លែងក្រោយសណ្ឋាគារ អ៊ូថុង ស្ថិតនៅសង្កាត់លេខ៤ ដោយឃាត់ខ្លួនជនបរទេស ៤៩នាក់ និងរឹបអូសទូរសព្ទ ៤៣៥គ្រឿង កុំព្យូទ័រ ៨០គ្រឿង។ នៅទីតាំងផ្សេងទៀត ក្រុមការងារបានរឹបអូសទូរសព្ទដល់ទៅ ១,៥០០គ្រឿង ម៉ូនីទ័រ ១៤៥គ្រឿង និងរថយន្ត ៥គ្រឿង ទោះបីមិនមានមនុស្សស្នាក់នៅក៏ដោយ។

ដោយឡែក នៅកាស៊ីណូ “ហ្សុងហ័ររី ហ្គោលដិន សេន” សមត្ថកិច្ចរកឃើញមនុស្សសរុប ១០៤នាក់ ក្នុងនោះ ៣៥នាក់ ត្រូវបានបញ្ជូនទៅអគ្គនាយកដ្ឋានអន្តោប្រវេសន៍ ដើម្បីបណ្តេញចេញ ខណៈ ៦៩នាក់ ត្រូវបានអនុញ្ញាតឱ្យចាកចេញដោយខ្លួនឯង។

ក្រៅពីនេះ ក្រុមការងារបានបន្តចុះត្រួតពិនិត្យទីតាំងស្នាក់នៅផ្សេងៗទៀត ដោយឃាត់ខ្លួនជនបរទេសមួយចំនួនដែលគ្មានលិខិតឆ្លងដែន និងពាក់ព័ន្ធបទល្មើសផ្សេងៗ រួមទាំងគ្រឿងញៀនផងដែរ។

គិតត្រឹមថ្ងៃទី៩ ខែមេសា អាជ្ញាធរបានត្រួតពិនិត្យសរុប ៧៧៤ទីតាំង បង្ក្រាបបាន ២៨ទីតាំងពាក់ព័ន្ធ Online Scam និងរកឃើញ ១៦ទីតាំងមានជនបរទេសស្នាក់នៅមិនស្របច្បាប់។

ឯកឧត្តមសន្តិបណ្ឌិត ឆៃ ស៊ីណារិទ្ធ បានអំពាវនាវឱ្យអ្នកពាក់ព័ន្ធនឹងសកម្មភាពឆបោកតាមប្រព័ន្ធបច្ចេកវិទ្យា ចូលមកសារភាព និងសហការជាមួយសមត្ថកិច្ច ខណៈម្ចាស់អគារត្រូវប្រុងប្រយ័ត្នក្នុងការជួលទីតាំង មិនឱ្យក្រុមឧក្រិដ្ឋជនប្រើប្រាស់ប្រព្រឹត្តបទល្មើស។

គួរបញ្ជាក់ថា ច្បាប់ប្រឆាំងការឆបោកតាមប្រព័ន្ធបច្ចេកវិទ្យា បានចូលជាធរមានចាប់ពីថ្ងៃទី៧ ខែមេសា ឆ្នាំ២០២៦ ដោយកំណត់ទោសដល់កម្រិតអតិបរមា រួមទាំងការជាប់ពន្ធនាគាររហូតដល់មួយជីវិត និងពិន័យប្រាក់ដល់ ១,០០០ លានរៀល។

ប្រភព៖ រដ្ឋបាលខេត្តព្រះសីហនុ